Pokainggu to masipato riara mpodade
2
Jadi iweꞌimo tewaiku pamulana: Todea topomparasaya kana merapi ka Alatala nuapa-nuapa to niparaluu pura-pura tau, ira kana momposambaya pura-pura tau, ira kana mekakai ka Alatala ala mantulungi pura-pura tau, pade ira kana mosukuru ka Alatala sabana petulungina ka pura-pura tau.
2 Ira kana momposambaya magau-magau bo pura-pura tau to nipakakuasa, ala kita mamala matuwu masana bo mosinggabelo ante mpuꞌu-mpuꞌu mantuki dota Alatala bo moinggu mabelo.
3 Masipato kita mosambaya iwetu sabana etumo powia to nabelo to nompakadamba rara Alatala, Magau to Mompakasalama kita.
4 Iꞌa madota ala pura-pura tau mamala rapakasalama bo mangginjani pepatuduki to nakonona.
5 Sabana aga sambaꞌa lau Alatala, pade aga sambaꞌa lau woꞌu tau ntongo to nompoposinggabelo Alatala ante manusia, etumo sambaꞌa manusia to nosanga ka Yesus Kristus.
6 Iꞌa nombawai korona mboto rapatesi ala mantolo silaka pura-pura manusia. Ante iwetu, ri tempo to natantuna, Alatala nompakanoto ka pura-pura manusia Iꞌa madota mompakasalama ira.
7 Pade etu sampe aku nionggotaka Alatala majadi topompatolele Kareba Belo, pade nisurona malau mompatuduki tau-tau daꞌa to Yahudi ala ira momparasaya pepatuduki to nakonona. To nitesaku eꞌi nakono mpuꞌu, aku daꞌa nodawa!
8 Jadi aku madota ala langgai ri umba-umba mosambaya ante mangonggotaka palena to nagasa ante daꞌa ria rau rara bara posinggarau.
9 Iwetu woꞌu aku madota ala besi-besi mompakaramba koro ira ante akala to malusu bo masipato. Ira kana mompake pakea to daꞌa nepakaeya. Neꞌe mompengaya-ngaya woꞌo. Neꞌe woꞌu mompake ramba-ramba bulawa, mutiara bo pakea to nasuli-sulina.
10 Aginapa ira mompakaramba koro ira ante pokainggu to nabelo ewa to masipato ka besi to nompangaku korona topomparasaya Alatala.
11 Besi-besi kana mangepe pepatuduki mpakabelo-belo ante mekalino pade mekou ri jaꞌi topanggeni podade.
12 Aku daꞌa nompaloga besi-besi mompaguru atau momparenta langgai. Ira kana mekalino,
13 sabana to nipajadi Alatala pamulana iꞌamo Adam, pade naopu etu i Hawa.
14 Pade daꞌa Adam to nibagiu Magau nu Seta, aga i Hawa sampe iꞌa nombaliunaka parenta Alatala.
15 Tapi naupa iwetu, besi-besi kana rapakasalama sabana moana a ane ira maroo momparasaya, mompotowe tau-tau ntanina pade matuwu ante pokainggu to magasa bo masipatona.