Pokainggu to masipato ka topanggeniaka topomparasaya
3
Nakono mpuꞌu tesa to nanguli iweꞌi: “Ane tau madota majadi topanggeniaka topomparasaya, to nipodotana etu sangele pokarajaa to nabelo mpuꞌu.”
2 Topanggeniaka topomparasaya kana moinggu manoa, etumo tau aga sambaꞌa lau rongona, tau to nataꞌu mantaꞌamaka dota rarana mboto, tau to nanoto pade to naria adana. Iꞌa kana madota mantarima torata riara njapona, pade iꞌa kana mataꞌu mompaguru tau ntanina.
3 Iꞌa sambaꞌa tau daꞌa nabiasa nanginu to nepakalangu pade daꞌa nabiasa nosibaga. Tapi iꞌa kana moinggu malusu pade daꞌa mompokono posinggarau. Iꞌa daꞌa woꞌu mamala momata doi.
4 Iꞌa kana mataꞌu mompakasiayu awuna mboto ante mabelo pade mompatuduki anana ala tunggai matundu bo mombabila totuꞌana.
5 Sabana ane iꞌa daꞌa mamala mompakasiayu awuna mboto, iwenu iꞌa mamala mompakasiayu todea topomparasaya Alatala?
6 Iꞌa daꞌa mamala tau lako nomparasaya, ala neꞌe iꞌa majadi masombo sampe mawela pesuku nasimbayu ewa to nipawela ka Magau nu Seta.
7 Iꞌa woꞌu sambaꞌa tau to nabelo pokaingguna sampe nipokono bo nibila tau-tau daꞌa topomparasaya, ala neꞌe sampe iꞌa rasalaraka ntau pade rapakanawu riara mpale Magau nu Seta.
Pokainggu to masipato ka topantulungi topomparasaya
8 Iwetu woꞌu inggu tau-tau to raonggotaka majadi topantulungi topomparasaya. Ira kana tau to nibila riara pokaingguna, ira tau to nabelo bo nanoa, ira daꞌa nomata doi pade daꞌa woꞌu nabiasa nalangu.
9 Ante rara ntaꞌi to nagasa ira kana maroo manjoko pepatuduki to nakonona to nipakanoto Alatala.
10 Daꞌapa ira raonggotaka majadi topantulungi topomparasaya, pokainggu ira kana rauji ntani ruru. Pade ane nanotomo daꞌa ria pokainggu to nasala, ira namala raonggotaka majadi topantulungi topomparasaya.
11 Iwetu woꞌu rongo ira kana besi to nibila ntau riara pokaingguna, daꞌa besi to nabiasa mompakajaꞌa tau ntanina. Pade ira kana mataꞌu mantaꞌamaka dota rara ira mboto pade mamala raparasaya riara mpengele-ngele.
12 Topantulungi topomparasaya kana tau aga sambaꞌa lau rongona. Iꞌa woꞌu kana mataꞌu mompakasiayu awuna mboto ante mabelo.
13 Topantulungi topomparasaya to nokarajaa ante nabelo ri tatongo topomparasaya kana rabila ntau pade mantambai mabia motesa ewa pomparasaya ira ka Yesus Kristus.
Topomparasaya niparasayaka pepatuduki to nakonona
14 Timotius, nisarumakaku daꞌa mana masaeka aku mamala momai mantalioda komi. Tapi naupa iwetu aku nantulisi sura eꞌi ka komi,
15 ala nau aku masae marata komi mamala mangginjani pokainggu to masipato ka kita to najadi ananjapo nu Alatala, etumo todea to nomparasaya Alatala to Natuwuna. Kitamo to nanjoko mpakaroso pepatuduki to nakonona nggari jaꞌi Alatala nasimbayu ewa posuko bo palo nombatande sapo.
16 Natantumo neliu nggabelo pepatuduki agamata to nitabuniaka nggari lamba pamulana tapi to nipakanoto Alatala weꞌi-weꞌi. Etumo,
Yesus Kristus netimbali najadi manusia.
Kanoana nipopokita Nosa Nagasa nu Alatala,
pade Iꞌa nikita malaeka-malaeka.
Karebana nipatolele ka tau-tau daꞌa to Yahudi,
Iꞌa niparasaya ntau ri umba-umba ri dunia,
pade Iꞌa niore mpaka ri suruga.