Dade mantoiya i PUE
135
1-2 Ratoiyata i PUE!Umba komi batua-batua i PUE,
toiyamo sanga i PUE!
Komi to nokarajaa ri Sapo Mpepue,
bo ri lalowo sapo Alatalata,
toiyamo sanga-Na!
3 Toiyamo i PUE sabana Iꞌa nabelo.
Podademo mantoiya sanga-Na, sabana sanga-Na etu nompakasana rara. a
4 Iꞌa nompelisi muli Yakub najadi bagia-Na,
todea Israel najadi todea to nipotowe-Na mpuꞌu.
5 Ninjaniku PUE mpuꞌu-mpuꞌu nakuasa,
Iꞌa neliu nggakuasa nggari pura-pura pue ntanina.
6 PUE nompowia nuapa-nuapa to nipodota-Na,
nabeloka ri langi nabeloka ri dunia,
nabeloka ri tasi, nabeloka riara ntasi to nandala.
7 Nipakarata-Na kulimu nggari tampa nu dunia,
nipowia-Na kila nosanggani ante uja,
pade nipopesuwu-Na poiri nggari petoꞌona.
8 Nipatesi-Na pura-pura ana ulumbua ri tana Masir,
nabeloka ana ulumbua manusia,
nabeloka ana ulumbua binata.
9 Bo nipakarata-Na tandai-tandai to nipogumaa
ri tatongo-tongo to Masir,
ala mombasuku Magau Firaun bo pura-pura pangga betena.
10 Nadea tau nggari ngata-ngata ntanina nidagi-Na,
bo magau-magau to narosona nipatesina:
11 etumo Sihon magau Amori bo Og magau Basan,
bo pura-pura topoparenta Tana Kanaan.
12 Pade tana ira niwai-Na
ka todea-Na muli Israel najadi bagia ira sampe ri muli nu muli.
13 O PUE, sanga-Mu kana rapotolele sampe ri kasae-saena.
O PUE, Komi kana ratora ntau sampe ri muli nu muli.
14 Sabana Komi nanjaliku todea-Mu,
bo naꞌasi mata nanggita batua-batua-Mu.
15 Parantau pue-pue ntanina to nisomba tau-tau nggari ngata-ngata ntanina,
nipowia nggari bulawa bo salaka,
powia mpale manusia.
16 Naria sumba tapi daꞌa namala notesa,
naria mata tapi daꞌa namala nekita,
17 naria talinga, tapi daꞌa namala neꞌepe,
pade daꞌa ria nosa nesuwu nggari sumba ira.
18 Wetumo to majadi ri jaꞌi pura-pura tau
to nompowia parantau-parantau etu bo nomparasaya ri jaꞌina.
19 Umba komi tau-tau to Israel, toiyamo i PUE!
Umba komi muli-muli Harun, toiyamo i PUE!
20 Umba komi muli-muli Lewi, toiyamo i PUE!
Umba komi tau-tau to nekou ri jaꞌi PUE, toiyamo Iꞌa!
21 Ratoiyata i PUE nggari Sion!
Iꞌamo to netoꞌo ri kota Yerusalem!
Ratoiyata i PUE!