Pokainggu to nompakadamba rara Alatala
4
Sampesuwu-sampesuwu, kapolana, kami merapi bo mompopatora ka komi ante kuasa to niwai i Pue Yesus ka kami, tukimo pepatuduki to niepe komi nggari jaꞌi kami to nompakanoto pokainggu nuapa to masipato rakawia komi ala mompakadamba rara Alatala. Kakonona, pokainggu komi nantuki pepatuduki etu. Tapi kami merapi ka komi, ratambaipa pokainggu komi to nabelona etu.
2 Sabana ninjani komimo atura-atura to nipatuduki kami ka komi ante kuasa nggari jaꞌi Pue Yesus.
3 Iweꞌimo dota rara Alatala: Komi kana matuwu ante pokainggu to nagasana, bo neꞌe mogau sala mosampaturu ante tau daꞌa rongomu mboto.
4 Butu mbaꞌa langgai nggari tatongo komi kana mangginjani iwenu matuwu mosanggani-nggani ante rongona ante pokainggu to nagasa bo masipato ratoiya.
5 Neꞌe komi matuwu mantuki dota rara to najaꞌa nasimbayu ewa pokainggu ntau daꞌa nangginjani Alatala.
6 Ri pokainggu langgai bo besi, neꞌe komi mompowia silaka ri jaꞌi sampesuwumu, neꞌe mombabagiu iꞌa ante mangala rongona, sabana Alatala kana mombasuku pura-pura tau to nompowia sala ewa etu. Etu pura-pura nipatuduki bo nipopatora kami ka komi bopia.
7 Alatala daꞌa nompokio kita ala mogau sala ante tau daꞌa rongota mboto. Tapi Iꞌa nompokio kita ala matuwu ante pokainggu to magasa.
8 Jadi isema-sema to nompoara pepatuduki eꞌi daꞌa nompoara pepatuduki manusia, tapi ira nompoara pepatuduki Alatala to nombawai Nosana to Nagasa ka komi.
Posipotowemo sambaꞌa bo sambaꞌa bo mabati mokarajaa
9 Sampesuwu-sampesuwu, daꞌa paraluu aku mantulisi ka komi ewa posipotowe sambaꞌa bo sambaꞌa, sabana Alatala mbotomo nompatuduki etu ka komi.
10 Kakonona nosimpotowemo komi ante pura-pura topomparasaya i Pue Yesus ri njumaongu Propinsi Makedonia. Tapi kami merapi ka komi ante mpuꞌu-mpuꞌu, ratambaipa posipotowe komi etu.
11 Pasimbukumo matuwu malino mompasiayu bagomu mboto. Neꞌe mombagalo urusa tau ntanina. Pokarajaamo mangelo katuwua komi mboto ewa to niparenta kami ka komi bopia.
12 Ane komi matuwu iwetu, komi kana rabila tau-tau to daꞌa nomparasaya i Pue Yesus, pade komi daꞌa metimbaloe ka tau-tau ntanina.
Karata i Pue Yesus bali ri dunia
13 Sampesuwu-sampesuwu, to nipodota kami ala komi mangginjani nuapa kakono-konona majadi ante tau-tau to namatemo, ala neꞌe komi masusa rara nasimbayu ewa tau-tau ntanina to daꞌa ria panjarumakana.
14 Kita nomparasaya i Pue Yesus namate natuwu bali. Iwetu woꞌu topomparasaya i Pue Yesus to namatemo. Ira kana rapakatuwu Alatala bali nggari kamatena pade rakeni mpasanggani-nggani ante i Pue Yesus.
15 Pepatuduki kami eꞌi nggari jaꞌi Pue mboto. Tempo Iꞌa marata bali ri dunia, kita to danatuwu tempo etu daꞌa meore mosirata ka Iꞌa mokolu ka roa-roata to namatena.
16 Tempo parenta rawai bo tadulako malaeka mongare ante suara to namangga bo kololio Alatala rapopomoni, tempo etu woꞌu i Pue Yesus mboto kana manaꞌu nggari suruga. Pade topomparasaya Kristus to namatemo kana matuwu bali.
17 Naopu etu kita to danatuwu tempo etu kana raore mpasanggani-nggani ante ira riara kulimu mosirata ka i Pue Yesus ri laerawa. Pade kita kana matuwu mpasanggani-nggani ante i Pue sampe ri kasae-saena.
18 Sabana etu, sampesuwu-sampesuwu, posipakawoemo rara komi sambaꞌa bo sambaꞌa ante pepatuduki eꞌi.