Alatala nombajagai bo nanginjani pura-pura to nipajadi-Na
139
Dade i Daud ka topopalu dade.PUE, Komi nomparesa rara ntaꞌiku
bo nanginjani katuwuku.
2 Ninjani-Mu ane aku nekatoko bara nekanggore,
bo ninjani-Mu pompekiriku nau nakawao.
3 Komi nanggita aku, ane aku nolumako bara naturu;
ninjani-Mu pura-pura powiaku.
4 O PUE, daꞌapa aku notesa,
ninjani-Mu mamimo nuapa to kutesa.
5 Komi nanggalendu aku ntiku-ntiku,
bo nombajagai aku ante kuasa-Mu.
6 Panginjani etu nipogumaaku,
nakaja gaga ninjaniku, daꞌa nesua ri pekiriku.
7 Mpaka ri umba kukalau malai nggari jaꞌi-Mu?
Ri umba kupangowa malai nggari ngayo-Mu?
8 Ane aku meore mpaka ri langi, Komi naria ri saꞌa.
Ane aku maturu ri petoꞌo ntau namate, Komi woꞌu naria ri saꞌa.
9 Ane aku membua mpaka ri pebuluna,
bara maroo makawao ri kasolona,
10 ri setu woꞌu Komi manggeniaka aku,
bo pale nggana-Mu mombanini aku.
11 Ane aku merapi rumau mombabungu aku,
bo reme ri ntaliliku majadi rumau,
12 karumauna etu daꞌa narumau nikita-Mu.
Nggawengina najadi nareme ewa eona,
sabana rumau bo reme nasimbayu riara mpanggita-Mu.
13 Komi nompowia pura-pura koroku,
Komi nompajadi aku riara ntaꞌi indoku.
14 Aku nosukuru ri jaꞌi-Mu sabana aku nipajadi ante baraka-Mu to daꞌa ria kasimbayuna.
Powia-Mu etu nabaraka bo nipogumaa,
pade pura-pura etu ninjaniku mamimo.
15 Wuku-wukuku nikita-Mu,
tempo aku nipandu ri petoꞌo to daꞌa namala nikita ntau,
tempo aku nipajadi riara ntaꞌi indoku.
16 Komi nanggita aku tempo aku da riara ntaꞌi indoku.
Riara buku-Mu nitulisi puramo
eo to nipakatantu-Mu ka aku,
daꞌapa aku niote.
17 O Alatala, nakaja mpuꞌu manginjani pekiri-Mu,
neliu mpuꞌu kadeana.
18 Ane aku mamala mombareke, neliu nggadeapa nggari bone.
Ane aku menonto mombareke, daꞌapa woꞌu ninjaniku pekiri-Mu.a
19 O Alatala, perapi tau-tau najaꞌa rapatesi Komi,
ala topepatesi makawao nggari jaꞌiku.
20 Ira notesa najaꞌa nanguli Komi,
bo nangewa Komi nau daꞌa ria gunana.
21 O PUE, nawua mpuꞌu mataku nanggita tau-tau to nawua mata ka Komi,
bo nagigi mpuꞌu raraku nanggita tau-tau to nangewa Komi!
22 Nawua mpuꞌu mataku nanggita ira;
ira nirekeku baliku.
23 O Alatala, paresamo aku ala ranjani Komi rara ntaꞌiku.
Ujimo aku ala ranjani Komi pekiriku.
24 Kitamo ane maria pokaingguku to najaꞌa,
bo ninimo aku mantuki jala-Mu sampe ri kasae-saena.