Dade ka Alatala to neliu nggakuasa
147
Ratoiyata i PUE!Nabelo mpuꞌu modade mantoiya Alatalata.
Powia etu nompakadamba rarata, bo masipato rapowia.
2 PUE nompakabelo bali kota Yerusalem,
nipasiromu-Na mpanjili tau-tau to Israel to niposimpotatare ri ngata tau ntanina.
3 Iꞌa nompakabelo tau to naopu rarana,
bo nombawewe bela-bela ira.
4 Iꞌa nompakatantu kadea betuꞌe ri langi,
bo nompoposanga pura-pura betuꞌe etu.
5 Nabete bo nakuasa mpuꞌu i PUE to nisombata,
noto-Na daꞌa ria pantaꞌana.
6 PUE nantulungi tau to nipandasa,
tapi tau najaꞌa nitijaka-Na mpaka ri tana.
7 Podademo ka i PUE ante dade posukuru,
toiyamo Alatalata ante mokanda kacapi!
8 Iꞌamo to nombabungu langi ante kulimu,
bo nompakasadia uja ka dunia,
to nompakatuwu kawoko ri bulu-bulu.
9 Iꞌa woꞌu nombawai panggoni ka binata,
bo ka ana ntonji kolaa to nokakaa-kaa.
10 To nipokono-Na daꞌa jara to naroso,
to nipodamba-Na daꞌa woꞌu kada langgai to nadisina.
11 To nipodamba i PUE tau-tau to nekou ri jaꞌi-Na,
bo tau-tau to nanjarumaka towe-Na to daꞌa ria kaopu-opuna.
12 Umba komi todea Yerusalem, toiyamo i PUE!
Umba komi pue ngata Sion, toiyamo Alatala to nisomba komi!
13 Sabana Iꞌa nompakaroso bobaa kotamu,
bo nombagane komi pura-pura.
14 Iꞌa nombajagai ngatamu ala batena naꞌama,
bo nompakabosu taꞌi komi ante gando to nabelona.
15 Niwai-Na parenta-parenta-Na ka dunia,
pade ante nasalisa tesa-Na natolele.
16 Nipopanaꞌu-Na salju ewa wulu bimba,
bo nikamburaka-Na loi nu betuꞌe to nakoꞌo ewa es.
17 Nipakadunggu-Na uja es ewa watu nggedi;
daꞌa ria tau nompakule mantaꞌamaka poiri-Na to naleni.
18 Notesamo Iꞌa pade nagonu puramo es etu.
Nipopeburu-Na poiri-Na sampe es etu noili ewa ue.
19 Nipopanjani-Na tesa-Na ka Yakub,
pura-pura janji bo atura-atura-Na ka tau to Israel.
20 Daꞌa nipopanjani-Na etu ka tau-tau nggari ngata ntanina,
daꞌa ninjani ira atura-atura-Na.
Ratoiyata i PUE!