Tesa i PUE
Kasana ntau to nantuki Atura-atura i PUE
119
(Alef) a1 Nasana mpuꞌu tau to daꞌa nowia sala,
bo natutu nantuki Atura-atura i PUE.
2 Nasana mpuꞌu tau to nantuki pepatora-pepatora i PUE,
bo nompasimbuku ante mpuꞌu-mpuꞌu rara mangelo Iꞌa.
3 Ira daꞌa nompowia kajaꞌana,
tapi natuwu nantuki dota-Na.
4 PUE, Komi nombawai parenta-parenta-Mu ka kami,
ala ratuki ante mpuꞌu-mpuꞌu rara.
5 Perapi aku batena matuwu
mantuki atura-atura to nipakatantu-Mu!
6 Ane aku mompariara ntaꞌi pura-pura parenta-Mu,
aku daꞌa rapakaeya.
7 Aku kana mosukuru ri jaꞌi-Mu ante rara to nanoa,
tempo aku meguru atura-atura-Mu to nakono.
8 Aku madota mantuki atura-atura to nipakatantu-Mu,
neꞌe ntoto Komi mompalasi aku.
Natundu riara Tesa i PUE
(Bet)
9 Iwenu ngana muda mamala mombajagai pokaingguna ala daꞌa masala?
Ante matuwu mantuki tesa-Mu.
10 Ante mpuꞌu-mpuꞌu rara aku nangelo Komi,
neꞌe rapakamba aku masalanjala bo daꞌa mantuki parenta-Mu.
11 Tesa-Mu niboliku riara ntaꞌiku,
ala aku daꞌa masilaka ri jaꞌi-Mu.
12 O Pue, aku nantoiya Komi;
patuduki ka akumo atura-atura to nipakatantu-Mu.
13 Ante sumbaku aku nompatolele,
pura-pura atura to nitesa-Mu.
14 Nadamba raraku nantuki pepatora-pepatora-Mu,
nasimbayu ewa kadamba rara ntau nombarata mpengele-ngele kakalumana.
15 Aku madota mantondoaka parenta-parenta-Mu,
bo mantuki dota-Mu.
16 Atura-atura to nipakatantu-Mu nompakadamba raraku;
tesa-Mu daꞌa kukalinga.
Kasana rara mantuki Parenta i PUE
(Gimel)
17 Powiamo to nabelo ka aku batua-Mu eꞌi,
ala aku batena matuwu bo mantuki tesa-Mu.
18 Pakanotomo raraku ala aku mamala manginjani
pepatuduki to nipogumaa riara Atura-atura-Mu.
19 Aku eꞌi aga torata ri dunia,
neꞌe ratabuniaka ka aku parenta-parenta-Mu.
20 Eo wengi nalentora mpuꞌumo raraku
madota manginjani atura-atura-Mu.
21 Komi nangontiaka tau to nalanga rarana,
bo nombajanjiaka tau to nombaliunaka parenta-parenta-Mu.
22 Neꞌe aku mawela pesalai-pesalai ira,
sabana aku natutu nantuki pepatora-pepatora-Mu.
23 Naupa pangga-pangga bete masintuwu mangewa aku,
batua-Mu eꞌi batena mantondoaka atura-atura to nipakatantu-Mu.
24 Pepatora-pepatora-Mu nompakadamba raraku,
bo nompatuduki aku.
Dota rara mantuki Parenta i PUE
(Dalet)
25 Aku sakedika namate,
tulungimo aku ala batena matuwu ewa to nijanji-Mu.
26 Aku nantesa pura-pura pokaingguku ri jaꞌi-Mu, pade Komi nombasono aku.
Patuduki ka akumo atura-atura to nipakatantu-Mu.
27 Tulungimo aku manginjani batuana parenta-parenta-Mu,
ala aku mantondoaka powia-powia-Mu to nipogumaa.
28 Aku notumangi ante susa raraku,
pakawoemo raraku ante tesa-Mu.
29 Neꞌe rapakamba aku mantuki jala to nasala,
patuduki ka akumo Atura-atura-Mu sabana kabelo rara-Mu.
30 Nipakatantukumo nantuki jala to nakonona,
atura-atura-Mu batena nitoraku.
31 O PUE, aku batena nantuki pepatora-pepatora-Mu,
neꞌe rapakamba aku rapakaeya.
32 Nadamba raraku nantuki parenta-parenta-Mu,
sabana Komi nantambai noto ka aku.
Posambaya merapi PUE mompakanoto batua Atura-Na
(He)
33 O PUE, patuduki ka akumo batua Atura-atura to nipakatantu-Mu,
pade aku matundu mantuki atura etu sampe ri kaopu katuwuku.
34 Pakanoto ka akumo batuana Atura-Mu etu ala kutuki,
bo kupowia ante mpuꞌu-mpuꞌu rara.
35 Tulungimo aku matuwu mantuki pura-pura parenta-Mu,
sabana etumo to nipodambaku.
36 Wai ka akumo dota rara mantuki pepatora-pepatora-Mu,
meliu nggari dota rara majadi makalumana.
37 Neꞌe rapalamba aku masiwu mangelo anu to daꞌa ria gunana,
tulungimo aku matuwu mantuki dota-Mu!
38 Pakadupamo janji-Mu ka batua-Mu eꞌi,
janji to niwai-Mu ka tau to nekou ri jaꞌi-Mu.
39 Pakakawaomo aku nggari kasusa to nipokaekaku,
sabana nabelo mpuꞌu atura-atura-Mu.
40 Kitamo, nalentora mpuꞌumo raraku mantuki parenta-parenta-Mu.
Tulungimo aku ala batena matuwu sabana Komi batena nanoa.
Mantuki Parenta i PUE
(Waw)
41 O PUE, popokita ka akumo towe-Mu to daꞌa ria kaopu-opuna,
bo pakasalamamo aku nantuki janji-Mu,
42 ala aku mamala mombasono tau to nanjalai aku,
sabana aku nomparasaya tesa-Mu.
43 Neꞌe rapalamba aku motesa anu daꞌa nakono,
sabana aku nanjarumaka atura-atura-Mu.
44 Aku batena mantuki Atura-Mu
sampe ri kasae-saena.
45 Aku kana matuwu ante maꞌama,
sabana aku nompasimbuku mantuki Parenta-parenta-Mu.
46 Aku kana mantesa Pepatora-pepatora-Mu ri ngayo magau-magau,
pade aku daꞌa rapakaeya.
47 Aku kana madamba-damba mantuki Parenta-parenta-Mu
to nipotoweku.
48 Aku nombabila bo nompotowe Parenta-parenta-Mu,
bo nantondoaka pura-pura Atura to nipakatantu-Mu.
Parasayamo Parenta i PUE
(Zayin)
49 Toramo tesa to niuli-Mu ka batua-Mu,
Tesa-Mu etu nompakaroso raraku manjarumaka Komi.
50 Tempo aku riara kasusa, eꞌimo to nompakawoe raraku,
janji-Mu nompajadi aku batena natuwu.
51 Tau-tau nasombo mpuꞌu-mpuꞌu nanjalai aku,
tapi aku batena natutu nantuki Atura-atura-Mu.
52 O PUE, tempo aku nantora Atura-atura-Mu to naria nggari tempo nggaulu,
nawoemo raraku.
53 Narau mpuꞌu raraku nanggita tau najaꞌa,
to mana nantuki Atura-atura-Mu.
54 Atura-atura to nipakatantu-Mu kupajadi dade mantoiya Komi,
tempo aku natuwu sampalai ri dunia eꞌi.
55 O PUE, tempo nggawengina aku nantora sanga-Mu;
aku batena mantuki Atura-atura-Mu.
56 Nasana mpuꞌu raraku,
sabana aku nantuki Parenta-parenta-Mu.
Tukimo Atura-atura i PUE
(Kheth)
57 O PUE, Komimo to nosanggani ante aku,
aku nojanji mantuki Tesa-tesa-Mu.
58 Aku merapi ante mpuꞌu-mpuꞌu rara, poasi matamo aku,
potowemo aku nantuki Janji-Mu.
59 Aku nompekiri jala nggatuwuku,
bo nojanji manjili mantuki Pepatora-pepatora-Mu.
60 Aku masalisa-lisa bo daꞌa metisae-sae
mantuki Parenta-parenta-Mu.
61 Tau najaꞌa nantaꞌa tandoko ka aku,
tapi aku daꞌa nanggalinga Atura-atura-Mu.
62 Tongo wengi aku nembangu ala mantoiya Komi,
sabana Atura-atura-Mu to nanoa.
63 Aku nosimporoa ante pura-pura tau to nekou ri jaꞌi-Mu,
bo pura-pura tau to nantuki Parenta-parenta-Mu.
64 O PUE, dunia naponu ante towe-Mu to daꞌa ria kaopu-opuna,
patudukimo aku ala mantuki Atura-atura to nipakatantu-Mu.
Atura-atura i PUE neliu nggasuli olina
(Teth)
65 O PUE, komi nompowia belo ka batua-Mu
nantuki tesa-Mu ka aku.
66 Wai ka akumo noto bo pangginjani to nabelo,
sabana aku nomparasaya Parenta-parenta-Mu.
67 Daꞌapa aku nipandasa aku nombaliunaka atura-Mu,
tapi weꞌi-weꞌi aku natutu nantuki Tesa-Mu.
68 Komi nabelo bo powia-Mu batena nabelo,
jadi patudukimo aku mantuki Atura-atura to nipakatantu-Mu.
69 Tau nalanga rara nompakajaꞌa aku ante tesa-tesa dawa,
tapi aku nantuki Parenta-parenta-Mu ante mpuꞌu-mpuꞌu rara.
70 Tau-tau etu nambongo bo daꞌa nantuki Parenta-Mu,
tapi aku nompokono Atura-atura-Mu.
71 Nabelo mpuꞌu aku nipandasa,
ala aku meguru Atura-atura to nipakatantu-Mu.
72 Atura-atura to niwai-Mu nabelo ka aku,
neliu nggasuli olina nggari pura-pura bulawa bo salaka ri dunia.
Kanoa Atura i PUE
(Yodh)
73 Komimo to nompajadi bo nombapandu aku,
wai ka akumo noto ala aku mamala meguru bo mantuki Parenta-parenta-Mu.
74 Tau-tau to nekou ri jaꞌi-Mu kana madamba ane manggita aku,
sabana aku nanjarumaka Tesa-Mu.
75 O PUE, ninjaniku Atura-atura-Mu nanoa.
Komi nompandasa aku sabana Komi batena nompakadupa Janji-Mu mombasuku tau to nasala.
76 Perapi towe-Mu to daꞌa ria kaopu-opuna mompakawoe raraku,
ewa to nijanji-Mu ka aku batua-Mu.
77 Poasi matamo aku ala aku batena matuwu,
sabana Atura-atura-Mu nipodambaku.
78 Pakambamo tau-tau daꞌa ria adana rapakaeya,
sabana ira nompakajaꞌa aku nau daꞌa ria saba.
Tapi aku kana mantondoaka Parenta-parenta-Mu.
79 Pakambamo tau-tau to nekou ri jaꞌi-Mu marata ri jaꞌiku,
ira to nanginjani Pepatora-pepatora-Mu.
80 Perapi raraku batena manoa mantuki Atura-atura to nipakatantu-Mu,
ala neꞌe aku rapakaeya.
Posambaya merapi rapakasalama
(Kaph)
81 PUE, nalentora mpuꞌu raraku Mupakasalama,
aku nanjarumaka Janji-Mu.
82 Nalenge raraku nompopea Komi nompakadupa Janji-Mu.
Aku nekutana, “Nepiamo Komi mompakawoe raraku?”
83 Naupa aku mana nompakule ewa pomboli anggur nggari kulimba to nenggoro bo mana ria gunana,
tapi Atura-atura to nipakatantu-Mu daꞌa nikalingaku.
84 Sampe nepia batua-Mu eꞌi mosabara?
Nepia Komi mombasuku tau-tau to nompandasa aku?
85 Tau-tau daꞌa ria adana nombakae lowu ala mompakanawu aku,
etumo tau-tau to daꞌa nantuki Atura-atura-Mu.
86 Pura-pura parenta-Mu namala raparasaya.
Tulungimo aku, sabana aku niraga ntau nau daꞌa ria saba!
87 Aku sakedika nipatesi ira,
tapi aku daꞌa nanjapuaka Parenta-parenta-Mu.
88 Tulungimo aku ala batena matuwu sabana towe-Mu daꞌa ria kaopu-opuna.
ala aku matutu mantuki Pepatora-pepatora to niuli-Mu.
Parasayamo Tesa i PUE
(Lamed)
89 O PUE, Tesa-Mu batena maroo ri suruga,
sampe ri kasae-saena.
90 Komi batena namala raparasaya sampe ri muli nu muli;
Komi nompakaroso dunia sampe batena naria.
91 Nggari Parenta-Mu pura-pura etu naria weꞌi-weꞌi,
sabana pura-pura etu natundu ri jaꞌi-Mu.
92 Ane rapana Atura-atura-Mu daꞌa nompakadamba raraku,
natantumo aku mamate riara kasusaku.
93 Aku daꞌa ntoto manggalinga Parenta-parenta-Mu sampe ri kasae-saena,
sabana ante Parenta-parenta etu Komi nombawai katuwua ka aku.
94 Pakasalamamo aku, sabana aku batua-Mu,
aku nompasimbuku mantuki Parenta-parenta-Mu.
95 Tau-tau najaꞌa nompopea madota mompatesi aku,
tapi aku batena mompariara ntaꞌi Pepatora-pepatora-Mu.
96 Nikitaku pura-pura to nariana, naria kaopuna,
tapi Parenta-parenta-Mu daꞌa ria kaopu-opuna.
Towe ka Atura i PUE
(Mem)
97 Nipotoweku mpuꞌu Atura-atura-Mu,
nitondoakaku njaneo ntua.
98 Parenta-parenta-Mu nombawai noto ka aku
sampe aku neliu ngganoto nggari bali-baliku,
sabana parenta etu batena nitondoakaku.
99 Nanotopa aku pade guru-guruku,
sabana Pepatora-pepatora-Mu nitondoakaku.
100 Nanotopa aku pade totuꞌa-totuꞌa,
sabana aku nantuki Parenta-parenta-Mu.
101 Aku daꞌa nantuki jala to najaꞌana,
ala aku matutu mantuki Tesa-Mu.
102 Aku daꞌa nanjapuaka Atura-atura-Mu,
sabana Komimo to nompaguru aku.
103 Namomi mpuꞌu Tesa-Mu,
neliu nggamomi nggari ue noa.
104 Parenta-parenta-Mu etu nombawai noto ka aku,
sampe nipowua mataku pura-pura pokainggu to najaꞌa.
Tesa i PUE nanggeni reme
(Nun)
105 Tesa-Mu ewa poindo nombawanta lempaku,
bo nompakareme jalaku.
106 Aku nojanji mompakadupa janji to niuliku,
mantuki Atura-atura-Mu to nanoa.
107 O PUE, nandasa mpuꞌumo aku!
Tulungimo aku ala batena matuwu ewa to nijanji-Mu riara Tesa-Mu!
108 O PUE, tarimamo posambaya posukuruku,
bo patuduki ka akumo Atura-atura-Mu.
109 Aku batena mantingayo kamatea,
tapi aku daꞌa nanggalinga Atura-atura-Mu.
110 Tau-tau najaꞌa nantaꞌa tandoko ka aku,
tapi aku daꞌa nombaliunaka Parenta-parenta-Mu.
111 Pepatora-pepatora-Mu najadi sosora ka aku sampe ri kasae-saena,
bo mpuꞌu-mpuꞌu nompakadamba raraku.
112 Nipakaliongukumo raraku mantuki Atura-atura to nipakatantu-Mu,
sampe kaopu katuwuku.
Naꞌama sabana nantuki Tesa i PUE
(Samek)
113 Aku nomporau rara tau-tau to norongu rara nantuki Tesa-Mu,
tapi aku nompotowe Atura-atura-Mu.
114 Komimo ewa kaliawo to kupekalendu;
aku nanjarumaka Tesa-Mu.
115 E, komi tau-tau najaꞌa, palaimo nggari jaꞌiku!
Aku madota mantuki Parenta-parenta Alatala to nisombaku.
116 PUE, pakarosomo aku nantuki Janji-Mu ala aku batena matuwu,
bo neꞌe rapalamba aku rapakaeya, sabana aku nanjarumaka Komi.
117 Tulungimo aku ala aku masalama,
bo batena mompariara ntaꞌi Parenta-parenta-Mu.
118 Komi nompoara pura-pura tau to nanjapuaka Atura-atura to nipakatantu-Mu,
sabana daꞌa ria gunana nia jaꞌa ira.
119 Pura-pura tau najaꞌa ri dunia nireke-Mu ewa rumpu;
etumo sabana aku nompotowe Pepatora-pepatora-Mu.
120 Koroku nolalete sabana naeka ka Komi,
naekamo raraku nantora Atura-atura-Mu.
Natundu riara Atura i PUE
(Ayin)
121 Nipowiakumo to nakono bo nanoa,
neꞌe aku rawai ka tau-tau to nompandasa aku!
122 Saliku bo tulungimo aku ala aku daꞌa mokuya-kuya;
neꞌe rapakamba aku rapandasa tau-tau to nasombo.
123 Nalenge mpuꞌumo aku nompopea Komi mompakasalama aku,
bo manggabasaka aku nantuki Janji-Mu.
124 Powia ka akumo to nabelona nantuki towe-Mu to daꞌa ria kaopu-opuna,
bo patuduki ka akumo Atura-atura to nipakatantu-Mu.
125 Aku eꞌi batua-Mu, wai ka akumo noto,
ala aku mamala manginjani Atura-atura-Mu.
126 O PUE, naratamo tempona Komi mombasuku manusia,
sabana ira nombaliunaka Atura-atura-Mu.
127 Aku nompotowe Parenta-parenta-Mu
neliu nggari bulawa.
128 Etumo sabana aku matuwu manoa nantuki pura-pura Parenta-Mu.
Nawua mataku nanggita pokainggu-pokainggu to nadenggo.
Dota rara mantuki Parenta i PUE
(Pe)
129 Pepatora-pepatora-Mu mpuꞌu-mpuꞌu nipogumaa,
etumo sabana aku nantuki ante mpuꞌu-mpuꞌu raraku.
130 Ane Tesa-Mu ratarangga, etu nompakareme,
bo nombawai noto ka tau-tau biasa.
131 Nalentora mpuꞌu raraku
mantuki Parenta-parenta-Mu.
132 Peilimo aku bo potowemo aku,
ewa to nabiasa nipowia-Mu ka tau-tau to nompotowe Komi.
133 Ninimo aku ewa to nijanji-Mu ala aku daꞌa madungga,
bo neꞌe rapakamba aku rakuasai kajaꞌana.
134 Kabasakamo aku nggari tau-tau nompandasa aku,
ala aku mamala mantuki Parenta-parenta-Mu.
135 Perapi reme nggari jaꞌi-Mu mombawanta aku,
bo patuduki ka akumo Atura-atura to nipakatantu-Mu.
136 Ue mataku noili ewa binangga,
sabana tau daꞌa nantuki Atura-atura-Mu.
Atura i PUE nanoa
(Tsade)
137 O PUE, Komi batena nanoa,
bo Atura-atura-Mu nakono.
138 Pepatora-pepatora to niwai-Mu nanoa,
bo namala nisarumaka.
139 Rau rara newoya riara ntaꞌiku,
sabana baliku nanggalinga Tesa-Mu.
140 Janji-Mu namala niparasaya,
bo mpuꞌu-mpuꞌu nipotoweku.
141 Aku eꞌi tau naede katuwuku bo daꞌa ria batuana,
tapi Parenta-parenta-Mu daꞌa nikalingaku.
142 Komi batena nanoa sampe ri kasae-saena,
bo Atura-atura-Mu batena nakono.
143 Aku nirata kasusa bo kapari,
tapi Parenta-parenta-Mu nompakadamba raraku.
144 Pepatora-pepatora-Mu batena nanoa sampe ri kasae-saena,
wai ka akumo noto ala aku matuwu.
Posambaya merapi rakabasaka
(Qof)
145 O PUE, aku nekakai ante mpuꞌu-mpuꞌu rara, sonomo aku!
Aku kana mantuki Atura-atura to nipakatantu-Mu.
146 Aku nekakai ka Komi; pakasalamamo aku!
Aku kana mantuki Pepatora-pepatora-Mu.
147 Mpadondo njiina aku nembangu bo nekakai nerapi tulungi.
Aku nanjarumaka Tesa-Mu.
148 Njambengi ntua aku daꞌa naturu,
ala mantondoaka Janji-Mu.
149 O PUE, epemo pekakaiku nantuki towe-Mu to daꞌa ria kaopu-opuna;
tulungimo aku ala batena matuwu ewa to nijanji-Mu riara Atura-atura-Mu.
150 Namosumo tau-tau to nombaraga aku ante nia najaꞌa,
ira daꞌa nantuki Atura-atura-Mu.
151 Tapi PUE, namosumo Komi ante aku,
bo pura-pura Parenta-Mu nakono.
152 Nompamula tempo nggaulu ninjaniku nggari Pepatora-pepatora-Mu,
Komi nompakatantu etu kana maroo sampe ri kasae-saena.
Posambaya nekitulungi
(Resh)
153 Kitamo kasusaku bo kabasakamo aku,
sabana aku daꞌa nanggalinga Atura-atura-Mu.
154 Salikumo aku mantingayo parakaraku bo kabasakamo aku,
tulungimo aku ala batena matuwu ewa to nijanji-Mu.
155 Tau-tau najaꞌa daꞌa rapakasalama,
sabana ira daꞌa nantuki Atura-atura to nipakatantu-Mu.
156 O PUE, nabete mpuꞌu asi mata-Mu,
tulungimo aku ala batena matuwu ewa to nijanji-Mu riara Atura-atura-Mu.
157 Nadeamo baliku nombaraga aku,
tapi aku daꞌa nanggalinga Pepatora-pepatora-Mu.
158 Nawua mataku nanggita tau-tau to nanjapuaka atura-Mu,
sabana daꞌa niparasaya ira Tesa-Mu.
159 Kitamo! Nipotoweku mpuꞌu Parenta-parenta-Mu!
O PUE, tulungimo aku ala batena matuwu sabana towe-Mu daꞌa ria kaopu-opuna.
160 Pura-pura Tesa-Mu nakono,
pura-pura Atura-Mu nanoa bo batena naria sampe ri kasae-saena.
Mantuki Parenta i PUE
(Sin bo Shin)
161 Pangga-pangga bete nombaraga aku naupa daꞌa ria saba,
tapi aga Tesa-Mu to nipokaekaku.
162 Janji-Mu nompakadamba raraku,
ewa tau nombarata mbara-mbara nadea.
163 Nawua mataku bo narau raraku nanggita topodawa,
tapi aku nompotowe Atura-atura-Mu.
164 Pitu nggani saeo aku nantoiya Komi,
sabana Atura-atura-Mu nanoa.
165 Naꞌama bo nasanamo tau-tau to nompotowe Atura-atura-Mu,
daꞌa ria nuapa-nuapa mompakasusa ira.
166 O PUE, aku nompopea Komi mompakasalama aku,
Parenta-parenta-Mu kana kutuki.
167 Aku natutu nantuki Pepatora-pepatora-Mu,
bo nompotowe ante mpuꞌu-mpuꞌu raraku.
168 Aku nantuki Parenta-parenta bo Pepatora-pepatora-Mu,
sabana Komi nanggita pura-pura pokaingguku.
Posambaya merapi tulungi
(Taw)
169 O PUE, epemo pekakaiku,
wai ka akumo noto ewa to nijanji-Mu riara Tesa-Mu.
170 Epemo pomperapiku,
bo kabasakamo aku nosinggawela ante Janji-Mu.
171 Aku batena mantoiya Komi,
sabana Komi nompatuduki ka aku Atura-atura to nipakatantu-Mu.
172 Aku madota modade mantoiya Janji-Mu,
sabana pura-pura Parenta-Mu nakono.
173 Perapi Komi batena masadia mantulungi aku,
sabana aku nompakatantu mantuki Parenta-parenta-Mu.
174 O PUE, nalentora raraku ala rapakasalama Komi,
Atura-atura-Mu nompakadamba raraku.
175 Pakambamo aku matuwu ala aku mantoiya Komi,
perapi Atura-atura-Mu mantulungi aku.
176 Nasalanjalamo aku ewa bimba to natonto,
elomo batua-Mu eꞌi,
sabana aku daꞌa nanggalinga Parenta-parenta-Mu.