TUNTU POWIA NU
SURO-SURO I PUE YESUS
1
Teofilus to nibila, riara bukuku pamulana nitulisiku ka komi ewa pura-pura nuapa to nikawia pade to nipatuduki Yesus nggari pamulana
2-3 sampe Iꞌa neore mpaka ri suruga. Nitulisiku woꞌu iwenu Iꞌa nipandasa sampe namate pade iwenu Iꞌa natuwu bali nggari kamatena. Naopu Iꞌa natuwu bali, nadea ngganimo nipopokitana korona ka anaguru-anaguruna to nipelisina bopia, ala ranjani ira mpuꞌu-mpuꞌu Iꞌa natuwu bali. Riara tempo patampulu mbengina ira nanggita Iꞌa, pade Iꞌa nompatuduki ka ira ewa Poparenta nu Alatala. Pade ante kuasa Nosa Nagasa Iꞌa nombawai parentana ka anaguru-anaguruna.
4 Tempo Iꞌa nasiromu ante ira, nitewaina ka ira, “Neꞌe komi mompalasi ngata Yerusalem. Popea ntani ruru ri setu sampe Umaku Pue Alatala mompopanaꞌu ka komi Nosa Nagasana to nijanjina, ewa to niuliku ka komi bopia.
5 Toramo! Yohanes nombadiu tau ante ue ewa tandaina najeamo ira nggari silaka. Tapi riara bara sakuya mbengipa komi kana radiu ante Nosa Nagasa nu Alatala.” a
Yesus neore mpaka ri suruga
6 Tempo anaguru-anaguruna etu nasiromu nosanggani ante Yesus, ira nekutana ri jaꞌina, “Pue, weꞌi-weꞌi Komi mombakabasaka kita to Israel nggari balita ala kita mamala momparenta ngatata mboto?”
7 Nesonomo Yesus, “Umaku mboto to nakuasa mompakatantu nepia etu majadi. Etu daꞌa miki ranjani komi.
8 Tapi komi kana mantarima kuasa ane Nosa Nagasa nu Alatala manaꞌu ri jaꞌi komi. Pade komi kana mompatolele karebaku ka tau-tau ri ngata Yerusalem, pade ri pura-pura Bagia Yudea ante Bagia Samaria, sampe ri umba-umba ri dunia.”
9 Naopu Yesus notesa iwetu, nateonggotakamo Iꞌa nggari ngayo ira mpaka ri suruga nikita nu mata ira mboto, pade kulimu nombabungu Iꞌa nggari panggita ira.
10 Tempo ira danantingoa langi nanggita Yesus neore etu, sampegoli naria rombaꞌa malaeka to nopakea naputi nenggore ri sinjori ira.
11 Nangulimo malaeka etu, “Umba komi, to Galilea! Nokuya komi aga mpanggoremo ri setu nantingoa langi? Yesus to nikita komi neore nggari ngayo komi mpaka ri suruga paniꞌa kana marata bali ri dunia eꞌi nasimbayu ewa nikita komi paneꞌa.”
Matias nipelisi manjambei Yudas
12 Naopu etu natinggulimo anaguru-anaguru Yesus nggari Bulu Zaitun mpaka ri ngata Yerusalem. Bulu etu kakawaona kira-kira saongu kilo nggari Yerusalem.
13 Narata ri Yerusalem nalaumo ira ri sapo nipetoꞌo ira pade nepone ri tombi kalangana. Sanga nu anaguru-anaguruna etumo: i Petrus, Yohanes, Yakobus, Andreas, i Filipus, i Tomas, i Bartolomeus, i Matius, Yakobus ana Alfeus, i Simon tau to Zelote, pade Yudas ana Yakobus.
14 Daꞌa nenonto ira pura-pura nasiromu nosaongu rara nosambaya. Nosanggani-nggani ante ira naria woꞌu bara sakuya mbaꞌa besi bo i Maria indo Yesus, ante sampesuwu-sampesuwu Yesus.
15 Naria saeo ira pura-pura nasiromu kira-kira satu rompulu mbaꞌa kadeana. Ri setu nekanggoremo i Petrus ri tatongo topomparasaya i Pue Yesus pade nanguli,
16 “Sampesuwu-sampesuwu pura-pura, kana nadupamo nuapa to nitulisi riara Buku Nagasa ewa Yudas. Tempo nggaolu Magau Daud nombaboto tesa nggari jaꞌi Nosa Nagasa ewa Yudas, roata to nanggeni tau nanjoko i Pue Yesus.
17 Yudas etu sambaꞌa roata, sabana iꞌa nipelisi i Pue Yesus mboto mokarajaa mpasanggani-nggani ante kita.”
18 (Yudas etu nangoli salimpu tana ante doi to niratana nggari powiana to najaꞌana. Ri tana etu iꞌa namate nanawu. Taꞌina nasemparaka sampe isi rarana nakamburaka nesuwu ri sawalikuna.
19 Pura-pura tau netoꞌo ri ngata Yerusalem nangginjani nuapa to najadi etu. Etumo sabana tana etu nipoposanga ira Akeldama, to naria batuana riara basa ira mboto “Tana Nikabubu nu Lei”.)
20 Nanguli woꞌumo i Petrus, “Riara Buku Mazmur naria tesa nosinggawela ante Yudas iweꞌi:
‘Palambamo sapo petoꞌona majadi maboa.
Neꞌe rawai tau metoꞌo riarana.’ (Mzm. 69:26)
Pade naria woꞌu to nitulisi iweꞌi:
‘Agina pekatokona raala tau ntanina.’ (Mzm. 109:8)
21-22 Jadi etumo sabana kita kana mompelisi sambaꞌa tau nggari tatongota mantuki kita mompatolele ka tau i Pue Yesus natuwu bali nggari kamatena. Tau rapelisita etu kana sambaꞌa tau bate-batena nosanggani-nggani ante kami nantuki i Pue Yesus nompamula nggari tempo Yohanes nombadiu tau sampe ri tempo i Pue Yesus neore mpaka ri suruga.”
23 Jadi nggari tatongo topomparasaya i Pue Yesus etu rombaꞌa tau nipakatantu ira rapelisi manjambei i Yudas, etumo Yusuf Barsabas (iꞌa woꞌu nidae Yustus) ante i Matias.
24-25 Naopu etu nosambayamo ira, “Pue, ninjanimu isi rara ntaꞌi pura-pura manusia. Yudas nalau nompalasi pobagona ewa anagurumu pade namate nalau mpaka ri petoꞌo to masipato ante powiana. Jadi popokita ka kami isema nggari rombaꞌa tau eꞌi to nipelisimu manjambei Yudas mokarajaa mosanggani ante kami mompatolele tesamu.”
26 Naopu nosambaya ira nantendeaka nomoro. Sanga i Matias to nawelana. Jadi nompamula nggari eo etu i Matias nireke sambaꞌa nggari sampulu rombaꞌa anaguru i Pue Yesus.