Akala to masipatona mompatuduki topomparasaya
5
Neꞌe komi mangontiaka sambaꞌa langgai to natuꞌana, tapi popatoramo iꞌa nasimbayu ewa umamu mboto. Pade popatoramo langgai-langgai to namudana nasimbayu ewa sampesuwumu mboto.
2 Pade popatoramo besi-besi to natuꞌana nasimbayu ewa indomu mboto, pade popatoramo besi-besi to namudana ante pokainggumu to nagasa nasimbayu ewa tuaꞌimu mboto.
Pepatuduki ewa petulungi ka tobalu besi
3 Tulungimo tobalu-tobalu besi to mpuꞌu-mpuꞌu natuwu njambaꞌana.
4 Tapi ane maria anana atau makumpuna, ira etumo to masipato mokolu meguru mompiara totuꞌana mboto pade mombabalasi kabelo totuꞌa ira etu. Sabana etumo pokainggu to nabelo to nikonoa rara Alatala.
5 Tobalu besi to mpuꞌu-mpuꞌu natuwu njambaꞌana to daꞌa naria isema-sema mompiara ira aga natuwu nanjarumaka Alatala. Eo wengi ira daꞌa nenonto-nonto nosambaya merapi tulungi ka Iꞌa.
6 Tapi tobalu besi to natuwu nompegaya bo nompesana-sana ewa namatemo pomparasayana naupa korona danatuwu.
7 Pasimbayumo tewai-tewaiku eꞌi ka topomparasaya ala ira matuwu ante pokainggu to daꞌa namala rasalaraka.
8 Tapi ane maria tau to daꞌa nompiara sampesuwuna mboto, neliu-liupa ira saongu njapo, tau etu nombasapuaka pepatuduki to niparasayana. Iꞌa neliu nggajaꞌa nggari tau daꞌa nomparasaya.
9 Tobalu besi to masipato sangana rasuaraka riara sanga-sanga tobalu to ratulungi todea topomparasaya aga besi umuruna daꞌa nakura nggari onompulu mpae to sanggani lau niporongo.
10 Pade iꞌa woꞌu kana ninjani ntaumo ewa besi to nompowia to nabelona. Jonjona, iꞌa nompiara anana ante nabelo, nadamba rarana nantarima torata riara njapona, iꞌa nantulungi todea topomparasaya, iꞌa nantulungi tau-tau to nasusa, pade iꞌa nabati nompowia mpengele-ngele powia to nabelona.
11 Tapi neꞌe rasuaraka sanga tobalu-tobalu besi to namudana riara sanga-sanga etu. Sabana ane nasu ira nompone sampe neliu nggaroso nggari towe ira ri jaꞌi Kristus, ira kana madota raporongo bali.
12 Ane etu majadi ira mawela pesuku sabana ira manjapuaka pojanji ira ka i Pue bopia.
13 Pade ira woꞌu aga mompopobiasa masondo rara pade manjayo-njayo mompone sou ntau. Pade ira daꞌa aga mompopobiasa masondo rara, tapi ira woꞌu manggeni tesa bo mombagalo urusa tau ntanina bo motesa mpengele-ngele to daꞌa masipato ratesa.
14 Sabana etu to nipodotaku ala tobalu-tobalu besi to namudana raporongo bali, pade moana bo mompakasiayu awuna mboto ala neꞌe mombawai loga ka balita mompakawau sangata.
15 Sampe niuliku iwetu sabana naria mamimo tobalu besi to nasalanjalamo nantuki dota Magau nu Seta.
16 Ane maria topomparasaya a to nosampesuwu ante tobalu besi, ira kana mompiara tobalu besi etu. Neꞌe sampe mompakatomo todea topomparasaya. Ante iwetu todea topomparasaya mamala mantulungi tobalu-tobalu besi to mpuꞌu-mpuꞌu natuwu njambaꞌana lau.
Pepatuduki ewa topanggeniaka topomparasaya
17 Topanggeniaka-topanggeniaka to nanggeniaka todea topomparasaya ante nabelo masipato rawai ka pebila bo petulungi to neliu nggari biasa, neliu-liupa ira to nokarajaa ntomo nanggeni Tesa nu Alatala pade nompatuduki todea.
18 Sabana riara Buku Nagasa naria tesa to nanguli iweꞌi: “Neꞌe mombamumu sumba japi tempo iꞌa mombalonggo-longgo pae ala maronto nggari bulina, tapi palogamo iꞌa manggoni sakedi.” b Pade naria tesa ntanina to nanguli, “Topokarajaa masipato mantarima gajina.” c
19 Neꞌe komi mangepe tesa ntau mompangadu sambaꞌa topanggeniaka topomparasaya ane daꞌa ria rombaꞌa atau tolumbaꞌa sabi mantakono tesa etu.
20 Ane maria ira to nowia silaka ira kana raontiaka ri ngayo ntodea topomparasaya ala tau ntanina maeka mowia silaka.
21 Timotius, ri ngayo Alatala bo Yesus Kristus pade malaeka-malaekana to nagasa, aku mantewai komi ante mpuꞌu-mpuꞌu raraku iweꞌi: Tukimo tewai-tewai eꞌi ante akala to nanoana. Kawiamo etu pura-pura ante daꞌa manggita lenje.
22 Neꞌe masasinta gaga mombadika palemu ri koro ntau mangonggotaka ira majadi topanggeniaka topomparasaya. Neꞌe sampe komi matipakeni mantuki silaka tau ntanina. Jagaimo koromu ala batena matuwu ante pokainggu to nagasa.
23 Neꞌe mana aga manginu ue biasa, tapi inumo sakedi anggur ala mompakuli taꞌimu bo juꞌa-juꞌamu ntanina.
24 Neꞌe masasinta gaga mangonggotaka tau majadi topanggeniaka topomparasaya, sabana naria tau silakana nanoto nau daꞌapa nitangara, tapi silaka tau ntanina aga majadi manoto ane iꞌa ratangara.
25 Iwetu woꞌu pokainggu to nabelo nanoto mami nikita ntau. Tapi naupa daꞌa kaliu-liu nanoto nikita, pokainggu to nabelo daꞌa namala matetabuniaka liu. Etu kana ranjani ntau.