Tesa Ananias bo Safira
5
Tapi naria woꞌu sambaꞌa langgai ntanina nosanga ka Ananias, rongona nosanga ka i Safira. Ira njamboko woꞌu nompobalu salimpu tana ira.
2 Naopu etu doi oli ntana etu sagaꞌa niboli ka ira mboto, pade sagaꞌa nikeni Ananias ri jaꞌi suro-suro ante nanguli etu pura-pura oli ntana to nipobaluna. Powiana etu pura-pura ninjani rongona.
3 Tapi nangulimo i Petrus ka iꞌa, “Ananias, nokuya iko nompalamba Magau nu Seta nakuasa riara ntaꞌimu sampe iko nodawa ka Nosa Nagasa nu Alatala? Ante nggalino-lino iko nantaꞌamaka sagaꞌa doimu etu ka iko mboto!
4 Tana etu daꞌapa nipobalumu iko puena. Pade naopu tana etu nipobalumu, doi oli tana etu iko woꞌu puena. Nokuya sampe naria patuju riara ntaꞌimu mompowia to najaꞌana etu? Iko daꞌa aga nodawa ka manusia, tapi iko nodawa ka Alatala!”
5-6 Iwetu Ananias nangepe tesa-tesa i Petrus etu, nadunggamo iꞌa pade namate. Naopu etu naratamo bara sakuya mbaꞌa kabilasa nombasompu watabaku Ananias, pade nikeni ira mpaka ri sawalikuna ala ratana ri dayo. Naeka mpuꞌumo pura-pura tau to nangepe nuapa to najadina etu.
7 Kira-kira tolu jaa kaliuna Ananias nitana, nesua woꞌumo i Safira, rongona besi. Daꞌapa ninjanina nuapa to lako-lako najadi.
8 Nangulimo i Petrus ka iꞌa, “Pembai uli ka aku, tana nipobalu komi njamboko etu, aga eꞌi puramo doi olina?”
Nesonomo i Safira, “Nakono. Etu puramo doi olina.”
9 Pade nangulimo i Petrus ka iꞌa, “Nokuya iko pade rongomu Ananias nosaongu rara nompembai nombabagiu Nosa Nagasa i Pue? Epemo! Tau-tau to nombatana rongomu lako nanjili nggari dayo. Ira kana manggeni iko woꞌu mpaka ri sawalikuna mombatana iko!”
10 Nangepe tesa etu nadunggamo i Safira etu pade kaliu-liu namate ri ngayo i Petrus. Pade tempo kabilasa-kabilasa etu nesua nikita ira i Safira woꞌumo namate. Pade nikeni iramo watabakuna mpaka ri sawalikuna pade nitana ira ri sinjori dayo rongona Ananias.
11 Nggari kajadia etu naeka mpuꞌumo pura-pura topomparasaya bo tau-tau ntanina to nangepe nuapa to najadina etu.
Kabaraka bo tandai to nipogumaa nikawia suro-suro
12 Nadea mpuꞌu kabaraka bo tandai to nipogumaa nikawia suro-suro ri tatongo ntau dea. Pade ante nosaongu rara pura-pura topomparasaya nasiromu ri Sapo Mpepue ri petoꞌo to niuli Tambale i Salomo.
13 Tau ntanina daꞌa nabia narata nasiromu ante ira sabana naeka ira. Aga topomparasaya-topomparasaya etu mpuꞌu-mpuꞌu nibila ntodea.
14 Pade nantambai kasaena nantambai kadea ntau to nomparasaya i Pue Yesus, nabeloka langgai, nabeloka besi.
15 Nanggita kabaraka-kabaraka to nikawia suro-suro sampe pura-pura tau najuꞌa nikeni ri jala pade nituꞌu ri bunggu paturu bo ompa ala ane i Petrus moliu nau aga sakedi wayona mawela bara sakuya mbaꞌa nggari ira, ala ira rapakabelo.
16 Nadea woꞌu tau narata nggari ngata-ngata to nantatiku ngata Yerusalem. Ira nanggeni tau-tau najuꞌa pade tau to nipesua seta. Pade pura-pura tau etu nipakabelomo.
Suro-suro i Pue Yesus nipandasa
17 Kaopuna nasiriatimo rara Balengga Topanggeni Agama Yahudi bo pura-pura roana, etumo tau-tau to Saduki, sabana nadea tau nomparasaya i Pue Yesus. Jadi ira nosintuwu.
18 Suro-suro i Pue Yesus nisoko ira pade nisuaraka riara tarunggu ngata.
19 Tapi nggawengina etu sambaꞌa malaeka i Pue nombabea pewobo-pewobo tarunggu pade nanggeni suro-suro etu mpaka ri sawalikuna. Naopu etu niulina ka ira,
20 “Kalaumo, pekanggore ri Sapo Mpepue pade patolelemo ka todea ri setu pura-pura tesa ewa katuwua to nabouna nggari jaꞌi Pue Yesus.”
21 Naopu nangepe tesa etu suro-suro etu nantuki nuapa to niuli malaeka etu. Nasadondo mpuꞌu nalaumo ira ri Sapo Mpepue pade nompamula nompatuduki tau ri setu.
Tempo etu Balengga Topanggeni Agama ante roa-roana nompakau totuꞌa-totuꞌa bo topanggeniaka nto Yahudi mompasiromu Polibu Bete Agama. Pade ira nompakau tau malau mangala suro-suro etu nggariara tarunggu rakeni ratangara ri ngayo ira.
22 Tempo tau-tau nipakau etu narata ri tarunggu, suro-suro etu daꞌa mana ria nirata ira riara tarunggu etu. Jadi nanjilimo tau-tau nipakau etu nopakilu ka Polibu Bete Agama nuapa to nirata ira riara tarunggu.
23 Niuli ira, “Tempo kami narata ri tarunggu nikita kami pewobo tarunggu etu natepiku mpakabelo-belo pade topanggatono-topanggatono naria nanggatono pewobo etu. Tapi tempo kami nombabea pewobo etu, daꞌa mana ria sambaꞌa nirata kami riarana.”
24 Tempo balengga topojaga Sapo Mpepue pade balengga-balengga topanggeni agama nangepe pakilu etu, naingu mpuꞌu rara ira nompekiri nuapa najadi ante suro-suro etu bo nuapa ngena majadi.
25 Daꞌa nasaeka naratamo sambaꞌa tau nanguli ka ira, “Kita weꞌi! Tau-tau to nisuaraka komi riara tarunggu, weꞌi-weꞌi ira naria riara Sapo Mpepue nompatuduki todea!”
26 Nangepe tesa etu nalaumo balengga topojaga Sapo Mpepue ante roana mangala suro-suro etu. Tapi daꞌa mana nipandasa ira, apa naeka ira ka tau dea. Nipekiri ira ane ira mompandasa suro-suro etu tau dea kana mombarempe ira ante watu.
27 Suro-suro etu nikeni ira mantingayo Polibu Bete Agama etu. Pade nompamulamo Balengga Topanggeni Agama nomparesa ira.
28 Iꞌa nanguli, “Kami mpuꞌu-mpuꞌu nombatagi komi bopia, neꞌe mana mompatuduki tau ante sanga Yesus etu. Tapi kita weꞌi! Komi kana nompatolele pepatuduki etu ri njumaongu ngata Yerusalem, pade niuli komi woꞌu, Yesus etu namate nipatesi kami!”
29 Nesonomo i Petrus bo suro-suro ntanina, “Kami kana matundu ri jaꞌi Alatala, daꞌa ri jaꞌi manusia.
30 Komi nompatesi Yesus ante nombapaku Iꞌa ri kayu parika. Tapi Alatala to nipesomba totuꞌata nggaolu nompakatuwu bali Iꞌa nggari kamatena.
31 Iꞌamo to nipakalanga Alatala ante kuasana to nabete majadi Topanggeniaka bo Magau to Mompakasalama, ala kita to Israel rawai loga majea nggari silaka-silakata pade raampungi.
32 Kami eꞌimo najadi sabi nggari pura-pura etu nosanggani-nggani ante Nosa Nagasa nu Alatala to niwaina ka tau to nantuki parentana.”
33 Sangga nangepe nuapa to nitesa suro-suro etu, najuꞌa mpuꞌumo rara Topolibu Bete Agama, sampe ira nasintuwu madota mompatesi suro-suro etu.
34 Tapi riara Polibu Bete Agama etu naria sambaꞌa tau to Parisi to nosanga ka i Gamaliel. Iꞌa sambaꞌa guru agama to nibila pura-pura tau dea. Iꞌa nekanggore pade nompakau tau manggeni suro-suro mesuwu ri sawalikuna sampalai.
35 Naopu etu niulina ka Topolibu Bete etu, “Umba komi, sampesuwu-sampesuwuku to Israel. Kita kana mompekiri mpakabelo-belo nuapa to rapowiata ka tau-tau eꞌi.
36 Sabana bara sakuya mpae naliu woꞌu naria neumba sambaꞌa tau nosanga ka i Teudas. Iꞌa nompangaku korona tau nabete pade tau nabaraka mpuꞌu, sampe naria tau nantuki iꞌa patatu mbaꞌa kadeana. Tapi iꞌa nipatesi pade pura-pura topantuki iꞌa nagaro nosimpotatare.
37 Naopu etu tempo popabila manusia, neumba woꞌumo Yudas, tau nggari Bagia Galilea. Iꞌa woꞌu nompadidi tau dea nombatuki iꞌa. Tapi iꞌa woꞌu nipatesi pade pura-pura topantuki iꞌa woꞌu nagaro nosimpotatare.
38 Sabana etu kuuli ka komi, neꞌe komi mompowia nuapa-nuapa ka topantuki Yesus eꞌi. Palambamo ira, sabana ane pepatuduki pade panggawia ira eꞌi aga nopuꞌu nggari jaꞌi manusia, etu kana malipo.
39 Tapi ane etu nopuꞌu nggari jaꞌi Alatala, komi daꞌa mamala mombadagi ira. Pade daꞌa aga iwetu! Neꞌe sampe komi mangewa Alatala!”
Sangga nangepe tesa i Gamaliel, nitarima Topolibu Betemo tesana etu.
40 Naopu etu suro-suro nipokio ira mesua bali. Narata ri saꞌa, ira niporo pade nitagi iweꞌi: “Neꞌe mana komi mompatuduki tau ante manguli sanga Yesus!” Naopu etu suro-suro etu nikabasakamo.
41 Jadi nalaumo suro-suro etu nompalasi Polibu Bete Agama etu ante nadamba mpuꞌu rara sabana ira nireke Alatala masipato rapandasa apa ira topomparasaya i Pue Yesus.
42 Pade eo-eo ira ri Sapo Mpepue pade ri sapo-sapo ntau. Daꞌa nenonto ira nompatuduki pade nompatolele Kareba Belo to nanguli Yesus Magau to Mompakasalama to nijanji Alatala.