Rasi to niwai PUE riara sapo ntau to nekou ri jaꞌi-Na
128
Dade nipodade tempo nalau nantuki eo bete ri Yerusalem.Nasana mpuꞌu butu mbaꞌa tau to nekou ri jaꞌi PUE,
to natuwu nantuki dota-Na.
2 Komi kana manggoni asele mpalemu mboto,
bo matuwu masana bo mabelo!
3 Riara sapomu rongomu kana masimbayu ewa walaa anggur
to nadea wuana.
Ana-anamu masimbayu ewa sulu-sulu kayu zaitun
ri ntalili mejamu!
4 Iwetumo rasi to rawai PUE
ka langgai to nekou ri jaꞌi-Na.
5 Perapi PUE mombagane komi nggari sapo-Na ri bulu Sion,
perapi komi manggita kabelo katuwu pue ngata Yerusalem,
sampe kaopu katuwumu.
6 Perapi komi mandate umurumu sampe manggita ana bo makumpumu.
Perapi todea Israel masana bo mabelo katuwuna!