Pepatuduki to rakeni guru-guru topodawa
4
Nosa Nagasa nu Alatala nanguli ante nanoto iweꞌi: Tempo namosu kaopu nu dunia banepia kana maria tau to mokanggaura momparasaya. Ira mantuki seta-seta topebagiu pade momparasaya pepatuduki to nopuꞌu nggari jaꞌi seta-seta.
2 Pepatuduki etu rakeni ntau aga nabelo ri lenje to nodawa. Rara ntaꞌi ira narumaumo.
3 Ira kana mompatuduki tau ala neꞌe mana morongo bo neꞌe mana manggoni bara sakuya ngele panggoni to nipakatantu. Tapi kakonona panggoni etu nipajadi Alatala ala rakoni ntau to nomparasaya pade nangginjani pepatuduki to nakonona. Panggoni etu namala rakonita ante manguli tarima kasi ka Alatala,
4 sabana pura-pura to nipajadi Alatala nabelo. Daꞌa ria sangele to nipopali ane rakonita ante manguli tarima kasi ka Alatala,
5 sabana panggoni etu nipakagasa ante posambaya nantuki Tesa nu Alatala.
Akala mangewa pepatuduki to nasala
6 Timotius, ane komi mompatuduki pura-pura etu ka topomparasaya komi majadi batua Yesus Kristus to nabelona. Etu kana majadi ane komi batena mantuki tesa-tesa agama Karistee to napokona bo pepatuduki-pepatuduki to nakonona ewa to nitukimu sampe weꞌi-weꞌi.
7 Tapi pakakawaomo nggari tesa-tesa kabali to daꞌa ria gunana to nipetowali manusia. Komi kana mompopobiasa koromu matuwu ante pokainggu to nantuki dota Alatala.
8 Sabana mombalati koro batata aga sakedi lau gunana. Tapi matuwu mantuki dota Alatala nadea mpuꞌu gunana riara mpengele-ngele. Ante matuwu nantuki dota Alatala kita mombarata rasi to nijanjina, etumo katuwua mabelo nompamula weꞌi-weꞌi sampe ri kasae-saena.
9 Tesa eꞌi mpuꞌu-mpuꞌu nakono bo masipato ratarimata bo raparasayata pura-pura.
10 Etu sampe kita nompasimbuku ante mpuꞌu-mpuꞌu rara pade nokarajaa ntomo, sabana kita nanjarumaka Alatala to Natuwuna. Iꞌamo Magau to Mompakasalama pura-pura manusia, neliu-liupa ira to nomparasaya Iꞌa.
11 Patudukimo pura-pura etu pade pakaumo topomparasaya mantuki pepatuduki etu.
12 Neꞌe sampe maria tau manjauru komi sabana komi danamuda. Tapi popokitamo jonjo ka topomparasaya riara tesamu, riara pokainggumu, riara towemu, pade riara pomparasayamu bo kagasa katuwumu.
13 Pade tempo komi mompopea karataku, komi kana maraji mombabasa Buku Nagasa ka todea topomparasaya. Popatoramo ira ala mantuki tesa etu, pade patudukimo ka ira pepatuduki to nakonona.
14 Neꞌe rakalinga mompake pompakule nggari jaꞌi Nosa Nagasa nu Alatala to niwaina ka komi bopia tempo nabi-nabi nompasimbayu tewai Alatala ka komi pade topanggeniaka topomparasaya nombadika pale ira ri balenggamu.
15 Kawiamo bago etu pura-pura ante mpuꞌu-mpuꞌu rara, ala pantambai pompakulemu mantui bago etu manoto ka pura-pura tau.
16 Jagaimo pokainggumu bo jagai woꞌu pepatudukimu. Komi kana matutu manggawia pura-pura etu, sabana ante iwetu komi kana mompakasalama koromu mboto ante tau-tau to mangepe pepatudukimu etu woꞌu.