Posambaya posukuru
138
Dade i Daud.O PUE, aku madota mosukuru ri jaꞌi-Mu ante mpuꞌu-mpuꞌu raraku,
aku madota mantoiya Komi ri ngayo pue-pue ntanina.
2 Aku kana motimbakotu mantingayo sapo-Mu to nagasa,
bo mantoiya sanga-Mu,
sabana towe-Mu daꞌa ria kaopu-opuna,
bo Komi namala raparasaya.
Komi nompakabete sanga-Mu bo janji-Mu,
neliu nggari mpengele-ngele.
3 Tempo aku nekakai, Komi nombasono aku.
Komi nompakaroo raraku sampe aku najadi nabia.
4 O PUE, pura-pura magau ri dunia kana mosukuru ri jaꞌi-Mu,
sabana niepe iramo janji-Mu.
5 Ira kana modade mantoiya powia-Mu,
sabana neliu mpuꞌu kuasa bo kagaya-Mu.
6 Naupa Komi netoꞌo nakawao ri kalangana,
tapi Komi nompariarantaꞌi tau to nandasa katuwuna,
bo ninjani-Mu pokainggu ntau to nalanga rarana.
7 Naupa aku nirata kasusa,
Komi nombajagai katuwuku.
Komi nangewa baliku tempo ira nanggarau,
pade Komi nompakasalama aku ante kuasa-Mu.
8 PUE kana mompakadupa janji-Na ka aku!
O PUE, towe-Mu daꞌa ria kaopu-opuna.
Neꞌe Komi manggalinga todea to nipowia mpale-Mu!