Dade mantoiya i Pue
118
Posukurumo ka i PUE, sabana Iꞌa nabelo!Towe-Na daꞌa ria kaopu-opuna.
2 Todea Israel kana manguli:
“Towe-Na daꞌa ria kaopu-opuna.”
3 Pura-pura topanggeni agama muli Harun kana manguli:
“Towe-Na daꞌa ria kaopu-opuna.”
4 Pura-pura tau to nekou ka i PUE kana manguli:
“Towe-Na daꞌa ria kaopu-opuna.”
5 Riara kasusaku aku nekakai ka i PUE,
Iꞌa nombasono aku bo nompakasana raraku.
6 Aku daꞌa naeka sabana i PUE nomporoa aku,
daꞌa ria manusia mompakule mangewa aku.
7 PUE nosabingga ka aku ala mantulungi aku;
aku kana manggita baliku radagi.
8 Nabelopa mekalendu ri jaꞌi PUE,
pade manjarumaka manusia.
9 Nabelopa mekalendu ri jaꞌi PUE,
pade manjarumaka magau-magau.
10 Bali-bali nggari ngata-ngata ntanina nantalili aku,
tapi ante kuasa i PUE ira nidagiku.
11 Ira nombatiku aku nggari umba-umba,
tapi ante kuasa i PUE ira nidagiku.
12 Ira nantambu aku ewa kadea nu noa,
tapi ante kuasa i PUE ira nidagiku.
Riara sampida mata ira nipakaropu,
ewa kawoko nggarui nipalabu nu apu.
13 Aku nijuanaka ira sampe sakedika nadungga,
tapi PUE nantulungi aku.
14 PUEmo to nompakaroso aku bo to nitoiyaku;
Iꞌamo to nompakasalama aku.
15 Naria suara ntau padagi nongare-ngare ri tenda-tenda tau to nanoa,
“PUE nompowia kabaraka!
16 PUE nombawai kuasa ka kita nombadagi bali-balita!
PUE nompowia kabaraka!”
17 Aku daꞌa mamate, tapi batena matuwu,
bo mompatolele powia-powia i PUE.
18 PUE nombaboba aku mpakaroꞌo,
tapi Iꞌa daꞌa nompakamba aku namate.
19 Bea ka akumo pewobo Sapo Mpepue,
petoꞌo mesua ka tau-tau nanoa,
ala aku mamala mesua mosukuru ka i PUE.
20 Eꞌimo pewobo Sapo Mpepue,
aga tau-tau to nanoa namala mesua riarana.
21 PUE, aku kana mosukuru ri jaꞌi-Mu, sabana Komi nombasono posambayaku,
bo nompakasalama aku.
22 Watu to nitajiaka ntopowia sapo,
watu etumo to najadi palo mpandasi to neliu nggaroso.a
23 Etumo nipowia i PUE,
sangele powia to nipogumaa matata.
24 Eꞌimo eo to nipajadi i PUE,
kamaimo kita mantora eo eꞌi ante madamba-damba!
25 O PUE, pakasalamamo kami!
O PUE, wai ka kamimo katuwua mabelo!
26 Perapi Pue mombagane tau to narata niposumba i PUE.b
Kami merapi rasi bo belo ka komi nggariara Sapo Mpepue.
27 PUE etumo Alatala, Iꞌa nompakareme kita.
Soꞌomo ante lui binata to rapesomba ri eo bete
ri sidu-sidu meja mpesomba.
28 Komi Alatala to nisombaku, aku madota mosukuru ri jaꞌi-Mu.
Alatala to nisombaku, aku madota mantoiya Komi.
29 Posukurumo ka i PUE, sabana Iꞌa nabelo!
Towe-Na daꞌa ria kaopu-opuna.