Kita kana mainga mompopea karata i Pue Yesus bali
5
Sampesuwu-sampesuwu, daꞌa paraluu kami mantulisi ka komi mompakanoto ewa tempo to natantuna kajadia-kajadia etu pura-pura majadi.
2 Ninjani komi mboto ante nanoto karata i Pue Yesus banepia masimbayu ewa karata sambaꞌa topangangga tempo nggawengina ante daꞌa ninjani-njani ntau.
3 Tempo tau-tau aga manguli, “Katuwuta ri dunia nabelo pura, daꞌa ria nuapa-nuapa to rapokaekata,” ri tempo etumo ira kaliu-liu rasuku. Daꞌa ntoto maria jala ira malai nggari kasusa etu. Etu kana majadi ante daꞌa ninjani-njani ira, nasimbayu ewa juꞌa sambaꞌa besi ntora moana.
4 Tapi sampesuwu-sampesuwuku, komi daꞌa natuwu ri karumauna ewa tau-tau to daꞌa nomparasaya. Jadi komi daꞌa rapakatikaja ante karata i Pue Yesus nasimbayu ewa tau rapakatikaja ante karata sambaꞌa topangangga tempo nggawengina.
5 Komi pura-pura tau to natuwu riara karemena. Komi nompowia to nabelona nasimbayu ewa powia ntau ri eona. Kita daꞌa natuwu ri karumauna. Kita daꞌa nompowia to najaꞌana nasimbayu ewa to nipowia ntau tempo nggawengina.
6 Jadi kita kana mainga bo manoto rarata. Neꞌe makanjalia nasimbayu ewa tau-tau to daꞌa nomparasaya Alatala.
7 Tau ri karumauna aga nalumpi bo nalangu sampe mana nanoto rarana.
8 Tapi kita tau to natuwu riara karemena. Etu sampe kita masipato manoto rarata. Kita kana maroo momparasaya Alatala pade mompotowe tau-tau ntanina ala kita maroso nasimbayu ewa tantara to nobaju ase. Kita kana maroo manjarumaka Alatala mompakasalama kita ala kita maroso ewa tantara nosonggo waja.
9 Sabana Alatala nompelisi kita daꞌa ala rasuku tapi ala rapakasalama ante momparasaya Pueta Yesus Kristus.
10 Iꞌa namate nantolo silakata ala tempo Iꞌa marata bali ri dunia nau kita damatuwu atau namatemo tempo etu, kita mamala matuwu mpasanggani-nggani ante Iꞌa.
11 Sabana etu, sampesuwu-sampesuwu, posipakawoemo rara komi, bo posipakarosomo pomparasaya komi sambaꞌa bo sambaꞌa ewa to nipowia komi mami weꞌi-weꞌi.
Tesa kaopuna bo petabe
12 Sampesuwu-sampesuwuku, kami mpuꞌu-mpuꞌu merapi ala komi mombabila topanggeniaka-topanggeniaka to nokarajaa ntomo ri tatongo komi, etumo ira to nipelisi i Pue manggeniaka bo mompatuduki komi.
13 Bilamo bo potowemo ira ante mpuꞌu-mpuꞌu rara, sabana ira mpuꞌu-mpuꞌu nokarajaa nantulungi komi. Pade katuwumo mosinggabelo ante pura-pura roamu.
14 Kami woꞌu merapi ka komi, uli ka tau-tau nasondo rarana, ira kana mokarajaa. Pakaroomo rara tau-tau to naeka rarana. Tulungimo tau-tau to nalente pomparasayana. Posabaramo komi ri jaꞌi ntau pura-pura.
15 Pakabelo-belo, neꞌe sampe maria komi mombabalasi powia to najaꞌana ante kajaꞌana, tapi tunggai mompasimbuku mowia to nabelona ka roa-roa komi pade ka pura-pura tau ntanina.
16 Neꞌe menonto madamba-madamba.
17 Neꞌe mabasa mosambaya.
18 Pade posukurumo ri jaꞌi Alatala riara mpengele-ngele, sabana etumo dota rarana ka komi to nosaongu rara ante Yesus Kristus.
19 Neꞌe mantaꞌamaka powia Nosa Nagasa nu Alatala.
20 Neꞌe manjapuaka tesa nggari jaꞌi Nosa Nagasa nu Alatala to nipasimbayu roamu,
21 tapi ujimo pura-pura tesa etu. Pade tukimo nuapa to nabelona.
22 Pakakawao koro komi nggari mpengele-ngele to najaꞌana.
23 Perapi Pue Alatala mboto, puꞌu katuwua mabelo, mompakagasa pura-pura katuwu komi sampe komi mpuꞌu-mpuꞌu magasa riara mpanggitana. Perapi Pue mombajagai pura-pura katuwu komi, nabeloka nosamu, nabeloka wayomu, nabeloka koromu, sampe daꞌa ntoto maria inggumu to nasalana tempo Pueta Yesus Kristus marata bali ri dunia.
24 Alatala nompokio kita majadi todeana. Jadi Iꞌamo to mompowia etu pura-pura ka komi, sabana Iꞌa namala raparasaya.
25 Sampesuwu-sampesuwu, tulungi posambaya woꞌu ka kami.
26 Pakasampe tabe kami ka pura-pura topomparasaya i Pue Yesus ri setu ante towe.
27 Ante kuasa to niwai i Pue aku momparenta komi ala sura eꞌi rabasa ka pura-pura topomparasaya i Pue Yesus ri setu.
28 Perapi Pueta Yesus Kristus mombagane komi pura-pura.
Tabe nggari jaꞌiku,
Paulus