Saulus najea pade nomparasaya i Pue Yesus
9
Ri tempo etu woꞌu i Saulus bate-batena nadota mompararai pade mompatesi topomparasaya-topomparasaya i Pue Yesus. Nalaumo iꞌa ri jaꞌi Balengga Topanggeni Agama Yahudi,
2 pade nerapi sura kuasa rakenina ka topanggeniaka-topanggeniaka sapo-sapo mpodade nto Yahudi ri ngata Damsyik. Patujuna ane raposintomuna ri setu ngina tau-tau to nantuki Pepatuduki Yesus, rasokona tau-tau etu rakenina ira mpaka ri ngata Yerusalem ala ratangara, nabeloka langgai, nabeloka besi.
3 Riara mpolumakona mpaka ri ngata Damsyik tempo namosumo iꞌa ri ngata, sampegoli naria saongu reme newanta nggari langi nantatiku iꞌa.
4 Nadunggamo iꞌa pade niepena suara nanguli ka iꞌa, “Saulus, Saulus! Nuapa sabana iko nompandasa Aku?”
5 Nekutanamo i Saulus, “Isema Komi, Pue?”
Nesonomo suara etu, “Akumo Yesus to nipandasamu.
6 Weꞌi-weꞌi pekanggoremo iko pesuamo riara ngata eꞌi. Ri setu pade rauli ka iko nuapa masipato mupowia.”
7 Tau-tau to nosanggani ante i Saulus etu, natekaja mpuꞌu ira sampe daꞌa nasowa notesa, sabana ira woꞌu nangepe suara etu, tapi daꞌa nikita ira tau topotesa etu.
8 Naopu etu nekanggoremo i Saulus, niboarakana matana, tapi matana mana nanoto nanggita nuapa-nuapa. Jadi iꞌa damo ninini roana nesua ri ngata Damsyik.
9 Tolumbengi kasaena iꞌa daꞌa namala nekita pade iꞌa daꞌa nanggoni bara nanginu nuapa-nuapa.
10 Ri ngata Damsyik naria sambaꞌa topomparasaya i Pue Yesus to nosanga ka Ananias. Riara saongu panggitana Pue notesa ka iꞌa. Niuli Pue, “Ananias!”
Nesono Ananias, “Iyo, eꞌimo aku, Pue.”
11 Notesamo Pue, “Kalaumo weꞌi-weꞌi mpaka ri sapo Yudas ri jala to nosanga ka Jala Nanoa. Elomo ri setu sambaꞌa tau nggari ngata Tarsus to nosanga ka i Saulus. Weꞌi-weꞌi iꞌa nosambaya
12 pade riara panggitana nikitana iko narata ri jaꞌina nombadika palemu ri balenggana ala iꞌa mamala mekita bali.”
13 Nesonomo Ananias, “Pue, nadea tesa niepeku nggari jaꞌi ntau nantesa i Saulus etu. Niuli ira nadea mpuꞌu topomparasaya i Pue ri ngata Yerusalem nipandasana.
14 Pade weꞌi-weꞌi iꞌa nomai ri seꞌi ante kuasa nggari jaꞌi balengga-balengga topanggeni agama Yahudi ala manjoko pura-pura tau nomparasaya Komi, Pue.”
15 Tapi nangulimo i Pue, “Iko kana malau! Sabana iꞌa nipelisiku malau mompatolele sangaku ka tau-tau daꞌa to Yahudi, ka magau-magau pade ka tau-tau Yahudi woꞌu.
16 Damo Aku mboto ngina mompakanoto ka iꞌa kasusa to raratana sabana iꞌa mantuki Aku.”
17 Jadi nalaumo Ananias mpaka ri sapo Yudas ri Jala Nanoa etu. Pade nesuamo iꞌa nombadika palena ri balengga i Saulus, pade niulina, “Sampesuwuku, Saulus. Pue Yesus to nikitamu ri tatongo jala tempo komi mpaka wemai, nompakau aku marata ri seꞌi ala komi mamala mekita bali pade rapesua Nosa Nagasa nu Alatala.”
18 Kaliu-liu ewa ruke nu bau nanawu nggari mata i Saulus sampe namala iꞌa nekita bali. Naopu etu nembangumo i Saulus pade iꞌa nidiu ewa tandaina iꞌa topomparasaya i Pue Yesus.
19 Naopu nidiu nanggonimo iꞌa pade naroso bali wukuna.
Saulus nompatolele Kareba Belo ri ngata Damsyik
Naopu etu i Saulus netoꞌo ante topomparasaya-topomparasaya i Pue Yesus ri ngata Damsyik bara sakuya mbengi kasaena.
20 Tempo etu woꞌu, iꞌa kaliu-liu nalau ri sapo-sapo mpodade ri Damsyik nompatolele kareba ka tau-tau to Yahudi to nanguli, “Yesus, Iꞌamo Ana nu Alatala!”
21 Nogumaa puramo tau nangepe i Saulus. Ira nanguli, “Iwenu sanga tau eꞌi? Iꞌamo tau to nompatesi tau-tau nomparasaya Yesus ri ngata Yerusalem bopia. Tantu iꞌa woꞌu narata wemai ante patujuna mombasoko ira to nomparasaya Yesus ri seꞌi pade manggeni ira ratangara ri jaꞌi balengga-balengga topanggeni agama Yahudi!”
22 Tapi nantambai eona nantambaimo kuasa i Saulus nompatolele kareba i Pue Yesus. Iꞌa mpuꞌu-mpuꞌu nompakanoto ka tau-tau to Yahudi ri ngata Damsyik Yesus Magau to Mompakasalama to nijanji Alatala, sampe mana namala ira mombabali tesana.
23 Naliu bara sakuya mbengi nggari setu, nasiromumo tau-tau to Yahudi nosintuwu mompatesi i Saulus.
24 Eo wengi ira nanggatono bobaa tembo ri ngata etu ala ane i Saulus mesuwu iꞌa mamala rapatesi ira. Tapi nia ira etu ninjani i Saulusmo.
25 Jadi naria sambengi topantuki-topantuki i Saulus nombarata akala ala iꞌa mamala malai nggari jaꞌi ntau to madota mompatesi iꞌa. Saulus niala nidika ira riara karanji lauro, pade niulunjaka ira nggari bunggu nu tembo ngata etu mpaka ri sawalikuna.
Saulus ri ngata Yerusalem
26 Nggari setu nalaumo i Saulus mpaka ri ngata Yerusalem. Ri setu iꞌa nompasimbuku nompasanggani ante topomparasaya-topomparasaya i Pue Yesus. Tapi naeka ira nanggita i Saulus. Daꞌapa niparasaya ira iꞌa etu mpuꞌu-mpuꞌu topomparasaya i Pue Yesus.
27 Tapi i Barnabas nalau nomporoa i Saulus pade nanggeni iꞌa ri jaꞌi suro-suro i Pue Yesus. Nitesana ka ira iwenu i Saulus nanggita i Pue Yesus ri tatongo jala, pade iwenu i Pue notesa ka iꞌa. Nitesana woꞌu ka ira iwenu i Saulus notesa ante kabiana nompatolele Kareba i Pue Yesus ka tau-tau ri ngata Damsyik.
28 Nangepe tesa etu, suro-suro nantarima i Saulus netoꞌo mpasanggani-nggani ante ira. Pade nalaumo i Saulus ri umba-umba ri ngata Yerusalem nompatolele Kareba i Pue Yesus ante kabiana.
29 Iꞌa woꞌu notesa bo nosisono ka tau-tau to Yahudi to nobasa Yunani. Tapi ira etu nompasimbuku mompatesi iꞌa.
30 Tempo topomparasaya nangginjani etu ira nanggeni i Saulus notua mpaka ri ngata Kaisarea pade iꞌa nipakau ira nanjili mpaka ri ngata Tarsus, ngatana mboto.
31 Jadi topomparasaya i Pue Yesus ri njumaongu Bagia Yudea, Galilea pade Samaria mana nipandasa. Nantambai eona nantambai kadea ntau to nomparasaya i Pue Yesus, pade nantambai karoso pomparasaya ira. Etu najadi sabana ira nekou ri jaꞌi Pue pade nggari petulungi Nosa Nagasa ka ira.
Petrus nompakabelo juꞌa Eneas
32 Tempo etu i Petrus nalau ri umba-umba nanggita topomparasaya i Pue Yesus. Naria sanggani iꞌa nesai ri ngata Lida.
33 Ri setu iꞌa nosintomu ante sambaꞌa langgai nosanga ka Eneas. Walumpaemo kasaena iꞌa napunggu, pade mana ntoto namala nembangu nggari paturuna.
34 Nangulimo i Petrus ka iꞌa, “Eneas, Yesus Kristus mompakabelo iko. Pembangumo, pasiayumo ompa paturumu eꞌi.” Kaliu-liu nabelomo Eneas pade nembangumo iꞌa.
35 Pura-pura tau to netoꞌo ri ngata Lida bo Bagia Saron nanggita Eneas nabelomo. Pade ira pura-pura nomparasaya i Pue Yesus.
Petrus nompakatuwu bali Dorkas nggari kamatena
36 Ri ngata Yope naria sambaꞌa besi to nomparasaya i Pue Yesus, sangana i Tabita. Ante Basa Yunani sangana i Dorkas, batuana “rusa.” Pokaingguna nabelo pura, pade iꞌa tunggai nantulungi tau-tau napakasi katuwuna.
37 Tempo etu najuꞌamo iꞌa sampe namate. Sangga watabakuna naopu nidiu iꞌa nikeni niboli riara ntombi kalangana.
38 Ngata Yope daꞌa nakawaoka nggari ngata Lida. Etu sampe topomparasaya i Pue Yesus ri ngata Yope nangepe i Petrus naria ri ngata Lida. Jadi ira nompakau rombaꞌa tau nalau ri jaꞌi Petrus ante nitewai iweꞌi: “Kamai masalisa mpaka ri ngata Yope.”
39 Sangga nangepe tesa ntau rombaꞌa etu, nalaumo i Petrus nantuki ira mpaka ri ngata Yope. Narata ri setu iꞌa nikeni mpaka ri tombi kalangana etu. Pura-pura tobalu besi notumangi nantaguni i Petrus ante nompopokita ka iꞌa baju-baju pade pakea to nijau i Tabita ka ira tempo iꞌa danatuwu.
40 Naopu etu i Petrus nompakau ira pura-pura nesuwu, pade notimbakotumo iꞌa nosambaya. Naopu etu iꞌa nantingayo watabaku i Tabita pade niulina, “Tabita, pembangumo!” Tabita nombaboaraka matana pade tempo iꞌa nanggita i Petrus nembangumo iꞌa pade nekatoko.
41 Pade i Petrus nanjoko palena nantulungi iꞌa nekanggore. Naopu etu i Petrus nompokio topomparasaya ri setu nosanggani-nggani ante tobalu-tobalu besi paneꞌa, pade nipopokitana ka ira i Tabita natuwu bali.
42 Kareba ewa kajadia etu natolele ri njumaongu ngata Yope, sampe nadea mpuꞌu tau nomparasaya i Pue Yesus.
43 Petrus netoꞌo ri ngata Yope etu bara sakuya mbengipa ri sapo sambaꞌa tau topokarajaa kulimba to nosanga ka i Simon.