7
Pade nekutanamo Balengga Topanggeni Agama ka i Stefanus, “Iwenu? Nakono pura to niuli ntau etu?”
Tesa Stefanus ri ngayo Polibu Bete Agama
2 Nesonomo i Stefanus, “Uma-uma bo sampesuwu-sampesuwu pura-pura, epe ntani ruru tesaku eꞌi. Daꞌapa Abraham totuꞌata nggaolu nolinja mpaka ri ngata Haran, tempo iꞌa danetoꞌo ri tana Mesopotamia, naratamo Alatala to Neliu Nggakuasa ri jaꞌina nompopokita korona ka iꞌa.
3 Pade nangulimo Alatala ka iꞌa, ‘Palasimo ngatamu eꞌi pade pura-pura sampesuwumu. Kalaumo iko mpaka ri tana to kupopokita ka iko.’ a
4 Nangepe etu nalaimo Abraham nompalasi tana to Kasdim etu, pade nolinjamo iꞌa mpaka ri ngata Haran. Pade naopu kamate umana iꞌa nipakau Alatala molinja nggari setu mpaka ri tana Israel, tana to nipetoꞌota weꞌi-weꞌi.
5 Tempo etu daꞌa ria tana niwai Alatala ka Abraham majadi bagiana mpeliu-liu, nau aga sandanga daꞌa ntoto niwaina ka iꞌa. Tapi Alatala nojanji ka Abraham, tana eꞌi kana rawai ka Abraham mpeliu-liu sampe ri muli-mulina. Tempo Alatala nojanji etu, Abraham daꞌapa noana.
6 Tapi iweꞌimo tesa to niuli Alatala ka Abraham, ‘Mulimu kana metoꞌo mombasowo tau ri tana tau ntanina. Pue ngata etu kana mompobatua ira, pade mompandasa ira patatu mpae kasaena.
7 Tapi naopu etu tau to nompobatua ira kana kusuku. Pade mulimu kana mesuwu nggari tana etu, pade ira kana momai marata mepue ka Aku ri petoꞌo eꞌi.’ b
8 Naopu notesa iwetu, Alatala nompakaasa pojanjina ante Abraham ante nompowia ada mposuna. Jadi tempo Ishak ana Abraham nipoanaka, iꞌa nisuna Abraham tempo umuruna dawalumbengi. Waꞌa woꞌu Ishak nombasuna anana Yakub, pade Yakub woꞌu nombasuna anana sampulu rombaꞌa to najadi totuꞌa-totuꞌata to Yahudi.
9 Totuꞌa-totuꞌata nasiriati rara ka Yusuf, tuaꞌi ira etu, sampe iꞌa nipobalu ira ka tau to Masir. Iꞌa nipajadi batua tapi Alatala nomporoa iꞌa,
10 pade nanggabasaka iꞌa nggari pura-pura kasusana. Alatala nombawai ka iꞌa kapande to nompakadamba rara Firaun, Magau to Masir, sampe iꞌa nionggotaka Magau Masir majadi Gubernur nombaparenta tana Masir. Pade iꞌa woꞌu niwai ka kuasa nombaurusi pura-pura anu Firaun etu.
11 Naliu etu narata oromate ri tana Masir bo tana Kanaan, sampe pura-pura manusia ri setu nasusa mpuꞌu. Waꞌa woꞌu totuꞌa-totuꞌata, daꞌa mana naria panggoni ira.
12 Tapi sangga Yakub nangepe naria panggoni ri tana Masir, nipakauna anana, totuꞌa-totuꞌata etu, nalau mpaka ri tana Masir mangoli panggoni. Etumo tempo pamulana ira nalau ri tana Masir.
13 Tempo ira nalau karongganina, Yusuf nompopanjani ka sampesuwu-sampesuwuna etu, iꞌa etumo Yusuf. Lako etu pade ninjani Magau Masir ewa sampesuwu-sampesuwu Yusuf.
14-15 Naopu etu Yusuf nompakatu kareba ka umana Yakub nerapi ala umana ante pura-pura ira santina molinja metoꞌo ri tana Masir. Jadi nolinjamo Yakub ante ira pura-pura mpaka ri tana Masir. Kadea ira pura-pura to nolinja gusaꞌa pitumpulu bo limambaꞌa. Ri setu naliu bara sakuya mpae namatemo Yakub. Waꞌa woꞌu anana, totuꞌa-totuꞌata pura-pura.
16 Pade watabaku ira nikeni nilinja mpaka ri ngata Sikhem, pade nitana ri dayo to nioli Abraham nokolu ante doi salaka nggari jaꞌi sambaꞌa tau to Hemor ri Sikhem etu.
17 Tempo namosumo ntoana Alatala mompakadupa pojanjina ka Abraham, nantambaimo kadea ntau to Yahudi ri tana Masir.
18 Naliu etu nompamulamo sambaꞌa magau ntanina noparenta ri tana Masir to daꞌa mana nangginjani Yusuf.
19 Iꞌa nombabagiu totuꞌa-totuꞌata pade nompandasa ira pura-pura. Niparentana ala ngana-ngana langgai ira to lako nesuwuna kana raboli ri sawaliku ngata ala mamate.
20 Tempo etumo i Musa nesuwu. Iꞌa sambaꞌa ngana nggedi to mpuꞌu-mpuꞌu nagaya lenjena. Tolumbula kasaena iꞌa nikeniaka indo umana.
21 Pade tempo iꞌa mana namala nitabuniaka ntotuꞌana iꞌa nikeni niboli ri sawaliku ngata. Naria sambaꞌa besi ana Magau Firaun nanggita iꞌa pade nangala iꞌa pade nikeniakana ewa anana mboto.
22 Pura-pura pangginjani pade ada-ada to Masir nipatuduki ka iꞌa sampe nakuasa mpuꞌu iꞌa, nabeloka ri potesana, nabeloka ri powiana.
23 Tempo i Musa noumuru patampulu mpae nariamo dota rarana malau manggita sampesuwu-sampesuwuna to Israel.
24 Tempo iꞌa narata ri setu nikitana sambaꞌa tau to Yahudi nipandasa ntau to Masir. Pade nalaumo iꞌa nantulungi nanjaliku tau to nipandasa etu ante nompatesi tau to Masir etu.
25 Nipekiri i Musa sampesuwu-sampesuwuna to Yahudi etu kana mangginjani iꞌa etu to rapake Alatala mombakabasaka ira nggari pobatua to Masir. Tapi daꞌapa ninjani ira.
26 Tonailena nalau woꞌumo iꞌa pade nikitana rombaꞌa tau to Yahudi nosibaga. Iꞌa nompasimbuku nompoposinggabelo ira rombaꞌa etu. Niulina ka ira, ‘Umba komi! Nokuya komi mosibaga? Komi eꞌi nosampesuwu!’
27 Tapi tau to nombaboba roana etu nombajuanaka i Musa, pade niulina, ‘Iko daꞌa topanggeniaka bo topotangara kami!
28 Natantu iko etu madota mompatesi aku ewa iko nompatesi to Masir yowi!’
29 Sangga nangepe tesa ntau etu nalaimo i Musa nggari tana Masir nalau netoꞌo ri tana to Midian. Pade ri setu iꞌa norongo pade noana rombaꞌa ngana langgai.
30 Patampulu mpae kaliuna naratamo sambaꞌa malaeka ri jaꞌi Musa ri karawa baina namosu ri Bulu Sinai. Malaeka etu narata riara apu ri santungu gumbu najela.
31 Natekaja rara i Musa nanggita etu sampe iꞌa nalau nompakamosu apu etu ala mangginjani nuapa etu. Pade niepena suara i Pue nanguli,
32 ‘Aku eꞌimo Alatala to nipesomba totuꞌamu nggaolu, Alatala Abraham, Ishak bo Yakub.’ Nangepe etu naekamo rara i Musa sampe nokalalete. Daꞌa mana iꞌa nabia manggita gumbu najela etu.
33 Pade nanguli woꞌumo Alatala ka iꞌa, ‘Wonjumo sapatumu, sabana tana to nipekanggoremu, tana nagasa nggari karataku eꞌi.
34 Nikitaku kasusa bo kapari to nirasai todeaku ri tana Masir. Niepekumo pantete ira pade nanaꞌumo Aku mombakabasaka ira. Weꞌi-weꞌi maimo. Aku mompakau iko manjili mpaka ri tana Masir!’” c
35 Nitesa i Stefanus woꞌumo ka Topolibu etu, “Eꞌimo i Musa to nipoara ira to Yahudi ante tesa eꞌi: ‘Iko daꞌa topanggeniaka bo topotangara kami!’ d Tapi kakonona iꞌamo to nipakau Alatala majadi topanggeniaka bo topombasoreaka ira nggari pobatua to Masir. Etu nikawiana ante petulungi malaeka to narata ri jaꞌina ri gumbu to najela etu.
36 Musa etumo to nanggeni to Yahudi nesuwu nggari tana Masir, pade to nompowia kabaraka-kabaraka ante tandai-tandai to nipogumaa ri tana Masir, ri Tasi Nalei pade ri karawa baina patampulu mpae kasaena.
37 Musa woꞌu to nanguli ka to Israel iweꞌi: ‘Alatala kana mangonggotaka ka komi sambaꞌa nabi nggari tatongo sampesuwu komi mboto nasimbayu ante aku eꞌi.’ e
38 Pade tempo totuꞌa-totuꞌata to Yahudi etu naria ri karawa baina, i Musamo to najadi topotariolo ira ante malaeka to notesa ka ira ri Bulu Sinai. Pade i Musa to nantarima tesa nggari jaꞌi Alatala rapapola ka kita ala isema-sema mantuki tesa etu kana matuwu mabelo sampe ri kasae-saena.
39 Naupa iwetu totuꞌa-totuꞌata daꞌa ntoto natundu ri jaꞌi Musa. Ira nombasapuaka iꞌa pade ira madota manjili mpaka ri tana Masir.
40 Niuli ira ka i Harun, tuaka i Musa, ‘Powia ka kami sanu nolenje mpowiata ala wiata etu malau mokolu ka kami. Apa daꞌa mana ninjani kami bara nuapamo to najadi ka i Musa etu to nanggeni kami nesuwu nggari tana Masir!’ f
41 Tempo etu nipowia iramo saongu parantau nolenje mpoana japi. Naopu etu nikeni ira pesomba nipesomba ira ka parantau etu. Pade nipowia ira posusa nombatoiya nuapa to nipowia pale ira mboto etu.
42 Tapi Alatala nompalasi ira pade nompalamba ira nombasomba betuꞌe-betuꞌe ri langi. Etu nasimbayu ewa tesa to nitulisi riara buku-buku nabi-nabi iweꞌi:
‘Umba komi, to Israel!
Daꞌa Aku to nipesomba komi ante nanjambale binata ri karawa baina patampulu mpae kasaena.
Nadea wiata ntanina to nipesomba komi.
43 Daꞌa aga etu, tapi tenda mpepue ka wiata Molokh woꞌu to nikeni-keni komi
nosanggani-nggani ante parantau nolenje mpobetuꞌe Refan!
Parantau-parantau etumo to nipowia komi ala mamala rapesomba komi. g
Etumo sabana komi kana kutajiaka makawao mpaka ri jaꞌi balimu ri tana Babel!’ (Am. 5:25-27)
44 Sampesuwu-sampesuwu, tempo totuꞌa-totuꞌata naria ri karawa baina etu ira naria tenda mpepue to nikawia nggari kae to najadi tandai Alatala nosanggani ante ira. Tenda etu nipowia ira nantuki to niparenta Alatala ka i Musa nantuki jonjo ewa to nipopokita Alatala ka iꞌa.
45 Tenda etu nikeni ana-ana ntotuꞌata tempo ira ante Yosua nalau mangago tana Israel eꞌi nggari jaꞌi tau-tau ntanina. Tau-tau etu nipopalai Alatala tempo totuꞌa-totuꞌata nesua ri tana eꞌi. Pade tenda etu woꞌu bate-batena nipake ira mepue ka Alatala sampe ri tempo i Daud najadi Magau nto Yahudi.
46 Magau Daud nikonoa rara nu Alatala sampe iꞌa nerapi ka Alatala ala iꞌa rapaloga mowia saongu sapo rapetoꞌo Alatala to nipesomba Yakub, totuꞌana nggaolu etu.
47 Tapi damo i Salomo, ana i Daud etu to nompowia Sapo Mpepue etu.
48 Tapi naupa iwetu Alatala to Neliu Nggalanga daꞌa netoꞌo ri sapo to nikawia mpale manusia. Etu nasimbayu ewa tesa to nitulisi nabi iweꞌi:
49 ‘Langi etu kaderaku
pade dunia etumo polampi kadaku.
Daꞌa ria sapo to namala rapowia komi to namala kupetoꞌo.
Daꞌa woꞌu naria sapo to namala kupangosaraka,
50 sabana dunia ante pura-pura isina nikawiaku mboto.’
Iwetu panguli i Pue.” (Yes. 66:1-2)
51 Pade nanguli i Stefanus woꞌumo ka ira Topolibu Bete etu, “Sampesuwu-sampesuwu, nakoꞌo mpuꞌu rara komi! Pade komi mpuꞌu-mpuꞌu nabongo! Daꞌa madota komi mangepe pade mantuki Tesa Alatala! Nasimbayu ewa totuꞌamu nggaolu komi tunggai nangewa Nosa Nagasa nu Alatala!
52 Pura-pura nabi nipakandasa totuꞌamu nggaolu. Ira nompatesi pura-pura suro to nipakau Alatala narata nombangareaka karata nu Batua Alatala to Nanoana, etumo Yesus. Pade weꞌi-weꞌi Iꞌamo to nipakajaꞌa pade nipatesi komi!
53 Komimo to nantarima Atura-atura agama to niwai malaeka-malaeka ka totuꞌa-totuꞌata nggaolu, tapi daꞌa madota komi mantuki Atura-atura etu!”
Stefanus nirempe watu
54 Iwetu Topolibu Bete Agama etu nangepe nuapa pura to niuli i Stefanus, najuꞌa mpuꞌu rara ira pade nosinggiki baga ira nanggita iꞌa.
55 Tapi i Stefanus to naponu ante Nosa Nagasa nu Alatala nakantingoa mpaka ri langi. Nikitana kareme nu Alatala. Pade nikitana woꞌu Yesus nekanggore ri petoꞌo to nibila ri sabingga nggana nu Alatala.
56 Nangulimo i Stefanus, “Kitamo! Aku nanggita langi natebea pade Yesus, Ana nu Manusia nekanggore ri sabingga nggana nu Alatala ri suruga!”
57 Nangepe etu nongare-ngaremo Topolibu Bete ante nombalamu talinga ira ala daꞌa mana mangepe tesa i Stefanus etu. Pade nangowamo ira pura-pura nantatiku iꞌa.
58 Iꞌa nitajiaka ira mpaka ri sawaliku ngata. Pade ri setu iꞌa nirempe ira ante watu. Sabi-sabi to naria ri Polibu Bete pangane nombawonju baju ira niboli ri jaꞌi sambaꞌa tau nosanga ka i Saulus ala ira mamala mombarempe i Stefanus.
59 Tempo i Stefanus nirempe ira, nekakaimo iꞌa, “Pue Yesus, tarimamo nosaku!”
60 Naopu etu notimbakotumo iꞌa pade nongare ante suarana namangga, “Pue, ampungimo silaka ira eꞌi!” Naopu etu namatemo iꞌa.