Kabasakamo pokainggu to najaꞌa, matuwu ante pokainggu to nabelo
3
Tempo Kristus nipakatuwu bali nggari kamatena kita topomparasaya woꞌu ewa nipakatuwu bali mpasanggani-nggani ante Iꞌa. Sabana etu pekirimo anu to naria ri suruga, petoꞌo Kristus nekatoko ri panggana nu Alatala.
2 Komi kana tunggai mompekiri katuwumu to nabou nosanggani ante Kristus ri suruga. Neꞌe aga mompekiri katuwumu ri dunia eꞌi.
3 Sabana komi ewa namatemo pade weꞌi-weꞌi komi ewa natuwu nosanggani ante Kristus ri ngayo Alatala. Katuwumu to nabou etu daꞌapa namala nikita ntau weꞌi-weꞌi.
4 Tapi tempo Kristus, to najadi puꞌu katuwuata, marata bali ri dunia Iꞌa kana mompopokita kuasa bo kagayana to nipogumaa. Pade komi woꞌu kana manoto rakita mosanggani-nggani ka Iꞌa ante kuasa bo kagayana etu.
5 Sabana etu kabasakamo pokainggu-pokainggu to nopuꞌu nggari dunia to najaꞌa eꞌi. Jonjona, neꞌe mana mogau sala ante tau daꞌa rongomu mboto, neꞌe mowia pokainggu to nompakatantoru, neꞌe mantuki dota raramu to najaꞌa bo dota-dota ntanina to daꞌa nabelo. Pade neꞌe woꞌu maino ka mbara-mbara ntau ante daꞌa mabasa-basa, sabana etu nasimbayu kajaꞌana ante mepue ka pue-pue ntanina.
6 Pokainggu-pokainggu ewa etumo to nompopeumba rau rara Alatala ka tau-tau daꞌa natundu ri jaꞌina.
7 Bopia pokainggu komi woꞌu nasimbayu ewa etu tempo komi danikuasai inggu-inggu najaꞌa.
8 Tapi weꞌi-weꞌi kabasakamo pura-pura pokainggu to najaꞌa. Neꞌe mombaboli rau riara ntaꞌimu, neꞌe manggarau tau ntanina, neꞌe momporau rara ntau, neꞌe manguli sinjaꞌi tau ntanina pade neꞌe sampe maria tesa-tesa njilaka mesuwu nggari sumbamu.
9 Neꞌe komi mosipodawa sambaꞌa bo sambaꞌa, sabana nabalimo katuwu komi bopia. Nikabasaka komimo pokainggu-pokainggu to najaꞌa,
10 pade nitarima komimo katuwua nabou. Komi nipajadi Alatala manusia nabou pade Iꞌa bate-batena manggeni komi mompasiala ingguna mboto sampe kaopuna komi mpuꞌu-mpuꞌu mosinjani belo ante Iꞌa.
11 Ane kita najadi manusia nabou mana ria posisalana ri olo tau-tau to Yahudi bo tau-tau daꞌa to Yahudi. Mana ria posisalana ri olo tau-tau nisuna nantuki ada-ada agama Yahudi bo tau-tau daꞌa nisuna iwetu. Mana ria tau nireke tolare bara tau daꞌa ria adana. Mana ria posisalana ri olo batua bo madika. To neliu nggapokona etumo Kristus, pade Iꞌa netoꞌo riara ntaꞌi pura-pura tau to nomparasaya Iꞌa.
12 Sampesuwu-sampesuwu, komi nipotowe Alatala pade nipelisina majadi todeana to nagasa. Etu sampe masipato komi maasi mata manggita roamu. Komi kana mabelo rara sambaꞌa bo sambaꞌa. Komi kana maede raramu, bo malusu pokainggumu, pade komi kana mandate posabaramu ane rapandasa.
13 Neꞌe masalisa makedi rara ri jaꞌi roamu, tapi ane maria posinggarau, posiampungimo komi sambaꞌa bo sambaꞌa. Ampungimo tau to mowia sala ri jaꞌimu nasimbayu ewa i Pue nombaampungi silakamu.
14 Tapi to neliu nggapokona, komi kana mosipotowe sambaꞌa bo sambaꞌa. Sabana posipotowe etumo to mpuꞌu-mpuꞌu mompakasaongu rara todea topomparasaya.
15 Komi kana tunggai mompaloga Kristus mombakuasai katuwu komi sampe komi bate-batena matuwu mosinggabelo sambaꞌa bo sambaꞌa. Sabana etumo patuju Alatala mompokio komi ala majadi saongu nasimbayu ante saongu koro to nadea sipana. Pade neꞌe menonto manguli tarima kasi ka Alatala.
16 Tesa-tesa Kristus kana raboli mpakabelo-belo riara ntaꞌi komi sampe mpuꞌu-mpuꞌu moguna riara nggatuwumu. Jonjona, posipatuduki bo posipopanjanimo komi sambaꞌa bo sambaꞌa nantuki pura-pura noto to naria ri jaꞌimu. Podademo ante tesa-tesa nggari Buku Mazmur bo podade-podade to nantoiya Alatala bo podade-podade nggari jaꞌi Nosa Nagasa nu Alatala. Podademo ka Alatala ante mosukuru riara ntaꞌimu.
17 Pade nuapa-nuapa rapowia komi bara rauli komi, etu kana rapowia bo rauli ewa to masipato ka tau-tau to nomparasaya i Pue Yesus. Pade ulimo tarima kasi ka Umata Alatala riara sanga i Pue Yesus.
Pepatuduki ka toporongo, ngana-ngana bo totuꞌa, batua bo madika
18 Totuꞌa-totuꞌa besi, pekoumo ri jaꞌi rongomu langgai ewa to masipato ka besi-besi to nomparasaya i Pue.
19 Pade totuꞌa-totuꞌa langgai, potowemo rongomu besi, neꞌe moinggu makasara ri jaꞌina.
20 Ngana-ngana, tukimo pura-pura parenta nu indo umamu sabana etumo pokainggu to nompakadamba rara i Pue.
21 Pade sampesuwu-sampesuwu to najadi uma, neꞌe mompakajuꞌa rara ana-anamu ala neꞌe ira maopu rara.
22 Sampesuwu-sampesuwu to najadi batua, tukimo pura-pura parenta nu madikamu ri dunia eꞌi. Neꞌe aga mantuki parentana tempo komi nikitana ala komi ratoiyana. Tapi tukimo parentana ante naliongu rara sabana komi nekou ri jaꞌi Pue.
23 Nuapa-nuapa raparenta ka komi, kawiamo etu ante mpuꞌu-mpuꞌu raramu nasimbayu ewa komi nantulungi i Pue daꞌa aga manusia.
24 Sabana ninjani komi Pue mbotomo to mombabalasi pokainggu komi. Iꞌa kana mombawai ka komi nuapa-nuapa to nijanjina ka ana-anana. Toramo! Kristusmo madika to nitulungi komi.
25 Pade isema-sema to mowia kajaꞌana kana rabalasi ante pesuku to masipato ante kajaꞌana etu, sabana Pue daꞌa nanggita lenje.