Magau nosukuru ka i PUE
144
Dade i Daud.Ratoiyata i PUE, to nanggalendu aku ewa watu dapala to narosona.
Iꞌa nompatuduki aku nosibali,
bo nompaguru aku nosipatesi.
2 Iꞌamo petoꞌo pekalenduku, bo walaku to narosona,
kota pekalenduku bo Topompakasalama aku.
Iꞌa ewa kaliawo to nanggalendu aku,
Iꞌa nompowia tau nggari ngata-ngata ntanina nekou ri jaꞌiku!
3 O PUE, isema tanu manusia sampe nipariara ntaꞌi-Mu?
Isema manusia sampe nipeili-Mu?
4 Manusia etu nasimbayu ewa nosa nisuupaka,
katuwuna ewa wayo to nalipo riara sampida mata.
5 O PUE, beamo langi pade panaꞌumo,
tuimo bulu-bulu sampe mosumoa!
6 Poporeamo kila-Mu ala bali-baliku mosimpotatare,
kabasakamo kila-Mu ewa mata nu pana, sampe ira magado!
7 Ulunjakamo pale-Mu nggari suruga,
pakasalamamo aku nggari ue nanggabuntu to mepakamate,
bo nggari kuasa tau-tau nggari ngata ntanina.
8 Ira nabiasa nebagiu
bo nojanji dawa.
9 O Alatala, Aku madota modade dade to nabou ka Komi,
aku madota modade ante mokanda gambusu sampulu luina.
10 Komi nombawai padagi ka magau-magau,
bo nanggabasaka batua-Mu i Daud!
11 Kabasakamo aku nggari guma ntau to najaꞌa,
bo pakasalamamo aku nggari riara mpale tau-tau topesowo,
to nabiasa nebagiu,
bo nojanji dawa.
12 Perapi ana-anata langgai majadi ewa tuja-tuja,
to matuwu majadi mabete tempo danamuda.
Perapi ana-anata besi majadi ewa tinja to naroso ri siduna,
to nipaꞌa ala mompakagaya sapo magau!
13 Perapi logo-logota maponu
ante mpengele-ngele asele ntana.
Perapi towau bo bimbata moana madea sampe njobu-njobu,
bo mpulu-mpulu njobu ri pampa-pampata.
14 Perapi japi-japita moana madea;
perapi daꞌa ria to matonto bara malonju.
Perapi daꞌa ria tau-tau to nongare nandasa,
ri jala-jala riara ngatata.
15 Nasana mpuꞌu tau-tau to nabelo katuwuna etu!
Nasana mpuꞌu tau-tau aga nombasomba i PUE!