8
1-2 Tempo i Stefanus nipatesi nasituju woꞌu i Saulus. Naopu etu tau-tau to naeka ri jaꞌi Alatala nombatana i Stefanus ri dayo. Ante nasusa mpuꞌu rara ira nombatangi iꞌa.
Saulus nompandasa topomparasaya i Pue Yesus
Nompamula eo etu woꞌu topomparasaya i Pue Yesus ri ngata Yerusalem mpuꞌu-mpuꞌu nipandasa to Yahudi sampe ira nagaro nosimpotatare mpaka ri umba-umba ri tana Yudea ante Samaria. Aga suro-suro i Pue Yesus daꞌa.
3 Tapi i Saulus nompasimbuku mompakaropu topomparasaya i Pue Yesus etu. Butu-butu sapo ira nipesuana pade isema-sema to nomparasaya i Pue Yesus, nabeloka langgai, nabeloka besi, niumbunjaina ri sawalikuna pade nisuarakana riara tarunggu.
Kareba Belo nipatolele ri Tana Samaria
4 Topomparasaya i Pue Yesus to nagaro nosimpotatare etu nompatolele kareba i Pue Yesus mpaka ri umba-umba.
5 Sambaꞌa nggari jaꞌi ira nosanga ka i Filipus. Iꞌa nalau ri ngata Samaria pade nipatolelena ka tau-tau ri setu tesa Magau to Mompakasalama to nijanji Alatala.
6-7 Nadea tau to nipesua seta nipakabelona. Seta-seta etu nesuwu ante nongare-ngare. Pade nadea tau napunggu pade tau nakejo woꞌu nipakabelona. Tempo tau-tau nangepe tesa i Filipus pade nanggita kabaraka-kabaraka to nikawiana, ira ante nosaongu rara nompariara ntaꞌi pade nantarima nuapa to nitesa i Filipus.
8 Jadi nadamba mpuꞌumo rara tau-tau ri ngata Samaria etu.
9 Riara ngata etu naria sambaꞌa sando nosanga ka i Simon. Bara sakuya kasaena iꞌa nompowia tau-tau ri ngata Samaria natekaja ante panggawiana. Pade iꞌa nanguli ka tau iꞌa sambaꞌa tau nabaraka.
10 Pura-pura tau riara ngata etu, nabeloka totuꞌa-totuꞌa, nabeloka ngana-ngana, nompariara ntaꞌi tesana. Ira nanguli, “Tau eꞌimo naria kuasa nggari jaꞌi Alatala to niuli Kuasa Bete!”
11 Ira pura-pura nantuki iꞌa apa nasaemo iꞌa nipogumaa ira sabana nggari kasandona etu.
12 Tapi weꞌi-weꞌi niparasaya iramo tesa i Filipus to nompatolele ka ira Kareba Belo ewa Poparenta nu Alatala pade woꞌu ewa Yesus Kristus, Magau to Mompakasalama to nijanji Alatala. Naopu ira nomparasaya, ira nidiu ewa tandaina ira topomparasaya i Pue Yesus, nabeloka langgai, nabeloka besi.
13 Simon mboto woꞌu nomparasayamo, pade naopu iꞌa nidiu nalaumo iꞌa mpasanggani-nggani ante i Filipus. Nogumaa mpuꞌu iꞌa nanggita kabaraka-kabaraka ante tandai-tandai to nipogumaa to nikawia i Filipus.
14 Suro-suro ri ngata Yerusalem nangepe kareba tau-tau ri ngata Samaria nantarima Tesa nu Alatala. Jadi ira nompakau i Petrus bo Yohanes mpaka gusaꞌa.
15 Tempo ira rombaꞌa narata ri setu, ira nosambaya ka tau-tau to Samaria etu ala ira rapesua Nosa Nagasa nu Alatala.
16 Nikawia ira iwetu sabana Nosa Nagasa nu Alatala daꞌapa nanaꞌu nesua ri jaꞌi to Samaria to nomparasaya. Ira aga nidiu ante nanguli sanga i Pue Yesus.
17 Pade i Petrus bo Yohanes nombadika pale ira ri balengga tau-tau to Samaria etu, pade ira nipesua Nosa Nagasa nu Alatala.
18 Nikita i Simon Nosa Nagasa nu Alatala nesua ri jaꞌi ntau tempo suro-suro nombadika pale ri balengga ira. Jadi nikenina doi ka i Petrus bo Yohanes madota mangoli baraka etu.
19 Niulina, “Wai ka aku woꞌu sanu baraka komi etu ala ane aku woꞌu mombadika paleku ri balengga ntau ira woꞌu mamala rapesua Nosa Nagasa nu Alatala.”
20 Tapi nesonomo i Petrus, “Masurukawu mpuꞌu iko ante doimu sabana nipekirimu baraka to niwai Alatala mamala raoli ante doi!
21 Iko daꞌa ntoto masipato metuki riara panggawia kami eꞌi, sabana raramu daꞌa nanoa ri jaꞌi Alatala.
22-23 Ninjaniku iko etu naponu ante siriati raramu pade iko nipobatua to najaꞌana! Sabana etu kabasakamo patujumu to najaꞌana etu, pade perapimo ka i Pue, ala Iꞌa mombaampungi pompekirimu to najaꞌana etu.”
24 Pade nanguli i Simon, “Ai! Tulungi posambaya komi ka aku, perapi ka i Pue ala neꞌe maria sangaya to niuli komi etu madupa ri jaꞌiku.”
25 Sangga naopu i Petrus bo Yohanes notesa nompakanoto ka tau isema Yesus pade nompatolele tesa i Pue ka ira, nanjilimo ira mpaka ri ngata Yerusalem. Pade riara mpolumako etu ira nompatolele Kareba Belo ri nadea ngata nto Samaria.
Filipus ante sambaꞌa pangga bete nggari Tana Etiopia
26 Pade naria sambaꞌa malaeka narata nanguli ka i Filipus, “Kalaumo iko ri sabingga puluna ri pogaꞌa jala motua nggari ngata Yerusalem mpaka ri ngata Gaza.” Jala etu nakalinoa.
27-28 Jadi nalaumo i Filipus. Tempona etu naria sambaꞌa tau Etiopia nanjili nggari ngata Yerusalem. Iꞌa sambaꞌa pangga bete nipakakuasa nombaurusi mbara-mbara Magau Besi Etiopia. Magau Besi etu nosanga ka i Kandake. Pangga bete etu dariara mpolumakona natingguli nombasomba Alatala nggari ngata Yerusalem. Tempo dokana nolumako iꞌa nekatoko nombabasa buku nabi Yesaya.
29 Pade nangulimo Nosa Nagasa ka i Filipus, “Kau polumako iko mompakamosu doka ntau etu.”
30 Jadi nangowamo i Filipus nompakamosu doka ntau etu. Niepena tau etu nombabasa buku nabi Yesaya. Pade nipekutanana iꞌa, “Tua, ninjani komi batuana nuapa nibasa komi etu?”
31 Nesonomo tau etu, “Iwenu aku mangginjani ane daꞌa ria tau mompakanoto batuana ka aku? Kamai pesawimo ri doka eꞌi, pekatokomo ri sinjoriku seꞌi.”
32 Iweꞌimo tesa-tesa to nibasa ntau etu,
“Iꞌa ewa bimba niumbu rakeni rasambale,
ewa saongu ana bimba daꞌa nombee ane wuluna ragari.
Iwetu woꞌu Iꞌa daꞌa ntoto notesa, nau aga sambela.
33 Iꞌa nisalai pade Iꞌa nitangara ante daꞌa naria kakonona.
Daꞌa ria mulina to mamala ratutura ntau,
sabana Iꞌa nipatesi, mana ria ri dunia eꞌi.” (Yes. 53:7-8)
34 Nangulimo pangga bete etu ka i Filipus, “Ane mamala, uli ka aku isema ntoto kakonona to niuli nabi Yesaya eꞌi tempo iꞌa notesaka tau nirapaka ewa bimba, korona mboto bara tau ntanina?”
35 Pade i Filipus nombatarangga etu ka iꞌa. Iꞌa nompamula nggari tesa-tesa to nibasa pangga bete etu pade nipasimbayuna ka iꞌa Kareba Belo i Pue Yesus.
36 Riara mpolumako etu naratamo ira ri saongu petoꞌo to naria ue. Nanguli pangga bete etu, “Kitamo! Etu naria ue. Mamala aku radiu komi weꞌi-weꞌi?” [
37 Nesonomo i Filipus, “Ane komi nomparasaya ante rara mpuꞌu-mpuꞌu, komi mamala radiu.”
Nangulimo pangga bete Etiopia etu, “Aku nomparasaya Yesus etu Ana nu Alatala!”]
38 Naopu etu nipakauna nompopetaꞌa dokana. Pade nanaꞌumo ira rombaꞌa nggari doka pade nalaumo ira riara ue. Pade pangga bete etu nidiu i Filipusmo ewa tandaina iꞌa topomparasaya i Pue Yesus.
39 Tempo ira nesore nggariara ue, Nosa Nagasa nu Alatala nangala i Filipus nggari setu. Iꞌa daꞌa mana nikita pangga bete nggari Etiopia etu. Pade ante nadamba mpuꞌu rarana pangga bete etu nompapola polumakona.
40 Ante daꞌa ninjani-njani i Filipus, nariamo iꞌa ri ngata Asdod. Pade napolamo iꞌa nompatolele Kareba Belo ka tau-tau ri pura-pura ngata sampe iꞌa narata ri ngata Kaisarea.