2
To nipodotaku ala komi mangginjani iwenu katomona pokarajaaku nantulungi komi bo ira ri ngata Laodikia pade pura-pura tau to daꞌapa nosinjani ante aku.
2 Patujuku nanguli iwetu ala rara komi pura-pura rapakaroso pade komi mosimpotowe sambaꞌa bo sambaꞌa sampe majadi mosaongu rara bo pekiri. Ante iwetu komi kana mpuꞌu-mpuꞌu mangginjani ante natantu pura-pura nia Alatala to nitabuniaka nggari lamba pamulana, etumo komi kana mosinjani belo ante Kristus mboto.
3 Sabana Kristusmo puꞌu nu pura-pura noto bo pangginjani to nabelona.
4 Tesa etu kuuli ka komi ala neꞌe maria tau manggeni komi masalanjala ante tesa-tesa to namomi.
5 Sabana naupa aku mboto daꞌa naria ri tatongo komi, nirasaiku ewa aku bate-batena naria nosanggani-nggani ante komi. Pade nadamba mpuꞌu raraku nangepe lele to nanguli komi nosaongu rara bo naroo nomparasaya Kristus.
Matuwu ante pokainggu to masipato ka topomparasaya
6 Sampesuwu-sampesuwu, nitarima komimo Pue Yesus Kristus riara nggatuwu komi. Jadi komi kana tunggai matuwu mosaongu rara ante Iꞌa.
7 Komi kana maroo momparasaya Iꞌa sampe majadi maroso nasimbayu ewa kayu to nandala kalena. Komi kana tunggai manjarumaka Iꞌa sampe mantambai maroso nasimbayu ewa sapo nibangu mpakaroso. Komi kana mantambai maroso manjoko pepatuduki to nakonona to nipatuduki ka komi. Pade komi kana tunggai mosukuru ri jaꞌi Pue Alatala.
Neꞌe rabagiu ntau ante pepatuduki to daꞌa nopuꞌu nggari jaꞌi Kristus
8 Komi kana mainga ala neꞌe maria tau mombabagiu komi pade mompasuꞌu komi mantuki pepatuduki agama to nasala bo daꞌa ntoto ria gunana. Sabana pepatuduki ira etu aga nopuꞌu nggari jaꞌi manusia, nggari ada-ada bo atura-atura ri dunia eꞌi. Tapi etu daꞌa nopuꞌu nggari jaꞌi Kristus.
9 Jadi neꞌe mantuki pepatuduki ira to nasala, sabana ri jaꞌi Kristus naria pura-pura inggu bo kuasa Alatala.
10 Pade komi nosaongu rara ante Kristus sampe daꞌa ria kakura nuapa-nuapa ri jaꞌi komi, sabana pura-pura nuapa to naria ri jaꞌi Kristus naria woꞌu ri jaꞌi komi. Pade Kristus neliu nggakuasa nggari pura-pura kuasa ntanina to naria ri langi bo dunia.
11 Tempo komi nosaongu rara ante Kristus komi ewa nisuna. Posuna komi etu daꞌa ewa ada mposuna to nipowia manusia, tapi etu powia Kristus riara ntaꞌimu. Batuana komi nikabasakana nggari kuasa nu dota raramu to najaꞌa.
12 Tempo komi nidiu ewa tandaina komi topomparasaya Kristus, komi ewa namatemo pade nitana nosanggani-nggani ante Kristus. Pade komi woꞌu nipakatuwu bali mpasanggani-nggani ante Kristus, sabana komi nomparasaya kuasa Alatala to nompakatuwu bali Kristus nggari kamatena.
13 Bopia tempo komi daꞌapa nomparasaya Kristus komi da ewa namate sabana komi bate-batena nombaliunaka Atura-atura nu Alatala. Komi batena nikuasai dota rara to najaꞌa. Tapi tempo etu komi ewa nipakatuwu Alatala bali mpasanggani-nggani ante Kristus. Pura-pura silakata niampunginamo.
14 Ewa naria sura to nompakatantu pura-pura silaka to nipowiata. Kita nipangadu bo nipakasala isi sura etu. Tapi tempo Kristus namate nipaku ri kayu parika sura etu nipakalipo Alatalamo sampe kita mana nireke tau nasala.
15 Pade tempo Kristus namate nipaku ri kayu parika, Alatala nombadagi pura-pura seta, karampua-karampua bo pue-pue ntanina to nakuasa. Ante kamate Kristus ri kayu parika Alatala nompakanoto ka njumaongu dunia Iꞌamo padagi bo iramo to nidagina.
Neꞌe matundu riara ada-ada bo atura-atura nggari dunia eꞌi
16 Jadi sampesuwu-sampesuwu, neꞌe mompariara ntaꞌi tau to mompakasala komi sabana komi nanggoni bara nanginu to nipopali nantuki ada-ada ira. Neꞌe mompariara ntaꞌi tau to mompakasala komi sabana komi daꞌa nantuki eo bete agama Yahudi, ewa eo bete wula nggiki bo Eo Mpenonto.
17 Sabana atura-atura bo ada-ada etu aga nombagambara anu to marata ri purina. Pade to narata ri purina etumo kabelona to niwai Kristus ka komi.
18 Jadi ane maria tau mompakasala komi sabana komi daꞌa nantuki pepatuduki ira, neꞌe rapariara ntaꞌi komi tesa ira. Sabana ira aga tumoni-moni naede rara, pade ira nombasomba malaeka-malaeka i Pue. Pade ira nanguli pepatuduki ira etu nakono sabana naria panggita nikita ira. Ira aga nompakalanga rara sabana pepatuduki ira nopuꞌu nggari pekiri ira mboto to nikuasai dota rara to najaꞌa. Tapi kakonona daꞌa masipato ira noinggu iwetu.
19 Ira mana nanjarumaka Kristus to najadi balenggata. Kita topomparasaya namala rarapaka ewa koro Kristus. Ane ri koro manusia balengga to nombakuasai koro, pade pura-pura sipa nu koro niposiumpu bo niposidumpa ante karaua-karauana bo posidumpa nu wuku-wukuna ala majadi saongu. Iwetu woꞌu kita topomparasaya. Kristus nompakasaongu kita pade nanggeniaka kita sampe mantambai eona mantambai maroso pomparasayata ewa to nipodota Alatala.
20 Tempo Kristus namate kita topomparasaya ewa namate woꞌu nosanggani-nggani ante Iꞌa, pade ante iwetu kita mana nisoko nu ada-ada bo atura-atura nggari dunia eꞌi. a Jadi ane iwetu, nokuya komi danatundu riara atura-atura etu nasimbayu ewa tau-tau danipatundu nu ada-ada ri dunia eꞌi?
21 Nokuya komi danatundu riara atura-atura to nanguli, “Neꞌe manjoko eꞌi! Neꞌe mombajila panggoni etu! Neꞌe mantui nuapa-nuapa to nipopali!”?
22 Atura-atura etu daꞌa ria gunana ka kita sabana aga nantesa panggoni to nipake sampalai pade nalipo. Kakonona atura-atura etu aga nopuꞌu nggari parenta-parenta bo pepatuduki manusia.
23 Riara mpanggita manusia atura-atura etu mpuꞌu-mpuꞌu nabelo, sabana topantuki atura etu naraji nepue nantuki atura agama to nipakatantu ira mboto. Ira nompakaede rara pade nompandasa koro ira mboto. Tapi kakonona atura-atura etu daꞌa ntoto ria gunana mantaꞌamaka dota rara manusia to najaꞌana.