Posambaya merapi rakalendu nggari tau najaꞌa
140
Dade i Daud ka topopalu dade.2 O PUE, kabasakamo aku nggari jaꞌi ntau najaꞌa,
jagaimo aku nggari tau to nompandasa aku.
3 Ira nonia jaꞌa riara ntaꞌi ira,
pade eo-eo nompopeumba posinggarau.
4 Jila ira ewa bisa nu ule,
tesa-tesa ira ewa bisa nu ule wuri.
5 O PUE, kalendumo aku nggari kuasa tau najaꞌa,
jagaimo aku nggari jaꞌi ntau to nompandasa aku,
bo madota mompanawu aku.
6 Tau to nalanga rarana nantaꞌa tandokona nggalino ka aku,
ira nompake lui majadi tandoko.
Pumpu jala ira nantaꞌa tandoko
ala manjoko aku.
7 O PUE, aku manguli, “Komimo Alatalaku,
epemo pomperapiku!”
8 PUE, Alatala to nisombaku, Topompakasalama aku to naroso,
Komi nanggalendu aku tempo riara mposibali.
9 O PUE, neꞌe ratarima pomperapi tau najaꞌa,
bo neꞌe rapakamba nia ira moasele!
10 Neꞌe rapakamba baliku padagi;
pakambamo tesa jaꞌa ira mawela ira mboto!
11 Pakambamo ira rapakawela ruti nu apu,
bo ratijaka riara lowu to nandala,
sampe mana mamala mesuwu!
12 Neꞌe rapakamba tau to nompakajaꞌa tau ntanina metoꞌo ri dunia;
palambamo tau to nompandasa roana rapakawela kasusa.
13 Ninjaniku PUE nanoa ri jaꞌi ntau to nipandasa,
bo nanjaliku tau nakasiasi riara mpotangara.
14 Tau-tau to nanoa kana mantoiya sanga-Mu,
ira kana metoꞌo mpasanggani ante Komi.