Dade nantoiya i PUE
145
Dade i Daud. aO Alatalaku, Magauku, aku madota mantoiya Komi,
bo mantoiya sanga-Mu sampe ri kasae-saena.
2 Eo-eo aku madota mantoiya Komi,
bo mompakabete sanga-Mu sampe ri kasae-saena.
3 Nabete mpuꞌu kuasa i PUE bo masipato ratoiya,
kabete kuasa-Na daꞌa mesua ri akala manusia.
4 Nggari muli nu muli manusia mantoiya powia-Mu,
bo mompatolele kabaraka-Mu.
5 Ira kana mantesa kagaya-Mu bo kabete kuasa-Mu,
bo powia-powia-Mu to nipogumaa kana kutondoaka.
6 Ira kana mompatolele powia-powia-Mu to nipogumaa,
bo kabete kuasa-Mu kana kupatolele.
7 Ira kana mompatolele pura-pura kabelo-Mu,
bo modade mantoiya kanoa-Mu.
8 PUE etu naꞌasi mata bo natowe,
nandate posabara-Na bo nabete mpuꞌu towe-Na to daꞌa ria kaopu-opuna.
9 PUE nabelo ri jaꞌi pura-pura tau,
bo naꞌasi mata-Na ri jaꞌi pura-pura to nipajadi-Na.
10 O PUE, pura-pura to nipajadi-Mu kana mosukuru ri jaꞌi-Mu,
bo pura-pura todea-Mu kana mantoiya Komi.
11 Ira kana mompatolele kagaya bo kabelo poparenta-Mu,
bo mantesa kabete kuasa-Mu.
12 Ante iwetu pura-pura manusia kana manginjani kabete kuasa-Mu,
bo kagaya poparenta-Mu to nipogumaa.
13 Poparenta-Mu batena maria sampe ri kasae-saena,
bo kakuasa-Mu maroo sampe ri muli nu muli.
PUE batena nompakadupa janji-Na,
bo pura-pura powia-Na nompopokita towe-Na to daꞌa ria kaopu-opuna.
14 PUE nantulungi pura-pura tau riara kasusa,
bo nompakaroso rara tau to naopu rara.
15 Pura-pura to natuwuna nanjarumaka Komi,
pade Komi nombawai panggoni ka ira ri tempona.
16 Komi nompakagana pura-pura to niparaluu ira,
sampe ira daꞌa napepa.
17 PUE nanoa riara pura-pura to nipowia-Na,
bo pura-pura powia-Na nompopokita towe-Na to daꞌa ria kaopu-opuna.
18 PUE namosu ri jaꞌi pura-pura tau to nekakai ka Iꞌa,
etumo tau-tau to nekakai ka Iꞌa ante mpuꞌu-mpuꞌu rara.
19 Iꞌa nompoiyo pomperapi tau-tau to nekou ri jaꞌi-Na,
Iꞌa nangepe pekakai ira,
bo nompakasalama ira.
20 Iꞌa nanggalendu tau to nompotowe Iꞌa,
tapi nompakaropu pura-pura tau najaꞌa.
21 Aku madota mantoiya i PUE.
Perapi pura-pura to nipajadi-Na mantoiya sanga-Na to nagasa,
sampe ri kasae-saena.