Pura-pura to nipajadi PUE kana mantoiya Iꞌa
148
Ratoiyata i PUE!Toiyamo i PUE ri suruga,
toiyamo Iꞌa ri petoꞌo to nalangana!
2 Umba komi malaeka-malaeka-Na, toiyamo Iꞌa!
Umba komi pura-pura tantara-Na, toiyamo Iꞌa!
3 E mata eo bo wula, toiyamo Iꞌa!
E pura-pura betuꞌe to naremena, toiyamo Iꞌa!
4 E langi to neliu nggalanga, toiyamo Iꞌa!
E ue ri baꞌa nu langi, toiyamo i PUE!
5 Pura-pura etu kana mantoiya sanga i PUE,
sabana nggari parenta-Na pura-pura etu nipajadi.
6 Iꞌa nompakatantu petoꞌona pura-pura sampe ri kasae-saena,
bo to nipakatantu-Na etu daꞌa namala rabali.
7 E ule naga bo pura-pura tasi,
toiyamo i Pue!
8 E kila, uja es, salju, kulimu,
bo poiri ntasi to nantuki parenta-Na, toiyamo Iꞌa!
9 E bulu-bulu bo bunti-bunti,
kayu-kayu to nikoni wuana bo mpengele kayu bete,
10 binata naila bo mpengele pompatuwu,
binata-binata nekanjoyo bo tonji-tonji to nokapi, toiyamo Iꞌa!
11 Umba komi magau-magau ri dunia bo tau-tau nggari njumaongu ngata,
pura-pura madika bo topoparenta,
12 pura-pura kabilasa bo randoo,
totuꞌa-totuꞌa bo ngana-ngana muda, toiyamo Iꞌa!
13 Ira pura-pura kana mantoiya i PUE
sabana aga sanga-Na to masipato rabila,
kagaya bo kabete kuasa-Na neliu nggari langi bo dunia.
14 Iꞌa nompakaroso todea-Na,
sampe Iꞌa nitoiya pura-pura tau to natutu nomparasaya Iꞌa,
etumo tau to Israel, todea to nipotowe-Na.
Ratoiyata i PUE!