Pitumbaꞌa tau nipelisi mantulungi suro-suro i Pue Yesus
6
Nantambai kasaena nantambai kadea ntopomparasaya i Pue Yesus. Tempo etu topomparasaya i Pue Yesus to Yahudi to nompake Basa Yunani nongua ka topomparasaya i Pue Yesus to nobasa Yahudi. Nangulimo ira to nobasa Yunani, “Besi-besi kami to nabaluna daꞌa nombarata petulungi balanja eo-eo ewa to nipalele ka besi-besi tobalu to nobasa Yahudi.”
2 Nangepe etu suro-suro sampulu rombaꞌa etu nompokio pura-pura topomparasaya i Pue Yesus mompasiromu. Pade nangulimo suro-suro ka ira, “Daꞌa nabelo ane kami menonto mompatolele Tesa nu Alatala ala mompakasiayu panggoni. Agina bago etu rawai ka tau ntanina.
3 Jadi sampesuwu-sampesuwu, aginapa komi mompelisi nggari tatongo komi pitumbaꞌa tau to naria sangana nabelo, to naponu ante Nosa Nagasa nu Alatala pade nataꞌu. Pura-pura bago eꞌi kana rawai kami ka ira.
4 Tapi bago kami eꞌi batena mosambaya pade mompatolele Tesa nu Alatala.”
5 Sangga nangepe tesa suro-suro etu, nasituju puramo topomparasaya i Pue Yesus ante tesa etu. Jadi nipelisi iramo i Stefanus, sambaꞌa tau to naroso pomparasayana pade to naponu ante Nosa Nagasa nu Alatala. Pade nipelisi ira woꞌu i Filipus, pade i Prokhorus, i Nikanor, i Timon, i Parmenas, pade i Nikolaus sambaꞌa tau nggari ngata Antiokhia. Iꞌa daꞌa tau to Yahudi, tapi iꞌa nesuamo agama Yahudi.
6 Pitumbaꞌa tau etu nikeni ka suro-suro. Naopu etu suro-suro nosambaya pade nombadika pale ri balengga ira ala mangonggotaka ira majadi topantulungi suro-suro.
7 Ante jala iwetu Tesa nu Alatala natolele pade topomparasaya i Pue Yesus ri ngata Yerusalem tunggai nantambai kadeana. Pade nadea woꞌu balengga topanggeni agama Yahudi najadi topomparasaya i Pue Yesus.
Stefanus nisoko
8 Stefanus mpuꞌu-mpuꞌu niwai Alatala ka towe belo. Pade naria kuasa Alatala ri jaꞌina sampe iꞌa namala nanggawia nadea kabaraka bo tandai to nipogumaa ri tatongo ntau dea.
9 Tapi naria woꞌu tau-tau nangewa iꞌa. Ira etu to Yahudi to nodade ri sapo mpodade to niuli Sapo Mpodade Batua to Nikabasaka. Ira tau to Yahudi nggari ngata Kirene bo ngata Aleksandria, pade nggari Propinsi Kilikia bo Propinsi Asia. Ira nosibali ante i Stefanus.
10 Tapi ira daꞌa namala nombabali nuapa to nitesa i Stefanus, sabana Nosa Nagasa nu Alatala nombawai ka iꞌa kapande notesa.
11 Jadi ira nombasogo bara sakuya mbaꞌa tau ala ira motesa, “Kami nangepe tau etu nompakakedi i Musa ante Alatala.”
12 Iwetumo ira nompakapane rara ntau dea ante totuꞌa-totuꞌa nto Yahudi bo guru-guru agama. Naopu etu nalaumo ira nombasoko i Stefanus, pade iꞌa nikeni ira ratangara ri ngayo Polibu Bete Agama Yahudi.
13 Nikeni ira woꞌu sabi-sabi ri ngayo Polibu Bete etu nombatesa jarita to daꞌa nakonona ewa i Stefanus. Sabi-sabi etu nanguli, “Tau eꞌi bate-batena nanguli sinjaꞌi Sapo Mpepue to Nagasana bo Atura-atura agama to nipapola i Musa ka kita.
14 Kami nangepe iꞌa notesa Yesus tau nggari ngata Nazaret etu kana mombagero Sapo Mpepue eꞌi pade mombabali pura-pura ada to nipasumuli i Musa ka kita.”
15 Pura-pura tau to naria riara Polibu Bete Agama etu nompenoto Stefanus. Pade tempo etu ira nanggita lenje i Stefanus nasimbayu ewa lenje sambaꞌa malaeka.