Toiyamo Alatala to nakuasa
115
O Pue, daꞌa kami, daꞌa kami to masipato ratoiya,tapi aga sanga-Mu to masipato rabila bo ratoiya,
sabana towe-Mu daꞌa ria kaopu-opuna,
bo janji-Mu batena namala raparasaya.
2 Nokuya tau-tau ri dunia nompongei kami bo nanguli,
“Ri umbamo weꞌi Alatala to Israel?”
3 Alatala to nisombata naria ri suruga;
Iꞌa nowia nuapa-nuapa nipodota-Na.
4 Parantau to nisomba tau-tau etu nipowia nggari bulawa bo salaka,
powia mpale manusia.
5 Naria sumbana, tapi daꞌa namala notesa,
naria matana, tapi daꞌa namala nekita.
6 Naria talingana, tapi daꞌa namala neꞌepe,
naria ongena, tapi daꞌa namala nangenga.
7 Naria palena, tapi daꞌa namala nesoko,
naria kadana, tapi daꞌa namala nolumako,
bo daꞌa ria suara nesuwu nggari ngangana.
8 Iwetu woꞌu to majadi ri jaꞌi ntau to nompowia parantau-parantau etu,
bo pura-pura tau to nepue ka ira.
9 Umba komi to Israel, parasayamo i PUE!
Iꞌamo Topetulungi bo kaliawo komi!
10 Umba komi muli-muli Harun,a parasayamo i PUE!
Iꞌamo Topetulungi bo kaliawo komi!
11 Umba komi to nekou ri jaꞌi PUE, parasayamo i PUE!
Iꞌamo Topetulungi bo kaliawo komi!
12 PUE nantora kita bo mombawai rasi ka kita.
Iꞌa kana mombawai rasi ka tau-tau to Israel,
bo pura-pura topanggeni agama nggari muli Harun.
13 Iꞌa kana mombawai rasi ka tau-tau to nekou ri ri jaꞌi-Na,
nabelo ka tau naede katuwuna, nabelo ka tau nalanga katuwuna.
14 Perapi PUE mompakadea muli komi,
nabelo ka komi, nabelo ka ana-ana komi.
15 Perapi PUE to nompajadi langi bo dunia,
mombawai rasi ka komi.
16 Langi etu bagia i PUE,
tapi dunia eꞌi niwai-Na ka manusia.
17 Daꞌa tomate to mantoiya i PUE,
etumo ira to nesua ri petoꞌo ntomate.
18 Tapi kita to natuwuna, kitamo to mantoiya i PUE,
nompamula weꞌi-weꞌi sampe ri kasae-saena.
Ratoiyata i PUE!