Posambaya riara kasusa
141
Dade i Daud.O PUE, aku mekakai ri jaꞌi-Mu, pakasalisamo marata ri jaꞌiku,
epemo pekakaiku!
2 Perapi posambayaku majadi ewa dupa pesomba ri ngayo-Mu,
bo paleku to nionggotaka tempo nosambaya majadi ewa pesomba ngguwiana.
3 O PUE, jagaimo sumbaku,
bo jagaimo jilaku motesa!
4 Pakakawaomo aku nggari dota rara moinggu majaꞌa,
bara mowia kajaꞌana
mosanggani ka tau-tau najaꞌa.
Bo neꞌe aku manggoni ri posusa ira.
5 Ane maria tau nanoa mangontiaka aku,
etu tandaina iꞌa nompotowe aku.
Ane iꞌa mompatuduki aku,
etu tandaina iꞌa nowia belo ri jaꞌiku.
Neꞌe aku mompoara powiana etu.
Tapi aku batena mosambaya mangewa powia tau najaꞌa.
6 Ane rapana topanggeniaka-topanggeniaka tau najaꞌa etu rajuꞌanaka nggari bingge,
kana ranjani ntau najaꞌa etu tesa-tesa to niuliku mpuꞌu-mpuꞌu nakono.
7 Ira kana manguli, “Wuku-wukuta rakamburaka ri ngayo dayo,
nasimbayu ewa watu nibingga bo nipakarege ri tana.
8 Tapi O PUE, Alatala to nisombaku,
aga Komi to nisarumakaku.
Neꞌe rapakamba aku mamate.
9 Kabasakamo aku nggari tandoko to nitaꞌa ntau najaꞌa ka aku,
bo nggari jaꞌi ntau to nonia jaꞌa ri jaꞌiku.
10 Pakambamo tau-tau najaꞌa rasoꞌo tandoko ira mboto,
tapi aku daꞌa mawela.