Paulus nompakau Timotius mpaka ri jaꞌi to Tesalonika
3
Kaopuna mana namala kami nantaꞌamaka kalentora rara kami. Jadi nipekiri kami agina aku netoꞌo njambaꞌaku ri ngata Atena
2 pade sampesuwuta i Timotius rapakau mpaka ri jaꞌi komi. Timotius eꞌi sambaꞌa batua Alatala to nokarajaa nosanggani ante kami manggeni Kareba Belo Kristus. Iꞌa nipakau kami mpaka ri jaꞌi komi ala mompakaroo rara komi bo mompakaroso pomparasaya komi.
3 Iꞌa nipakau kami mpaka ri jaꞌi komi ala neꞌe maria nggari tatongo komi to mokanggaura momparasaya sabana nipandasa ntau. Kakonona ninjani komi mbotomo kita kana rapandasa, sabana etumo to nipakatantu Alatala ka kita.
4 Tempo kami danaria nosanggani-nggani ante komi bopia, niuli kami mamimo kana maria tau mompandasa kita sabana kita nomparasaya i Pue Yesus. Pade ninjani komi mboto etumo to mpuꞌu-mpuꞌu najadi.
5 Jadi etu sampe aku nompakau i Timotius malau mpaka ri jaꞌi komi, ala mamala kunjani iwenumo pomparasaya komi, sabana mana namala aku nantaꞌamaka kalentora raraku nompekiri komi. Nakini raraku neꞌe-neꞌe komi namala radagi Magau nu Seta ante pesoba-pesobana sampe mana ria asele nggari katiti nu ini kami nanggeni Kareba Belo ka komi.
Kareba to nikeni Timotius nggari Tesalonika
6 Tapi weꞌi-weꞌi natinggulimo i Timotius ri jaꞌi kami ri seꞌi, pade nitesana ka kami kareba to nompakadamba rara kami. Niulina, “To Tesalonika naroso pomparasaya ira, bo ira nosipotowe sambaꞌa bo sambaꞌa. Ira bate-batena nantora kita ante nadamba rara, pade ira nalentora manggita kita nasimbayu ewa kita nalentora manggita ira.”
7 Sampesuwu-sampesuwu to nipotoweku, nangepe kareba to nitesa i Timotius etu, nawoemo rara kami. Naupa kami nasusa bo nipandasa ntau, nawoemo rara kami nangepe komi batena naroo nomparasaya.
8 Jadi weꞌi-weꞌi naroso balimo rara kami sabana komi naroo nomparasaya i Pue.
9 Tempo kami nosambaya ka komi ri jaꞌi Pue Alatalata, nadamba mpuꞌu rara kami. Ewa daꞌa ria tesa to nagana manguli tarima kasi kami ka Iꞌa nggari kadamba nu rara kami nantora komi.
10 Eo wengi kami merapi ka Alatala ante mpuꞌu-mpuꞌu rara ala kami mamala malau manggita komi pade mompakagana nuapa-nuapa to nakura ri pomparasaya komi.
11 Perapi Umata Pue Alatala mboto bo Pueta Yesus mombabuka jala ka kami ala mosirata bali ante komi.
12 Perapi Pue manggeni komi mantambai mosipotowe sambaꞌa bo sambaꞌa bo mpuꞌu-mpuꞌu mompotowe pura-pura tau, nasimbayu ewa kami mpuꞌu-mpuꞌu nompotowe komi.
13 Perapi Pue mompakaroso pomparasaya komi sampe komi majadi magasa bo manoa ri ngayo Umata Pue Alatala tempo Pueta Yesus marata bali ri dunia nosanggani ante pura-pura topantuki Iꞌa to nagasana.