Topangewa Alatala
2
Sampesuwu-sampesuwu, kami madota mompakanoto ka komi nuapa majadi tempo Pueta Yesus Kristus marata bali ri dunia pade kita raore rapasiromu mpasanggani-nggani ante Iꞌa. Kami merapi,
2 neꞌe komi masasinta gaga maingu atau mawiora rara ane komi mangepe kareba to nanguli narata balimo i Pue Yesus. Neꞌe komi maingu naupa maria tau manguli ka komi etu tesa nggari jaꞌi Nosa Nagasa, atau ira manguli etu to niuli kami atau to nitulisi kami riara sura.
3-4 Nau bara iwenu ntoto kareba etu, neꞌe sampe komi rabagiu, sabana daꞌapa eo etu marata naria rongele kana majadi ntanimo ruru. Pamulana, nadea mpuꞌu tau kana mombasapuaka bo mangewa Alatala. Pade karongelena, tau to niuli Topangewa Alatala kana meumba. Iꞌa kana mompakalanga korona bo mangewa pura-pura nuapa to nipesomba manusia atau to nireke manusia ewa alatala. Daꞌa aga iwetu, tapi kaopuna iꞌa kana mesua mekatoko ri Sapo Mpepue pade manguli iꞌa mbotomo Alatala. Tapi natantumo iꞌa kana ratajiaka riara naraka banepia. a
5 Sampesuwu-sampesuwu, natantu nitora komi nuapa pura to nipatudukiku ka komi ewa etu tempo aku danaria nosanggani-nggani ante komi.
6 Pade ninjani komi Topangewa Alatala etu daꞌapa neumba sabana weꞌi-weꞌi danaria sangele nombalawa iꞌa. Ninjani komi mbotomo nuapa to nombalawa iꞌa. Jadi ane marata tempona to nipakatantu Alatala, Topangewa Alatala etu kana meumba.
7 Kuasa najaꞌa to nombakuasai iꞌa nompamula nokarajaa nggalino ri dunia weꞌi-weꞌi, tapi korona mboto daꞌapa neumba sabana iꞌa danilawa. Iꞌa bate-batena ralawa sampe ri tempo topelawa etu rakaliaka.
8 Aga maopu etu pade iꞌa meumba. Tapi tempo i Pue Yesus marata ante kuasana to nipogumaa, Iꞌa kana mompatesi Topangewa Alatala etu. Pue Yesus kana mompakaropu iꞌa ante nosa nggari sumbana.
9 Topangewa Alatala etu kana meumba ante kuasa Magau nu Seta pade iꞌa kana mombabagiu tau ante mompowia mpengele-ngele kabaraka bo tandai-tandai to nipogumaa.
10 Iꞌa kana mompake mpengele-ngele akala to najaꞌa mombabagiu tau-tau to masipato rasuku Alatala. Ira masipato rasuku Alatala sabana ira daꞌa madota mantarima bo mompotowe pepatuduki to nakonona nggari jaꞌi Alatala to namala mompakasalama ira.
11 Etu sampe Alatala kana mompakatu ka ira sangele kuasa to mombabagiu ira sampe ira momparasaya dawa nu Topangewa Alatala etu.
12 Alatala kana mowia iwetu ala pura-pura tau to daꞌa nomparasaya pepatuduki to nakonona tapi aga nompokono to najaꞌana kana rasuku.
Kita nipelisi Alatala majadi todeana
13 Jadi sampesuwu-sampesuwu to nipotowe i Pue, masipato kami daꞌa nenonto manguli tarima kasi ka Alatala sabana katuwu komi. Kami kana manguli tarima kasi sabana Alatala nompelisi komi nggari lamba pamulana ala komi rapakasalamana. Etu pura-pura najadi nggari powia Nosa Nagasa riara nggatuwu komi ala mompakajadi komi todea Alatala to nagasana. Pade etu najadi sabana komi nomparasaya pepatuduki to nakonona.
14 Iꞌa nompokio komi majadi todeana nggari Kareba Belo to nipatolele kami ka komi. Patujuna ala komi mamala mombarata bagia riara kuasa bo kagaya Pueta Yesus Kristus.
15 Jadi sampesuwu-sampesuwu, sabana etu, pakaroso pomparasaya komi. Komi kana tunggai mantuki pepatuduki to nipatolele kami ka komi, nabeloka to nitesa kami ante sumba, nabeloka to nitulisi kami riara sura.
16-17 Pue Alatala nompotowe kita pade nggari towe belona mboto Iꞌa nompakaroo rarata sampe ri kasae-saena, pade nombawai ka kita panjarumaka to nabelona. Perapi Pueta Yesus Kristus mboto bo Umata Pue Alatala mompakawoe bo mompakaroso rara komi ala komi tunggai mowia bo motesa nuapa to nabelona.