Mazmur 142

Posambaya merapi tulungi tempo nasusa

Dade pepatuduki Daud tempo iꞌa netabuni riara bololia.

2 Ante suara naroꞌo aku nekakai ka i PUE,

ante suara nagai aku nerapi asi mata-Na.

3 Ri ngayo-Na aku nantesa pura-pura kasusaku,

bo pura-pura kasusa raraku nitesaku ri jaꞌi-Na.

4 Tempo aku ntora naopu rara,

Komi nanginjani nuapa to nirasaiku.

Ri jala to nitukiku

baliku nantaꞌa tandoko nggalino nombasoꞌo aku.

5 Kitamo ri sabingga ngganaku;

daꞌa ria tau nantulungi aku.

Daꞌa ria to nanjaliku aku,

bo daꞌa ntoto ria tau nompeili aku.

6 O PUE, aku nekakai ka Komi!

Komimo petoꞌo pekalenduku.

Aga Komimo to najadi bagiaku riara nggatuwuku.

7 Pariarantaꞌimo pekakaiku,

sabana nandasa mpuꞌumo aku.

Pakasalamamo aku nggari tau-tau to nombaraga aku,

sabana neliu nggarosopa ira pade aku.

8 Kabasakamo aku nggari kasusa ewa kasusa ntau riara tarunggu,

ala aku mamala mantoiya sanga-Mu.

Tau-tau to nanoa kana marata mombatoiya Komi mosanggani ante aku,

sabana Komi nowia belo ri jaꞌiku.