Popatora Paulus ka Timotius
2
Jadi Timotius, anaku, komi kana maroso ante petulungi to niwai Yesus Kristus ka kita.
2 Pade pepatuduki to niepemu nggari jaꞌiku ri ngayo ntau dea kana muparasaya ka tau-tau to namala raparasaya bo to nompakule mompatuduki tau ntanina.
3 Ewa tantara Yesus Kristus to nabelona komi woꞌu kana mantingayo kasusana.
4 Toramo! Sambaꞌa tantara to nompajala bagona daꞌa natekaꞌi ante urusa-urusa ntanina ala iꞌa mamala mompakadamba rara balenggana.
5 Komi kana masimbayu ewa sambaꞌa topomore. Iꞌa daꞌa mamala mombarata hadia padagi ane iꞌa daꞌa mantuki atura-atura to nipakatantu.
6 Komi kana masimbayu woꞌu ewa topotinalu to nokarajaa ntomo. Iꞌamo tau pamulana to masipato mantarima asele ntinalu etu.
7 Pekirimo mpakabelo-belo tesaku eꞌi pade i Pue kana mantulungi komi mangginjani etu pura-pura ante manoto.
8 Toramo! Yesus Kristus najadi Muli Magau Daud, pade Iꞌa namate natuwu bali ewa to nitesa riara Kareba Belo to nipatoleleku.
9 Aku eꞌi nipandasa sabana nompatolele Kareba Belo etu. Aku nisoꞌo ante rante nasimbayu ewa tau najaꞌa. Tapi Tesa nu Alatala daꞌa namala rarante, etu kana matolele ri umba-umba.
10 Etumo sabana aku naroo riara mpengele-ngele kasusana ala tau-tau to nipelisi Alatala mamala rapakasalama ante momparasaya Yesus Kristus sampe ira mombarata bagia nggari kuasa bo reme i Pue sampe ri kasae-saena.
11 Nakono mpuꞌu tesa to nanguli iweꞌi:
“Ane kita mamate mpasanggani-nggani ante Iꞌa,
kita woꞌu matuwu mpasanggani-nggani ante Iꞌa.
12 Ane kita maroo momparasaya,
kita kana moparenta mpasanggani-nggani ante Iꞌa.
Ane kita mombasapu Iꞌa,
Iꞌa woꞌu mombasapu kita.
13 Ane kita daꞌa mamala raparasaya,
Iꞌa batena namala raparasaya,
sabana Iꞌa daꞌa namala manjapuaka korona mboto.”
Pokainggu to masipato mantingayo pepatuduki to nasala
14 Popatoramo ka topomparasaya pura-pura tesaku etu. Pade tewaimo ka ira riara sanga Alatala ala neꞌe ira mosinggarau ka batuana tesa-tesa. Etu daꞌa ria gunana pade aga nompakagado rara ntau to nangepe etu.
15 Pasimbukumo majadi tau to nikonoa rara nu Alatala ewa sambaꞌa topokarajaa to daꞌa paraluu maeya matana mantora asele mpokarajaana. Patudukimo Tesa nu Alatala to nakono ante manoa.
16 Pakakawaomo nggari tesa-tesa njilaka to daꞌa ria gunana, sabana tesa-tesa ewa etu aga nanggeni tau mantambai nasilaka.
17 Tesa-tesa etu nendai nasimbayu ewa juꞌa bete to najaꞌana. Rombaꞌa tau to noinggu iwetu etumo i Himeneus bo i Filetus.
18 Ira nompalasi pepatuduki to nakonona ante nanguli naopumo Alatala nompakatuwu bali pura-pura tau to namatena. Pepatuduki ira etu nompakagado pomparasaya bara sakuya mbaꞌa tau.
19 Tapi naupa iwetu, pepatuduki Alatala to nakonona batena naroso nasimbayu ewa pondasi to daꞌa namala ragoya nuapa-nuapa. Riara pepatuduki etu naria nitulisi iweꞌi: “Pue nangginjani isema-sema to najadi todeana.” Pade naria tesa ntanina ri setu to nanguli, “Isema-sema to nanguli iꞌa topomparasaya i Pue Yesus, iꞌa kana manggabasaka pokaingguna to najaꞌana.”
20 Riara njapo to nabetena naria mpengele-ngele parewa ri awu. Naria to nipowia nggari bulawa bo salaka, tapi naria woꞌu to nipowia nggari kayu bo tana lei. Parewa bulawa bo salaka etu nipake mantande torata to nibila, tapi parewa ntanina etu nipake eo-eo.
21 Jadi ane tau manggabasaka pura-pura pokainggu to najaꞌana, iꞌa masipato rapake i Pue, nasimbayu ewa parewa bulawa bo salaka to neliu nggabelona etu. Iꞌa nipegasa nggari silakana ala moguna ka Puena. Iꞌa nasadia rapake mompowia mpengele-ngele bago to nabelona.
22 Jadi pakakawaomo nggari pokainggu najaꞌa to nipodamba ngana-ngana muda. Tapi pasimbukumo matuwu ante manoa rara. Parasayamo pepatuduki to nakonona ante natutu rara; potowemo Alatala bo sanggamanusiamu, pade pasimbukumo mosinggabelo ante pura-pura tau to nekakai ka i Pue ante rara to nagasa.
23 Pakakawaomo nggari jaꞌi ntau to nadoyo to nekutana anu daꞌa ria gunana. Ninjanimu mboto etu aga majadi posinggarau.
24 Tapi sambaꞌa batua i Pue daꞌa masipato mosinggarau. Iꞌa kana malusu rara ri jaꞌi ntau pura-pura. Iꞌa kana mompakule mompatuduki ante mabelo, pade iꞌa woꞌu kana mosabara.
25 Ante maede rara iꞌa kana mompatuduki tau-tau to nangewa iꞌa, ala ane mamala ira rakeni Alatala majea nggari pokainggu ira to nasala pade mangginjani pepatuduki to nakonona.
26 Ante iwetu ira majadi manoto bali pade ira makabasaka nggari kuasa Magau nu Seta to nombabagiu bo nompasuꞌu ira mantuki dotana.