Dade posukuru
136
Posukurumo ri jaꞌi PUE sabana Iꞌa nabelo!Towe-Na daꞌa ria kaopu-opuna.
2 Posukurumo ri jaꞌi Alatala to Neliu Nggalanga nggari pue-pue ntanina.
Towe-Na daꞌa ria kaopu-opuna.
3 Posukurumo ri jaꞌi Pue to Neliu Nggakuasa nggari pue-pue ntanina!
Towe-Na daꞌa ria kaopu-opuna.
4 Aga Iꞌa to nompowia kabaraka-kabaraka to nabetena!
Towe-Na daꞌa ria kaopu-opuna.
5 Ante noto-Na Iꞌa nompajadi langi!
Towe-Na daꞌa ria kaopu-opuna.
6 Iꞌa nombatale dunia ri bunggu nu ue!
Towe-Na daꞌa ria kaopu-opuna.
7 Iꞌa nompajadi pura-pura to nompakareme ri langi.
Towe-Na daꞌa ria kaopu-opuna.
8 Eo nompakareme tempo eona.
Towe-Na daꞌa ria kaopu-opuna.
9 Wula bo betuꞌe nompakareme tempo nggawengina!
Towe-Na daꞌa ria kaopu-opuna.
10 Nipatesi-Na ana-ana ulumbua to Masir.
Towe-Na daꞌa ria kaopu-opuna.
11 To Israel nikeni-Na nalai nggari Tana Masir.
Towe-Na daꞌa ria kaopu-opuna.
12 Nikeni-Na ira ante kuasa-Na to nabete!
Towe-Na daꞌa ria kaopu-opuna.
13 Nibingga-Na Tasi Lei a najadi robingga.
Towe-Na daꞌa ria kaopu-opuna.
14 Todea Israel nikeni-Na newote mpaka ri sambotena.
Towe-Na daꞌa ria kaopu-opuna.
15 Tapi magau Masir ante tantarana nipakatala-Na ri Tasi Lei!
Towe-Na daꞌa ria kaopu-opuna.
16 Nikeniaka-Na todea Israel nolumako noliu ri karawa baina.
Towe-Na daꞌa ria kaopu-opuna.
17 Nidagi-Na magau-magau to naroso.
Towe-Na daꞌa ria kaopu-opuna.
18 Nipatesi-Na magau-magau to nakuasa.
Towe-Na daꞌa ria kaopu-opuna.
19 Etumo Sihon magau nto Amori.
Towe-Na daꞌa ria kaopu-opuna.
20 Bo Og magau nto Basan.
Towe-Na daꞌa ria kaopu-opuna.
21 Tana ira niwai-Na ka todea-Na majadi tana ira sampe ri muli nu muli.
Towe-Na daꞌa ria kaopu-opuna.
22 Tana etu najadi bagia batua-batua-Na to Israel.
Towe-Na daꞌa ria kaopu-opuna.
23 Daꞌa nikalinga-Na kita to Israel tempo nidagi.
Towe-Na daꞌa ria kaopu-opuna.
24 Bo nikabasaka-Na kita nggariara mpale balita.
Towe-Na daꞌa ria kaopu-opuna.
25 Niwai-Na panggoni ka pura-pura to natuwuna.
Towe-Na daꞌa ria kaopu-opuna.
26 Posukurumo ri jaꞌi Alatala to Neliu Nggakuasa ri suruga!
Towe-Na daꞌa ria kaopu-opuna.