PUE Topanggalendu to Israel
121
Dade nipodade tempo nalau nantuki eo bete ri Yerusalem.Aku nantangoaka mpaka ri bulu-bulu.
Nggari umba marata petulungiku?
2 Petulungiku marata nggari jaꞌi PUE
to nompajadi langi bo dunia.
3 Iꞌa daꞌa nompakamba komi madungga,
Topojagai komi daꞌa ntoto nangantu.
4 Topojagai to Israel mpuꞌu-mpuꞌu
daꞌa mangantu bara maturu malumpi.
5 PUEmo to nombajagai komi,
Iꞌamo Topanggalendu komi to naria ri sabingga ngganamu.
6 Mata eo daꞌa nompakajuꞌa komi tempo eona,
bara wula tempo nggawengina.
7 PUE kana manggalendu komi nggari pura-pura kasusa,
Iꞌa kana mombajagai katuwumu.
8 PUE kana manggalendu komi tempo mesuwu bo mesua riara njapo,
nompamula weꞌi-weꞌi sampe ri kasae-saena.