Pepatuduki ewa tau-tau najadi batua
6
Topomparasaya to najadi batua kana mombabila bo matundu ri jaꞌi madikana ala neꞌe sampe sanga Alatala bo pepatuduki to nakonona rasalaraka ntau.
2 Pade ane madika ira sambaꞌa topomparasaya, neꞌe ira mantuaꞌi mata iꞌa sabana iꞌa nosaongu pomparasaya ante ira. Tapi ira kana mantambai maraji mokarajaa sabana madika to nitulungi ira woꞌu topomparasaya to nipotowe ira.
Pokainggu guru-guru topodawa
Komi kana mompatuduki bo mompopatora ka todea topomparasaya pura-pura pepatuduki etu.
3 Ane maria tau mompatuduki pepatuduki ntanina pade iꞌa daꞌa nasituju ante pepatuduki to nakono nggari jaꞌi Pueta Yesus Kristus bo pepatuduki to nanggeni kita matuwu mantuki dota Alatala,
4 iꞌa etu nasombo. Daꞌa ninjanina nuapa-nuapa. Juꞌana tau nompowia iwetu aga nangelo saba bo nosinggarau ka batua nu tesa. Asele powiana etu iweꞌi: Tau nosipojuꞌa ka rara, ira nosipobali bo nosiuli sinjaꞌi, ira tunggai nosibata,
5 pade ira daꞌa nenonto nosinggarau. Nageromo pekiri ira pade mana ninjani ira pepatuduki to nakonona. Ira nompekiri mepue ka Alatala aga sangele jala mombarata kakalumana.
Kakalumana to nakonona
6 Kakonona nauntu mpuꞌumo tau to mepue ka Alatala ane iꞌa matuwu masana ante nuapa-nuapa to naria ri jaꞌina.
7 Sabana tempo kita niote daꞌa ria nuapa-nuapa nikenita riara dunia eꞌi, pade ane kita mamate daꞌa ria nuapa-nuapa mamala rakenita nggari dunia eꞌi.
8 Jadi ane mariamo panggoni bo pakeata, naganamo.
9 Tapi tau-tau to madota majadi makalumana kana mawela pesoba. Ira rasoko mpengele-ngele dota rara to najaꞌa bo nadoyo to mombagero katuwu ira. Dota rara etu mompakanawu ira pade manggeni ira rapandasa sampe ri kasae-saena,
10 sabana puꞌu nu pura-pura kajaꞌana etumo nompotowe doi. Naria bara sakuya mbaꞌa tau aga nombaraga doi sampe nompalasi pomparasaya ira ka i Pue Yesus pade nompandasa koro ira mboto ante mpengaya-ngaya kasusana.
Tewai Paulus ka Timotius mboto
11 Tapi komi, batua nu Alatala, pakakawaomo nggari pokainggu iwetu. Pasimbukumo mowia to nanoana pade matuwu nantuki dota Alatala. Komi kana mantambai momparasaya, potowemo sanggamanusiamu, pakaroo raramu momparasaya tempo nipandasa pade moinggu malusu.
12 Pasimbukumo mantuki posilumba riara pomparasaya ante mabelo. Pasimbukumo mombarata katuwua mabelo sampe ri kasae-saena, sabana etumo patuju Alatala nompokio komi tempo komi nompangaku i Pue Yesus ri ngayo ntodea bopia.
13 Ri ngayo Alatala, puꞌu katuwua pura-pura anu natuwu, bo Yesus Kristus to nompangaku tesa to nakonona ri ngayo Pontius Pilatus, aku mantewai komi iweꞌi:
14 Tukimo parenta-parentaku eꞌi ante pokainggu to nagasa to daꞌa namala rasalaraka ntau sampe Pueta Yesus Kristus marata bali ri dunia eꞌi.
15 Iꞌa kana marata ri tempo to nipakatantu Alatala. Iꞌamo to neliu nggabelo katuwuna. Aga Iꞌamo topoparenta langi bo dunia. Iꞌamo Magau nu pura-pura magau, Iꞌamo Pue nu pura-pura pue.
16 Aga Iꞌa njambaꞌana lau to daꞌa namate. Iꞌa natuwu riara reme to daꞌa namala rapakamosu. Daꞌa ria kamba sambaꞌa tau to nanggita Iꞌa, pade daꞌa woꞌu naria to nompakule manggita Iꞌa. Perapi Iꞌa rabila bo makuasa sampe ri kasae-saena. Amin!
Pepatuduki ka tau nakalumana
17 Tewaimo ka tau-tau nakalumana ri dunia eꞌi ala neꞌe majadi masombo bo neꞌe aga manjarumaka kakalumana ira to daꞌa naroo. Tapi ira kana manjarumaka Alatala to nompakagana ka kita mpengele-ngele ante najoi rarana ala etu rapodamba-dambata.
18 Tewaimo ka ira, kana moinggu mabelo bo masugi ante pokainggu to nabelona. Ira kana majoi rara bo masadia mombabagi ka tau ntanina nuapa-nuapa to naria ri jaꞌi ira.
19 Ante iwetu ira mompasiromu kakalumana to majadi panjarumaka ira to nabelona ri tempo marata ala ira mpuꞌu-mpuꞌu mombarata katuwua mabelo sampe ri kasae-saena.
Popatora bo petabe kaopuna
20 Timotius, jagaimo mpakabelo-belo nuapa to niparasaya ka komi. Pakakawaomo nggari tesa-tesa njilaka to daꞌa ria gunana. Pade pakakawaomo nggari posisono-sono to nopuꞌu nggari tesa to niuli ntau pangginjani to nakono tapi kakonona aga tesa dawa.
21 Naria mamimo tau to nanguli naria pangginjani etu ri jaꞌi ira sampe nasalanjalamo nggari pomparasaya to nakonona.
Perapi Pue mombagane komi.
Tabe nggari jaꞌiku,
Paulus