Posambaya merapi tulungi mantingayo bali
143
Dade i Daud.O PUE, epemo posambayaku,
petalingamo pomperapiku!
Sonomo aku sabana Komi namala raparasaya,
poiyomo posambayaku sabana komi nanoa.
2 Aku eꞌi batua-Mu. Neꞌe ratangara Komi aku,
sabana ri olo tau to natuwuna daꞌa ntoto naria to nanoa riara mpanggita-Mu.
3 Baliku nombaraga-raga aku,
bo nompatundu aku.
Ira nombasuaraka aku riara petoꞌo to narumau,
ewa tau to nasaemo namate.
4 Jadi naopumo raraku,
naingu mpuꞌu aku.
5 Aku nantora powia-powia-Mu ri tempo nggaulu,
aku nantondoaka pura-pura pokarajaa-Mu,
bo nompekiri powia mpale-Mu.
6 Aku nantinande pale ri jaꞌi-Mu,
bo raraku nalentora ka Komi ewa tana to nangau nomparaluu ue.
7 O PUE, pakasalisamo mombasono aku,
sabana naopumo raraku!
Neꞌe mantubengo aku,
ala neꞌe aku majadi ewa tau namate.
8 Popatoramo aku mpadondo-mpadondo mantora towe-Mu to daꞌa ria kaopu-opuna,
sabana Komimo to niparasayaku!
Tujuraka ka akumo jala to kutuki,
sabana aga ri jaꞌi-Mu aku mosambaya.
9 O PUE, kabasakamo aku nggari bali-baliku,
aga ri jaꞌi-Mu kupekalendu!
10 Patudukimo aku mantuki dota-Mu,
sabana Komimo Alatalaku!
Perapi Nosa Nagasa-Mu
mombanini aku ri jala to nadelena.
11 O PUE, pakasalamamo aku ala sanga-Mu ratoiya,
kabasakamo aku nggari kasusa sabana Komi nanoa.
12 Pakaropumo bali-baliku,
sabana Komi nompotowe aku,
bo patesimo pura-pura tau to nompandasa aku,
sabana aku eꞌi batua-Mu!