Panaꞌu Nosa Nagasa nu Alatala
2
Sangga narata tempo eo bete nto Yahudi to nosanga ka Eo Pentakosta, nasiromumo pura-pura topomparasaya i Pue Yesus ri saongu petoꞌo.
2 Sampegoli niepe ira moni nggari langi ewa nguu nu bara naramboso. Nguu nu bara etu natiepe ri umba-umba riara njapo to nikasiromu ira etu.
3 Pade nikita ira sangaya ewa jela nu apu nolenje mpojila nendele ri umba-umba pade netuꞌu ri jaꞌi ira sambaꞌa bo sambaꞌa.
4 Ira pura-pura nipesua Nosa Nagasa nu Alatala, pade nompamulamo ira notesa ante basa-basa to nopuꞌu nggari jaꞌi Nosa Nagasa nu Alatala etu. Ira namala notesa basa-basa etu sabana kuasa Nosa Nagasa naria ri jaꞌi ira.
5 Tempo etu woꞌu nadea tau-tau to Yahudi ntanina naria ri ngata Yerusalem. Ira eꞌimo tau-tau to naroso poagamana to narata nggari umba-umba ngata ri dunia.
6 Sangga nangepe nguu nu bara etu, naratamo tau dea nasiromu. Natekaja mpuꞌu ira sabana niepe ira basa ira mboto namala nipotesa topomparasaya i Pue Yesus.
7 Ante rara to natekaja pade nogumaa ira notesa sambaꞌa bo sambaꞌa, “Kitamo! Tau-tau to notesa eꞌi, ira pura-pura to Galilea!
8 Tapi iwenu sampe kita pura-pura nangepe ira notesa ante basa nggari ngatata mboto?
9 Kita eꞌi tau nggari tana Partia, Media, Elam, nggari Mesopotamia, Yudea pade Kapadokia. Naria woꞌu kita nggari Pontus bo Asia,
10 nggari Frigia pade Pamfilia, nggari Masir pade nggari tana Libia namosu ante ngata Kirene. Naria woꞌu ri tatongota eꞌi tau narata nggari Roma.
11 Sabagia nggari kita tau to Yahudi bo naria woꞌu tau ntanina to nesua agama Yahudi. Naria tau to narata nggari Bagia Kreta bo Arab. Kita eꞌi tau nggari mpengaya basa tapi kita pura-pura nangepe ira notesa ante basata mboto ewa powia to neliu nggabelo to nipowia Alatala!”
12 Nogumaa bo naingu puramo ira, sampe nosipekutana sambaꞌa bo sambaꞌa, “Nuapa batuana kajadia eꞌi?”
13 Tapi naria woꞌu tau-tau ntanina ri setu to nompongei-ngei. Ira nanguli, “A, tau-tau etu, ira aga nalangu.”
Tesa Petrus ka todea
14 Nangepe tesa etu, nekanggoremo i Petrus nosanggani ante ira sampulu sambaꞌa suro i Pue Yesus ntanina etu, pade notesamo iꞌa ka tau dea ante suara namangga. Niulina, “Sampesuwu-sampesuwu to Yahudi, pade komi pura-pura to netoꞌo ri ngata Yerusalem! Epemo mpakabelo-belo tesaku eꞌi! Kana kupakanoto ka komi batuana nuapa to najadi ri seꞌi.
15 Kami eꞌi daꞌa nalangu ewa nibata komi, sabana weꞌi-weꞌi daꞌapa tempo panginu, datinti sasio mpadondona.
16 Tapi kajadia eꞌi karata nu Nosa Nagasa ewa to nijanji Alatala nantuki tesa to niboto nabi Yoel nggaolu iweꞌi:
17 ‘Alatala notesa: Ri tempo kaopu nu dunia banepia
Aku kana mompopanaꞌu Nosaku ka pura-pura manusia.
Ana-ana komi, nabeloka langgai, nabeloka besi,
kana mompasimbayu tesaku ka komi.
Kabilasa-kabilasa komi
kana manggita panggita nggari jaꞌiku.
Pade totuꞌa-totuꞌa komi
kana mangipi ewa pangipi kuwai ka ira.
18 Sampe ri batua-batuaku woꞌu, nabeloka langgai, nabeloka besi,
kana kuwai ka Nosa Nagasa ri eo to nijanjiku etu.
Pade ira kana mompasimbayu nuapa-nuapa kuuli ka ira.
19 Aku kana mompopokita ka komi kabaraka-kabaraka ri langi
pade tandai-tandai nipogumaa ri dunia eꞌi.
Kana maria lei bo apu bo rangasu.
20 Mata eo kana mabali majadi marumau,
wula kana majadi maralei.
Etu kana majadi ruru pade marata eo bete to nabelona,
etumo tempo Pue marata ri dunia eꞌi.
21 Pade isema-sema to mekakai ka i Pue
kana rapakasalama.’ (Yl. 2:28-32)
22 Sampesuwu-sampesuwuku to Israel, epemo tesaku eꞌi! Alatala nompopokita ka komi pura-pura Iꞌa mpuꞌu-mpuꞌu naria nosanggani-nggani ante Yesus to Nazaret etu, sabana nadea kabaraka pade tandai-tandai to nipogumaa to nikawia Alatala niposabana Yesus etu. Komi mboto nangginjani etu sabana kajadia-kajadia etu pura-pura najadi ri tatongo komi mboto.
23 Yesus etu niwai riara mpale komi pade Iꞌa nipatesi komi. Iꞌa niwai komi ka tau najaꞌa ala Iꞌa rapaku ira ri kayu parika. Tapi kakonona to najadi etu nantuki nia to nipakatantu Alatala, sabana ninjanina nggari pamula-mulana nuapa to majadi ante Yesus.
24 Komi nompatesi Yesus, tapi Alatala nompakatuwu bali Iꞌa nggari tatongo ntau namate. Alatala nombakabasaka Yesus nggari kasesana Iꞌa namate sabana daꞌa namala Iꞌa rataꞌamaka ri petoꞌo ntomate.
25 Nanotomo etu sabana Magau Daud nggaolu nombatesa Yesus iweꞌi:
‘Nikitaku Pue namosu ante aku.
Iꞌa ri sabingga ngganaku ala momporoa aku
ala aku daꞌa molengga ragoya nuapa-nuapa.
26 Etumo sampe nadamba raraku, pade aku mantoiya-toiya.
Naupa aku manusia biasa, aku eꞌi aga maroo manjarumaka kuasamu.
27 Sabana Komi daꞌa nompalamba aku maboli riara dunia ntomate.
Komi daꞌa nompalamba watabaku Batuamu to Nagasana maboli riara dayo sampe mapopo.
28 Nitujurakamu ka aku jala mpaka ri katuwua mabelo sampe ri kasae-saena.
Neliu nggadamba raraku sabana Komi nosanggani ante aku.’ (Mzm. 16:8-11)
29 Sampesuwu-sampesuwuku, natantu nanotomo ka kita pura-pura daꞌa watabakuna mboto to nipatuju Magau Daud, sabana totuꞌata i Daud etu namate pade nitana. Dayona danariapa ri tatongota sampe eo eꞌi.
30-31 Tapi i Daud sambaꞌa nabi, pade ninjanina nuapa rakawia Alatala banepiana. Ninjanina pojanji Alatala ka iꞌa. Alatala nojanji ante netunda kana maria sambaꞌa nggari muli i Daud banepia raonggotaka majadi magau nasimbayu ewa i Daud mboto. a Etu sampe i Daud nombaboto Magau to Mompakasalama iweꞌi:
‘Iꞌa daꞌa rapalamba maboli riara dunia ntomate,
korona daꞌa rapalamba riara dayo sampe mapopo.’ (Mzm. 16:10)
32 Yesus etumo to nipatuju tesa i Daud etu, sabana Iꞌamo to nipakatuwu Alatala bali. Kami pura-pura eꞌi najadi sabina sabana ante mata kami mboto kami nanggita Iꞌa natuwu bali.
33 Iꞌa nionggotaka Alatala ri petoꞌo to nibila ri sabingga ngganana ri suruga. Pade nitarimana Nosa Nagasa to nijanji Umana Pue Alatala bopia. Jadi sampesuwu-sampesuwu, to nikita komi pade to niepe komi weꞌi-weꞌi najadi sabana kuasa Nosa Nagasa etu to niwai Yesus ka kami.
34 Jadi daꞌa korona mboto to nipatuju tesa Magau Daud to niuli kami paneꞌa, sabana natantu daꞌa i Daud to natuwu bali pade neore mpaka ri suruga. Tapi i Daud nanguli,
‘Pue Alatala nanguli ka Pueku,
kamai pekatokomo ri sabingga ngganaku
35 sampe Aku mompowia pura-pura balimu mekou ri jaꞌimu.’ (Mzm. 110:1)
36 Jadi kana ranjani pura-pura to Israel, natantumo Yesus eꞌi to nipaku komi ri kayu parika, Iꞌamo to nionggotaka Alatala majadi Pue pade Magau to Mompakasalama!”
37 Tempo tau dea nangepe tesa i Petrus etu, nanjoso rara mpuꞌumo ira. Pade nekutanamo ira ka i Petrus bo suro-suro ntanina, “Sampesuwu-sampesuwu, ane iwetu, nuapa masipato rapowia kami?”
38 Nesonomo i Petrus, “Komi kana majea nggari silaka komi, pade komi kana radiu sambaꞌa bo sambaꞌa ante sanga Yesus Kristus ala silakamu raampungi. Pade Alatala kana mombawai ka komi Nosa Nagasana.
39 Pojanji Alatala eꞌi niwaina ka komi pura-pura, pade ka muli nu muli komi, pade ka tau-tau ri ngata nakawao. Pojanjina etu niwai Pueta Alatala ka pura-pura tau to nipokiona marata ri jaꞌina.”
40 Daꞌa aga iwetu tesa i Petrus, tapi ante nadeapa tesa ntanina iꞌa notarangga ka ira. Pade nipopanjanina ka ira, “Pogaꞌamo komi ante tau to nadenggo rarana ri dunia weꞌi-weꞌi sabana ira kana rasuku Alatala!”
41 Naopu nangepe tesa i Petrus, nadeamo tau to nomparasaya tesana etu, pade ira nidiu ewa tandai ira topomparasaya i Pue Yesus. Pade ri eo etu kadea ntau to nomparasaya i Pue Yesus natetambai woꞌumo tolunjobu mbaꞌa kadeana.
42 Topomparasaya i Pue Yesus to nabou etu nabati mpuꞌu neguru nggari jaꞌi suro-suro, pade ira tunggai nasiromu mpasanggani-nggani. Ira naoso nanggoni bo nosambaya mpasanggani-nggani.
Katuwu topomparasaya i Pue Yesus
43 Nadea mpuꞌu kabaraka bo tandai nipogumaa to nipowia nu suro-suro sampe nogumaa puramo todea.
44 Pura-pura topomparasaya nosaongu rara, pade nuapa-nuapa to naria ri jaꞌi ira nipake ira mpasanggani-nggani.
45 Kayuaya pade mbara-mbara ira nipobalu pade doina etu nibagi-bagi ka isema-sema to naria paraluuna.
46 Eo-eo ira tunggai nasiromu ri Sapo Mpepue. Ira pura-pura nanggoni mpasanggani-nggani ri sapo-sapo ira ante nadamba bo naede rara.
47 Daꞌa nenonto-nonto ira nombatoiya Pue Alatala. Pura-pura todea ntanina nombabila ira. Pade eo-eo i Pue nantambai ka ira tau-tau ntanina to nipakasalamana.