Timotius kana maroo mantui bagona ewa topanggeni Kareba Belo
4
Toramo! Yesus Kristus kana marata bali ri dunia eꞌi mombatangara pura-pura manusia, nabeloka to danatuwu, nabeloka to namatemo. Pade Iꞌa kana moparenta ri dunia eꞌi ewa magau. Sabana etu, riara sanga Alatala bo Yesus Kristus aku mantewai komi iweꞌi:
2 Patolelemo Tesa nu Alatala. Komi kana masadia ri butu-butu loga, nabeloka loga nabelo atau daꞌa. Pakanoto ka tau pokainggu ira to nasalana, ontiakamo to nompowia sala, pade waimo tesa to nabelo ka ira pura-pura. Patudukimo ira mpakabelo-belo ante maponu posabara.
3 Sabana kana marata tempona banepia tau mana madota mangepe pepatuduki to nakonona. Tapi ira aga mompasiromu guru-guru to mompaguru pepatuduki to rapokono talinga ira, ala ira mamala mangepe pepatuduki to nasituju ante dota rara ira mboto to najaꞌana.
4 Ira mombalamu talinga ira ala neꞌe mangepe pepatuduki Alatala to nakonona, pade ira aga mantaꞌa talinga ira mangepe tesa-tesa kabali to nipetowali manusia.
5 Tapi Timotius, jagaimo koromu mpakabelo-belo nau nuapa majadi. Pakaroo raramu tempo rapandasa. Tuimo bagomu ewa topanggeni Kareba Belo, pade pajala puramo bago to niparasaya Alatala ka komi.
6 Aku nanguli iwetu sabana mana masaeka aku mamate majadi pesomba ka Alatala. Sampalaipa aku mompalasi dunia eꞌi.
7 Nitukikumo posilumba nangowa to nabelona. Nangowamo aku sampe ri pantaꞌana. Aku batena natutu nomparasaya sampe ri kaopuna.
8 Jadi weꞌi-weꞌi nasadiamo hadia padagi ka aku to rawai i Pue ka tau to nanoana. Ri kaopu nu dunia i Pue Yesus mboto, Topotangara to nanoana, kana mombawai hadia etu ka aku, pade daꞌa aga ka aku tapi ka isema-sema to nalentora mpuꞌu mompopea karatana.
Tewai-tewai kaopuna
9 Pasimbukumo masalisa marata ri jaꞌiku ri seꞌi,
10 sabana i Demas nompalasi aku, apa iꞌa aga nompotowe katuwuna ri dunia weꞌi-weꞌi. Nalaimo iꞌa mpaka ri ngata Tesalonika. Pade i Kreskes nalau mpaka ri Propinsi Galatia, bo i Titus mpaka ri Bagia Dalmatia.
11 Aga i Lukas to naria ri jaꞌiku ri seꞌi. Ane komi momai tulusaka woꞌu i Markus mpaka wemai, sabana iꞌa mamala mantulungi bagoku ri seꞌi.
12 Pade i Tikhikus nipakaukumo mpaka ri ngata Efesus.
13 Ane komi momai ri seꞌi, keni woꞌu baju leniku to niboliku ri ngata Troas ri sapo i Karpus. Pade keni woꞌu buku-bukuku, neliupa buku-buku to nikawia nggari kulimba.
14 Aleksander, pande nu tambaga etu, nadea jaꞌana nipowiana ri jaꞌiku. Pue kana mombabalasi iꞌa nantuki pokaingguna etu.
15 Komi mboto kana mainga ka iꞌa sabana iꞌa mpuꞌu-mpuꞌu nangewa pepatudukita.
16 Tempo aku pamulana nitangara, daꞌa ria kamba sambaꞌa nomporoa aku; pura-pura roaku nompalasi aku. Perapi Pue daꞌa mompakasala ira sabana powia ira etu.
17 Tapi i Pue nomporoa aku, bo Iꞌa nompakaroso aku ala aku nompakule nompatolele pura-pura Kareba Belo sampe niepe pura-pura tau daꞌa to Yahudi. Kaopuna aku daꞌa najadi nipatesi.
18 Pade niparasayaku i Pue kana manggabasaka aku nggari pura-pura powia ntau to najaꞌa pade manggeni aku ante masalama mesua ri Poparentana ri suruga. Iꞌa masipato rabila bo ratoiya sampe ri kasae-saena. Amin!
Petabe kaopuna
19 Pakasampe tabeku ka i Priskila bo Akwila, pade ka ira Onesiforus sanjapo.
20 Erastus naboli ri ngata Korintus bo i Trofimus nipalasiku ri ngata Miletus sabana iꞌa najuꞌa.
21 Pasimbukumo momai ri seꞌi daꞌapa tempo leni.
Nadea tabe nggari jaꞌi Ebulus, i Pudes, i Linus bo i Klaudia, pade nggari jaꞌi pura-pura topomparasaya i Pue Yesus ntanina ri seꞌi.
22 Perapi Pue mosanggani-nggani ante komi. Perapi Iꞌa mombagane komi pura-pura.
Tabe nggari jaꞌiku,
Paulus