Kasusa rara ri wiwi binangga ri Tana Babel
137
Ri wiwi binangga-binangga ri Tana Babel,kami nekatoko notumangi nantora kota Sion a to nagero.
2 Ri rangga kayu ri setu
kami nombasoda kacapi.
3 Ri setumo tau-tau to nanjoko bo nanggeni mpalai kami,
nompakau kami modade ka ira,
bo tau-tau to nompandasa kami
nompakau kami modade madamba-damba.
Niuli ira, “Podademo ka kami dade nggari Sion!”
4 Iwenumo kami modade mantoiya i PUE
ri ngata tau ntanina?
5 Ane aku manggalinga kota Yerusalem,
pakambamo aku mana mompakule mokanda kacapi!
6 Pakambamo jilaku mentaka ri ngareku,
ane aku daꞌa mantora kota etu,
ane Yerusalem daꞌa kupajadi
puꞌu kadamba nu raraku!
7 O PUE, toramo powia to Edom
tempo kota Yerusalem nigero!
Ira nanguli, “Geromo kota etu!
Geromo sampe ri pandasina!”
8 E, komi todea Babel, komi kana rapatesi!
Masana mpuꞌu tau-tau to mombabalasi kajaꞌa
to nipowia komi ka kami!
9 Masana mpuꞌu tau to mangala ana-ana nggedimu,
bo mompanggaboba ira ri bunggu watu!