SURA PAULUS PAMULANA KA
TIMOTIUS
Petabe
1
1-2 Sura eꞌi nggari jaꞌiku i Paulus, ka i Timotius to najadi ewa anaku mboto sabana nomparasaya i Pue Yesus. Aku eꞌi najadi suro Yesus Kristus nantuki parenta Alatala, Magau to Mompakasalama kita bo Pue Yesus Kristus to nisarumakata. Perapi Umata Pue Alatala bo Pueta Yesus Kristus mombagane komi bo mompopokita asi mata ri jaꞌi komi bo mombawai katuwua mabelo ka komi.
Timotius kana mangewa topanggeni pepatuduki to nasala
3 Komi kana maroo metoꞌo ri ngata Efesus ewa to nitewaiku ka komi bopia tempo aku nanggaliwo mpaka ri Propinsi Makedonia. Komi kana maroo ri setu ala mompatuduki tau-tau to nompatolele pepatuduki to nasala ala ira menonto mompatuduki etu.
4 Pade patuduki ka ira woꞌu neꞌe mana mompariara tesa-tesa kabali to nipetowali manusia bo tuntu-tuntu ntotuꞌa nggaolu to daꞌa ria kaopu-opuna. Tesa-tesa etu aga nompopeumba posinggarau pade daꞌa nanggeni tau mangginjani nia Alatala. Niana etu aga namala ranjani ante momparasaya i Pue.
5 Patuju tewaiku eꞌi ala topomparasaya mosipotowe sambaꞌa bo sambaꞌa. Etu kana majadi ane ira maliongu rara bo magasa rara ntaꞌi bo mpuꞌu-mpuꞌu momparasaya i Pue.
6 Naria bara sakuya mbaꞌa tau mana matuwu ante inggu iwetu. Ira aga notesa-tesa anu daꞌa ria batuana.
7 Ira madota majadi guru to mompatuduki Atura-atura agama to nipapola i Musa, tapi ira mboto daꞌa nangginjani batuana tesa-tesa to nipake ira bo nuapa-nuapa to nisowadaka ira ante nakono.
Patuju Atura-atura agama to nipapola i Musa
8 Ninjanita tesa nggari Atura-atura agama nabelo ane rapake ante nanoa.
9 Pade ninjanita woꞌu Atura-atura etu daꞌa nipowia ka tau-tau to nanoana tapi ka tau-tau to nadenggona, ka tau-tau to nawatu, tau-tau daꞌa nantuki dota Alatala, tau-tau to nasilaka, tau-tau daꞌa nagasa pokaingguna, tau-tau daꞌa nombabila Alatala, tau-tau to nompatesi indo umana, pade pura-pura topepatesi ntanina.
10 Atura etu nipowia ka tau-tau nogau sala ante tau daꞌa rongona mboto, tau-tau to nosiporongo mbau langgai bo mbau besi, topangaꞌe, topodawa, sabi-sabi topodawa, pade ka isema-sema to nanggawia pura-pura pokainggu to daꞌa masipato ante pepatuduki to nakonona.
11 Pepatuduki to nakonona etu naria riara Kareba Belo to niparasaya ka aku, etumo Kareba Belo to nakuasa nggari jaꞌi Alatala to masipato ratoiya.
Posukuru Paulus sabana towe belo nu Alatala
12 Aku notarima kasi ka Pueta Yesus Kristus to nombawai pompakule ka aku mantulungi tau mangginjani Kareba Belo etu, sabana nipekirina aku namala raparasaya mantui bago etu.
13 Tempo bopia aku eꞌi nompakakedi Iꞌa, aku nompandasa bo nanjalai Iꞌa. Tapi naupa iwetu Alatala nompotowe aku, sabana ri tempo etu aku daꞌapa nomparasaya Iꞌa, daꞌapa nanoto ka aku powiaku etu najaꞌa.
14 Pade towe belo nu Pueta nipopelabina ka aku nosanggani-nggani ante pomparasaya bo towe nggari jaꞌi Yesus Kristus.
15 Naria tesa to nakono mpuꞌu bo masipato ratarima bo raparasaya pura-pura tau iweꞌi: “Yesus Kristus narata ri dunia eꞌi ala mompakasalama tau-tau to nasilaka.” Pade nggari pura-pura tau nasilaka akupa to neliu silakana.
16 Tapi etumo sabana aku nipotowe Alatala, ala Yesus Kristus namala mompopokita posabarana to daꞌa ria kaopu-opuna ri jaꞌiku to neliu nggajaꞌa. Ante iwetu aku najadi jonjo ka pura-pura tau ntanina to momparasaya Iꞌa banepia pade mombarata katuwua mabelo sampe ri kasae-saena.
17 Alatalamo Magau nggari lamba pamulana sampe ri kasae-saena. Iꞌa daꞌa ria mamate-mate, Iꞌa daꞌa namala rakita, aga Iꞌamo Alatala to nakonona. Iꞌamo to masipato rabila bo ratoiyata sampe ri kasae-saena. Amin!
Tewai Paulus ewa bago Timotius
18 Timotius, anaku, bago etu kuparasaya ka komi nantuki tesa nu Alatala to nipasimbayu nabi-nabina nosinggawela ante katuwu komi. Tesa etu kana majadi ewa bakumu mompakaroso komi mantui bago to nabelo etu ewa sambaꞌa tantara to naroso nangewa balina.
19 Tuimo bago etu ante pomparasaya to naroso bo rara ntaꞌi to nagasa. Naria tau daꞌa nantuki rara ntaꞌina to nagasa sampe nageromo pomparasayana.
20 Rombaꞌa nggari tatongo ira etumo i Himeneus bo Aleksander. Ira rombaꞌa niwaikumo ka Magau nu Seta ala ira rapatuduki neꞌe mana mompakakedi Alatala.