4
Sampesuwu-sampesuwu to najadi madika, komi kana moinggu manoa bo makono ri jaꞌi batua-batuamu, sabana ninjani komi mbotomo naria Madikamu ri suruga.
Pepatuduki ewa posambaya
2 Neꞌe mabasa-basa mosambaya ka Pue Alatala ante mainga, pade neꞌe menonto manguli tarima kasi ka Iꞌa.
3 Posambaya woꞌu ka kami ala Alatala mombabuka jala ka kami mompatolele niana to nitabuniakana nggari nggaolu to nipakadupa Kristus. Sabana nggari pokarajaaku nompatolele tesa etumo sampe aku nitarunggu weꞌi-weꞌi.
4 Jadi posambayamo ala aku mamala motarangga mpakanoto tesa Kristus etu, sabana etumo bago to masipato kupowia.
Inggu to masipatona ri jaꞌi tau-tau daꞌa nomparasaya
5 Ane komi mosigalo ante tau-tau daꞌa topomparasaya komi kana moinggu manoto, pade pakemo loga to naria ri jaꞌimu.
6 Ane komi motesa ka ira, tesa-tesamu kana malusu bo mabelo. Kana ranjani komi woꞌu akala to masipatona mombasono pompekutana ira sambaꞌa bo sambaꞌa.
Petabe bo tesa kaopuna
7 Sampesuwu-sampesuwu, ane i Tikhikus marata ri jaꞌi komi, iꞌa kana mantesa mpakanoto ka komi ewa katuwuku ri seꞌi. Iꞌa sambaꞌa sampesuwu to nipotoweku. Iꞌa woꞌu sambaꞌa roaku sampokarajaa bo batua i Pue to natutu nokarajaa nantulungi todea topomparasaya.
8 Iꞌa nipakauku mpaka ri jaꞌi komi ala komi mamala mangginjani ewa katuwu kami ri seꞌi, pade ala iꞌa mamala mompakaroso rara komi ri setu.
9 Pade nosanggani ante iꞌa nipakauku woꞌu Onesimus, sampesuwuta to nipotoweku to natutu nomparasaya. Iꞌa sambaꞌa nggari ngata komi mboto. Ira rombaꞌa kana mompakanoto ka komi nuapa pura to najadi ri seꞌi.
10 Tabe nggari jaꞌi Aristarkhus to nosanggani ante aku riara tarunggu ri seꞌi. Pade tabe nggari jaꞌi Markus sampesuwu i Barnabas. Toramo to nitewaiku ka komi bopia ewa i Markus etu. Ane iꞌa momai ri jaꞌi komi ri setu, tarimamo iꞌa ante mabelo.
11 Tabe woꞌu nggari jaꞌi Yesus to nidae Yustus. Nggari tau-tau to Yahudi to nomparasaya aga ira tolumbaꞌa etu to nokarajaa ante aku weꞌi-weꞌi mangelo tau majadi todea riara Poparenta nu Alatala. Iramo to mpuꞌu-mpuꞌu nompakaroso raraku.
12 Pade tabe nggari jaꞌi Epafras, batua Yesus Kristus nggari ngata komi mboto. Iꞌa tunggai nokarajaa ntomo nomposambaya komi pura-pura ala komi majadi topomparasaya to maroso pade ala komi maroo mantuki pura-pura dota Alatala.
13 Aku mboto nanggita iꞌa nokarajaa ante mpuꞌu-mpuꞌu rarana nantulungi komi to netoꞌo ri ngata Kolose bo ira to netoꞌo ri ngata Laodikia bo ngata Hierapolis woꞌu.
14 Tabe woꞌu nggari jaꞌi Dokutoro Lukas to nipotoweku, pade nggari jaꞌi Demas.
15 Kuperapi pakasampe tabeku ka topomparasaya-topomparasaya ri ngata Laodikia, pade ka i Nimfa bo todea topomparasaya to nasiromu nodade ri sapona.
16 Ane sura eꞌi naopu nibasa ri ngayo komi pura-pura, kuperapi ala rapakatu ka todea topomparasaya ri ngata Laodikia ala mamala rabasa ka ira ri setu woꞌu. Iwetu woꞌu komi kana mombabasa suraku to rapapola nggari ngata Laodikia ka komi.
17 Pade ulimo ka Arkhipus, “Pakaopumo pokarajaa to niwai Pue ka komi.”
18 Tabe nggari jaꞌiku i Paulus. Kaopu nu sura eꞌi nitulisi ante paleku mboto. Toramo, aku dariara tarunggu.
Perapi towe belo nu Alatala mosanggani ante komi pura-pura.
Tabe nggari jaꞌiku,
Paulus