Dade nantoiya i PUE
146
Ratoiyata i PUE! Notesamo aku riara ntaꞌiku,toiyamo i PUE!
2 Aku madota mantoiya i PUE sampe kaopu katuwuku,
bo modade ka Alatala to nisombaku tempo aku danaria.
3 Neꞌe manjarumaka magau,
bara manusia to daꞌa nompakule mompakasalama.
4 Ane malaimo nosana ira matingguli majadi tana,
pade eo etu woꞌu pura-pura nia ira malipo.
5 Nasana mpuꞌu tau to nanjarumaka petulungi Alatala to nisomba Yakub.
Nasana mpuꞌu tau to nanjarumaka i PUE, Alatala to niparasayana.
6 Iꞌamo to nompajadi langi bo dunia,
tasi bo mpengele-ngele isina.
Iꞌa namala raparasaya sampe ri kasae-saena.
7 Iꞌa nanjaliku tau-tau to nipandasa,
bo nombawai panggoni ka tau to naoro taꞌi.
PUE nanggabasaka tau-tau to nitarunggu,
8 bo nompakabelo mata tau-tau naburo.
Iꞌa nompakaroso rara tau-tau to naopu rara,
bo nompotowe tau to nanoa.
9 PUE nanjaliku tau-tau topesowo.
Nitulungi-Na ngana pailu bo tobalu besi,
tapi nilawa-Na nia tau-tau najaꞌa.
10 PUE kana moparenta sampe ri kasae-saena.
Umba komi todea ri kota Sion, Alatalamu moparenta sampe ri muli nu muli.
Ratoiyata i PUE!