SURA PAULUS KARONGGANINA KA TOPOMPARASAYA RI NGATA
TESALONIKA
Petabe
1
Sura eꞌi nggari jaꞌi kami tolumbaꞌa, etumo, i Paulus, i Silas bo i Timotius, ka topomparasaya ri ngata Tesalonika to nosaongu rara ante Umata Pue Alatala bo Pue Yesus Kristus.
2 Perapi Pue Alatala bo Pue Yesus Kristus mombagane bo mombawai katuwua mabelo ka komi.
Paulus nanguli tarima kasi ka Alatala
3 Sampesuwu-sampesuwu, kami daꞌa nenonto nanguli tarima kasi ka Pue Alatala sabana katuwu komi. Masipato kami nosukuru, sabana nantambai eona nantambai karoso pomparasaya komi ka i Pue Yesus, pade komi pura-pura nantambai nosipotowe sambaꞌa bo sambaꞌa.
4 Etu sampe ri ngata-ngata ntanina kami nantoiya pokainggu komi ri ngayo ntodea topomparasaya Alatala. Ante nadamba rara kami notesa ka ira iwenu komi ri ngata Tesalonika naroo nomparasaya tempo nipandasa bo nipakasusa.
5 Nuapa to najadi ri jaꞌi komi etu saongu tandai to nompakanoto potangara Alatala nanoa. Iweꞌimo kanoana: Komi naroo nomparasaya tempo nipandasa. Jadi etu sampe komi kana rareke masipato majadi todea riara Poparenta nu Alatala.
6 Alatala kana mowia to nanoana ante mombabalasi powia ntau to nompandasa komi,
7 pade Iꞌa kana mombakabasaka komi, bo kami woꞌu, nggari kasusa to nirasaita weꞌi-weꞌi. Etu rapowiana tempo i Pue Yesus manaꞌu nggari suruga mosanggani-nggani ante malaeka-malaekana to nakuasa
8 pade ante remena to najela ewa apu. Iꞌa kana manaꞌu ala mombasuku tau to daꞌa madota mosinjani ante Alatala bo daꞌa madota momparasaya Kareba Belo to nantesa Pueta Yesus.
9 Tau-tau etu kana rasuku Alatala sampe ri kasae-saena. Ira kana rapopogaꞌa nggari jaꞌi Pue pade nggari reme bo kuasana.
10 Pura-pura etu kana majadi tempo i Pue Yesus marata banepia ala rabila bo ratoiya ntopantuki Iꞌa pade rapogumaa pura-pura topomparasaya Iꞌa. Sampesuwu-sampesuwu, komi woꞌu kana mombabila bo mantoiya Iꞌa eo etu, sabana niparasaya komimo kareba to nipatolele kami ka komi.
11 Etu sampe kami daꞌa nenonto nosambaya ka komi. Kami merapi ala pokainggu komi rapajadi masipato ka tau to nipokio Alatalata majadi todeana. Kami woꞌu merapi ala Pue Alatala mompakadupa pura-pura patuju komi mowia to nabelona, bo mombawai kuasa ka komi ala mantulungi komi mompakaopu pura-pura bago to nipamula komi sabana komi nomparasaya i Pue Yesus.
12 Patuju kami merapi iwetu ala nggari powia komi to nabelona etu, sanga Pueta Yesus kana rabila bo ratoiya, pade ala komi woꞌu rabila bo ratoiya i Pue Yesus. Etu pura-pura majadi nggari towe belo Umata Pue Alatala bo Pue Yesus Kristus.