Posambaya merapi tulungi
120
Dade nipodade tempo nalau nantuki eo bete ri Yerusalem.aRiara kasusaku aku nekakai ka i PUE,
pade Iꞌa nombasono aku.
2 O PUE, kabasakamo aku
nggari topodawa bo topebagiu.
3 E, topebagiu, nuapa rapowia Alatala ka komi?
Iwenu Iꞌa mombasuku komi?
4 Ante pana to nataja nggari tadulako,
bo ruti nu apu to najela-jela!
5 Nandasamo aku netoꞌo ri Tana Mesekh ewa tau topesowo,
atau ri tatongo tau-tau to Kedar!b
6 Nasae gagamo aku netoꞌo
nosanggani ka tau to daꞌa nompokono posinggabelo.
7 Aku eꞌi nompokono posinggabelo,
tapi ane aku nanguli tau-tau kana matuwu mosinggabelo,
ira aga nompokono posibali.