Petrus bo Yohanes niparangga ri ngayo Polibu Bete Agama nto Yahudi
4
Tempo i Petrus bo Yohanes danotesa ka tau dea, naratamo bara sakuya mbaꞌa topanggeni agama, balengga topojaga Sapo Mpepue ante tau-tau to Saduki ri jaꞌi ira.
2 Narau mpuꞌu ira sabana i Petrus bo Yohanes nompatuduki ka tau dea Yesus natuwu bali nggari kamatena. Pepatuduki etu nompakanoto tomate kana matuwu bali.
3 Etu sabana ira nombasoko rombaꞌa suro etu, pade nanjuaraka ira rombaꞌa riara tarunggu. Tapi tempo etu nawengimo. Daꞌapa namala ira ratangara. Jadi i Petrus bo Yohanes nitaꞌamaka ri setu sampe naile mpadondona.
4 Naupa iwetu tau-tau to nangepe pepatuduki nu suro-suro etu paneꞌa, nadea to nomparasaya i Pue Yesus. Jadi nantambaimo kadea ntopomparasaya i Pue Yesus nantambai sampe nitasere limanjobu mbaꞌana.
5 Tonailena topanggeniaka-topanggeniaka agama Yahudi, totuꞌa-totuꞌa nto Yahudi ante guru-guru agama nasiromu ri ngata Yerusalem.
6 Ira nasiromu ante Balengga Topanggeni Agama to nosanga ka i Hanas, nosanggani-nggani ante i Kayafas, Yohanes, Aleksander, bo sampesuwu ntanina Balengga Topanggeni Agama.
7 Sangga nasiromumo ira, i Petrus bo Yohanes nikeni nantingayo ira pura-pura. Pade nompamulamo ira nomparesa i Petrus bo Yohanes ante nekutana, “Iwenu komi nompakabelo topunggu eꞌi? Ante baraka nuapa atau ante kuasa isema komi nompakabelo iꞌa?”
8 Pade nesonomo i Petrus ante kuasa nggari jaꞌi Nosa Nagasa nu Alatala, “Uma-uma, topanggeniaka todea pade totuꞌa-totuꞌa ngata.
9 Kami eꞌi nitangara komi weꞌi-weꞌi sabana powia kami nantulungi sambaꞌa topunggu, pade sabana komi madota mangginjani ante baraka nuapa kami namala nompakabelo topunggu eꞌi.
10 Jadi ala ranjani komi pade pura-pura to Israel woꞌu, kami manguli ka komi, tau eꞌi nipakabelomo pade iꞌa nekanggore ri ngayo komi pura-pura sabana baraka nggari jaꞌi Yesus Kristus to Nazaret. Komi nombapaku Iꞌa ri kayu parika sampe Iꞌa namate, tapi Alatala nompakatuwu bali Iꞌa nggari kamatena.
11 Yesus etumo to nipatuju ri tesa riara Buku Nagasa to nanguli iweꞌi:
‘Watu to nitajiaka ntopowia sapo,
watu etumo to najadi palo mpondasi to neliu nggaroso.’ (Mzm. 118:22)
12 Aga Yesus etumo to namala mompakasalama manusia, sabana ri njumaongu dunia daꞌa ria sambaꞌa ntanina to nipakatantu Alatala mompakasalama kita, aga Yesus mboto.”
13 Tempo topolibu etu nanggita kabia i Petrus bo Yohanes notesa pade nikita ira rombaꞌa suro etu aga tau-tau to naede katuwuna daꞌa nosikola nalanga, nogumaamo ira pura-pura. Pade nanotomo ka ira rombaꞌa suro etu topomparasaya i Pue Yesus.
14 Topolibu etu madota mombasapuaka kabaraka to nikawia i Petrus bo Yohanes tapi daꞌa namala, sabana topunggu to nipakabelo etu naria nekanggore ri ngayo ira nosanggani-nggani ante i Petrus bo Yohanes.
15 Jadi ira nompakau rombaꞌa suro etu rakeni mpesuwu mpaka ri sawalikuna sampalai, pade nosimpekutanamo ira sambaꞌa bo sambaꞌa,
16 “Nuapa rapowiata ka tau rombaꞌa eꞌi? Nanotomo ka pura-pura tau to netoꞌo ri ngata Yerusalem sangele kabaraka to nabetena nipowia ira rombaꞌa. Daꞌa mamala rasaputa kajadia etu.
17 Tapi ala kareba eꞌi neꞌe matolele sampe makawao ri jaꞌi ntau pura-pura, kamai kita momparangga ira rombaꞌa ala neꞌe mana ira motesa ka tau-tau ante sanga Yesus etu.”
18 Naopu etu ira nompokio bali suro rombaꞌa pangane pade niuli ira, “Neꞌe mana ntoto komi motesa atau mompatuduki tau ante sanga Yesus!”
19 Tapi nesonomo i Petrus bo Yohanes, “Pakatantu komi mbotomo nuapa to nakonona riara mpanggita Alatala, mantuki parenta komi atau mantuki parenta Alatala.
20 Kami eꞌi daꞌa namala menonto motesa ewa nuapa to nikita pade niepe kami mboto.”
21 Naopu etu topolibu etu nomparangga woꞌumo rombaꞌa suro etu. Tapi kaopuna nikabasaka iramo. Daꞌa ntoto nirata ira jala mombasuku i Petrus bo Yohanes, sabana pura-pura tau nantoiya-toiya Alatala nggari kabaraka to nikawia ira etu.
22 Nogumaa mpuꞌu ira pura-pura sabana topunggu to nipakabelo etu, nelabi patampulu mpaemo umuruna.
Topomparasaya nerapi kabia nggari jaꞌi Pue
23 Naopu i Petrus bo Yohanes nikabasaka, nanjilimo ira ri jaꞌi roa-roa ira. Naratapa ri setu nitesa ira ka roa-roa iramo, tewai-tewai nu balengga-balengga topanggeni agama bo totuꞌa-totuꞌa nto Yahudi ri jaꞌi ira rombaꞌa.
24 Sangga niepe roa-roa ira tesa etu, nekakaimo ira pura-pura ka Pue Alatala ante nosaongu rara. Niuli ira, “Pue, Komimo to nompajadi langi bo dunia, bo tasi pade pura-pura isina.
25 Ante kuasa nggari jaꞌi Nosamu batuamu i Daud, totuꞌa kami nggaolu nombaboto iweꞌi:
‘Tau-tau daꞌa to Yahudi narau.
Pade tau-tau to Yahudi nowia nia anu daꞌa ria gunana.
26 Magau-magau ri dunia nasiromu
pade pura-pura topanggeniaka ngata nosaongu rara
mangewa i Pue bo Magau to Mompakasalama to nipelisina.’ (Mzm. 2:1-2)
27 O Pue, tesa nggari jaꞌi Daud eꞌi mpuꞌu-mpuꞌu nipakadupamo. Sabana daꞌapa nasae ri ngata eꞌi Magau Herodes pade i Pontius Pilatus nasiromu ante tau-tau daꞌa to Yahudi pade tau-tau to Yahudi. Patuju ira mangewa i Pue Yesus, Batuamu to Nagasana to nipelisimu majadi Magau to Mompakasalama.
28 Ira nosintuwu mompatesi i Pue Yesus. Tapi kakonona to nikawia ira nompakadupa nuapa to nipakatantumu nggari pamulana. Etu pura-pura najadi nantuki kuasa bo dotamu mboto.
29 Jadi niperapi kami, Pue, kitamo powia ira nomparangga kami. Rawai ka kami kuasa ala kami mamala motesa ante mabia mompatolele tesamu.
30 Popokita kuasamu, Pue, ala kami mamala mompakabelo tau-tau najuꞌa pade mowia kabaraka bo tandai to nipogumaa ante kuasa i Pue Yesus, Batuamu to nagasana etu.”
31 Naopu ira nosambaya ka i Pue iwetu, sapo nikasiromu ira etu nogoya, pade ira pura-pura naponu ante Nosa Nagasa nu Alatala. Naopu etu nalaumo ira nompatolele Tesa nu Alatala ante kabia rara.
Pura-pura topomparasaya nasintuwu
32 Pura-pura topomparasaya i Pue Yesus etu natuwu nosaongu rara pade nosaongu pekiri. Daꞌa ria sambaꞌa ri tatongo ira etu nanguli mbara-mbarana anuna mboto. Tapi nuapa pura to naria ante ira, etu nipake ira mpasanggani-nggani.
33 Ante kuasa nabete suro-suro i Pue Yesus nompatolele kareba to nanguli Yesus natuwu bali. Pade Alatala nombawai ka ira pura-pura rasi nadea.
34 Daꞌa ria sambaꞌa nggari tatongo ira etu nakura nuapa-nuapa, sabana ira to naria tanana bara sapona, nipobalu ira etu pade oli nu tana bara sapo etu
35 nikeni ira ri jaꞌi nu suro-suro. Doi etu nibagi-bagi suro-suro ka isema-sema to naria paraluuna.