SURA PAULUS KARONGGANINA KA
TIMOTIUS
Petabe
1
1-2 Sura eꞌi nggari jaꞌiku i Paulus, ka i Timotius, anaku to nipotoweku. Aku nisuro Yesus Kristus nantuki dota Alatala ala mompatolele pojanji Alatala to nanguli isema-sema nomparasaya Yesus Kristus kana matuwu mabelo sampe ri kasae-saena. Perapi Pue Alatala bo Pueta Yesus Kristus mombagane komi bo maasi mata ri jaꞌi komi bo mombawai katuwua mabelo ka komi.
Timotius kana maroo mantui bago to nipakau Alatala ka iꞌa
3 Aku nosukuru ri jaꞌi Pue Alatala to nipesombaku ante rara ntaꞌi to nagasa nasimbayu ewa totuꞌaku nggaolu. Eo wengi aku nantora komi riara posambayaku.
4 Tempo aku nantora kasusa rara komi tempo kita nogaꞌa bopia, nalentora mpuꞌu raraku manggita komi ala aku mpuꞌu-mpuꞌu madamba.
5 Aku nosukuru ri jaꞌi Alatala sabana natitora raraku iwenu komi mpuꞌu-mpuꞌu nomparasaya i Pue Yesus nasimbayu ewa i Lois, puemu besi bo indomu Eunike. Pade niparasayaku komi batena nomparasaya nasimbayu ewa ira.
6 Sabana etu aku nompopatora ka komi, kana ratambai rapopoguna pompakule to niwai Alatala ka komi tempo aku nombadika paleku ri koromu bopia. Neꞌe maeka mompopoguna pompakule etu,
7 sabana Nosa Nagasa to nipopanaꞌu Alatala ka kita daꞌa nanggeni kita maeka, tapi Iꞌa nombawai baraka bo towe bo kuasa mantaꞌamaka korota mboto.
8 Sabana etu neꞌe maeya matamu mompatolele tesa i Pueta, pade neꞌe woꞌu maeya matamu mompekiri aku to nitarunggu sabana aku topomparasaya Iꞌa. Tapi ante kuasa nggari jaꞌi Alatala mboto komi woꞌu kana mantingayo kasusa nasimbayu ewa aku sabana mompatolele Kareba Belo.
9 Alatala nompakasalama kita bo nompokio kita matuwu magasa daꞌa sabana powiata to nabelona, tapi etu najadi nggari dota rarana mboto bo towe belona ka kita. Ri lamba pamulana daꞌapa dunia nipajadi, nipakatantunamo mompopokita towe belona etu ka kita to mosaongu rara ante Yesus Kristus.
10 Pade weꞌi-weꞌi towe belona etu nipopokitanamo ante karata Yesus Kristus, Magau to Mompakasalama kita. Pue Yesus nompakaropu kuasa kamatea, pade Iꞌa nompatolele Kareba Belo ka kita to nompakanoto iwenu manusia mamala matuwu mabelo sampe ri kasae-saena.
11 Aku mboto nionggotaka Alatala majadi surona ala mompatolele bo mompatuduki Kareba Belo etu.
12 Etumo sabana aku nombarasai pura-pura kasusa ewa eꞌi. Tapi naupa iwetu daꞌa naeya mataku, sabana ninjanikumo isema to niparasayaku, pade natantumo ka aku Iꞌa nompakule mombajagai nuapa to niparasayana ka aku sampe ri kaopu nu dunia.
13 Pasialamo jonjoku mompatuduki pepatuduki to nakonona to niepemu nggari jaꞌiku, pade kawiamo etu ante towe bo pomparasaya to naria ri jaꞌita sabana kita mosaongu rara ante Yesus Kristus.
14 Pade ante petulungi Nosa Nagasa nu Alatala to naria riara ntaꞌita, jagaimo pepatuduki to nakonona to niparasaya ka komi ala etu neꞌe rabali ntau.
15 Ninjanimu pura-pura topomparasaya nggari Propinsi Asia nompalasi aku. Rombaꞌa nggari tatongo ira etumo i Figelus bo i Hermogenes.
16 Tapi perapi Pue Alatala maasi mata ri jaꞌi ira Onesiforus sanjapo, sabana nadea ngganimo iꞌa narata nompakadamba raraku. Daꞌa naeya matana nanggita aku riara tarunggu.
17 Iwetu iꞌa narata ri ngata Roma iꞌa nangelo-ngelo aku sampe niratana.
18 Ninjanimu mboto ri ngata Efesus bopia nadea mpuꞌu petulungina ka aku. Perapi Pue maasi matana manggita Onesiforus tempo kaopu nu dunia.