Sambaꞌa topunggu nipakabelo Petrus bo Yohanes
3
Naria saeo i Petrus bo Yohanes nalau mpaka ri Sapo Mpepue tinti toluongu kaede nu eo, tempo mposambaya nto Yahudi.
2 Ri bobaa bete to nosanga ka Bobaa Naramba naria sambaꞌa langgai to napunggu mami nggari pesuwuna. Eo-eo iꞌa nikowa mpaka ri bobaa etu ala iꞌa mamala mantinande palena merapi-rapi ka topoliu nesua nalau mosambaya ri Sapo Mpepue etu.
3 Tempo topunggu etu nanggita i Petrus bo Yohanes noliu mesua mpaka ri Sapo Mpepue etu, nitinandena palena nerapi ka ira rombaꞌa nuapa to nariana.
4 Ira nanggita topunggu etu pade notesamo i Petrus ka iꞌa, “Kitamo kami!”
5 Topunggu etu nompenoto ira ante panjarumaka maria nuapa-nuapa rawai ka iꞌa.
6 Tapi nanguli i Petrus ka iꞌa, “Daꞌa ntoto naria doiku, tapi nuapa to naria ri jaꞌiku, etumo kuwai ka iko. Ante kuasa Yesus Kristus to Nazaret etu, polumakomo iko!”
7 Pade i Petrus nanjoko pale nggana topunggu etu, pade nantulungi iꞌa nekanggore. Kaliu-liu narosomo kada ante wuku lali ntopunggu etu.
8 Iꞌa kaliu-liu nekanggore pade nompamula nolumako gusaꞌa guseꞌi. Naopu etu nesuamo iꞌa riara Sapo Mpepue mpasanggani-nggani ante i Petrus bo Yohanes. Iꞌa nolumako pade nekawantu-wantu pade nantoiya Alatala.
9 Pura-pura tau riara Sapo Mpepue etu nanggita iꞌa nolumako pade nantoiya-toiya Alatala.
10 Pade ninjani ntau iꞌa eꞌimo to nabiasa nekatoko ri Bobaa Naramba ri Sapo Mpepue nerapi-rapi ka tau. Nogumaa ante natekaja ira nanggita nuapa to najadi ri jaꞌi ntopunggu etu.
Petrus notesa ka tau dea riara Sapo Mpepue
11 Topunggu etu pangane tunggai nantuki i Petrus bo Yohanes. Tempo ira tolumbaꞌa narata ri tambale to niuli Tambale i Salomo, pura-pura tau narata nasiromu ri jaꞌi ira, apa natekaja ira nanggita topunggu etu nolumakomo.
12 Tempo i Petrus nanggita tau dea etu notesamo iꞌa ka ira, “Sampesuwu-sampesuwuku to Israel, nokuya komi nogumaa nanggita anu najadi eꞌi? Nokuya komi tunggai nanggita kami? Natantu pombarata komi tau eꞌi nolumako sabana baraka kami mboto, atau sabana kami naroso poagama kami. Tapi etu daꞌa ntoto nakono!
13 Etu najadi nggari Alatala to nipesomba totuꞌata Abraham, Ishak, bo Yakub. Alatala nombabila pade nompakabete sanga batuana Yesus. Yesus eꞌi to niwai komi ka tau nakuasa. Iꞌamo to nipoara komi ri ngayo i Pilatus tempo i Pilatus madota manggabasaka Iꞌa.
14 Iꞌa nagasa bo nanoa, tapi komi pura-pura nompoara Iꞌa pade nerapi ala i Pilatus mombakabasaka ka komi sambaꞌa topepatesi.
15 Komi nompatesi Iꞌa, tano Iꞌamo to nombawai katuwua ka manusia pura-pura. Tapi Iꞌa nipakatuwu Alatala bali nggari kamatena. Kajadia etu nikita kami mbotomo!
16 Pade topunggu to nikita pade ninjani komi eꞌi nipakabelo ante kuasa sanga Yesus. Iꞌa nabelo ntotomo ri ngayo komi ri seꞌi sabana pomparasaya ka Yesus etu.
17 Sampesuwu-sampesuwu, ninjaniku nuapa to nipowia komi bo topanggeniaka komi ka Yesus, etu nipowia komi sabana daꞌa ninjani komi Iꞌamo Magau to Mompakasalama.
18 Tapi powia komi etu nompakadupa nuapa to niboto Alatala nantuki tesa pura-pura nabina nggaolu, etumo Magau to Mompakasalama kana mombarasai kasusa bo kapari.
19 Jadi sampesuwu-sampesuwu, kajeamo komi nggari pokainggumu to najaꞌa pade manjili ri jaꞌi Alatala ala silaka-silaka komi rapakalipona.
20 Kawiamo etu ala i Pue Alatala marata mompakasana rara komi pade ala Iꞌa woꞌu mompakau Yesus marata ri jaꞌi komi. Yesus etu to nipakatantu Alatala nggari pamula-mulana majadi Magau to Mompakasalama komi.
21 Iꞌa kana metoꞌo ri suruga ntani ruru sampe marata tempona Alatala mompakabou pura-pura dunia eꞌi ewa to niuli Alatala nantuki tesa nabi-nabina nggaolu.
22 Naria tesa nggari jaꞌi nabi i Musa nggaolu to nombaboto Yesus iweꞌi: ‘Pue Alatala kana mangonggotaka ka komi sambaꞌa nggari tatongo sampesuwumu mboto majadi sambaꞌa nabi nasimbayu ewa aku eꞌi. Komi kana mompangala nuapa pura to raulina ka komi.
23 Isema daꞌa mompangala nuapa to raulina kana rapatani nggari todea nu Alatala pade rapatesi.’ a
24 Pura-pura nabi to nompasimbayu tesa nggari jaꞌi Alatala, nompamula nggari nabi i Samuel nggaolu pade nabi-nabi ntanina to narata nggapuri, ira pura-pura nombaboto nuapa to najadi tempo eꞌi.
25 Komimo to nantarima rasi to nijanji Alatala nantuki tesa nabi-nabi. Riara pojanji to nipowia Alatala ante Abraham totuꞌata nggaolu niulina iweꞌi: ‘Nggari mulimu banepia pura-pura manusia ri dunia kana mombarata rasi nggari jaꞌiku.’ b