Nakabasaka nggari kamatea
116
Aku nompotowe i PUE,sabana Iꞌa nangepe pekakaiku bo pomperapiku.
2 Aku kana mekakai ka Iꞌa sampe kaopu katuwuku,
sabana Iꞌa nangepe aku.
3 Aku nirata kasusa kamatea,
bo eka rara mantora kamatea nombaraga aku,
sampe nawiora bo nasusa raraku.
4 Tapi aku nekakai ka i PUE,
“O PUE, pakasalamamo aku!”
5 PUE batena natowe bo nanoa;
nabete mpuꞌu asi mata-Na ka kita.
6 PUE nompiara tau-tau biasa.
Tempo aku mana nompakule, Iꞌa nompakasalama aku.
7 Notesamo aku riara ntaꞌiku, “Kana kupakasana bali raraku,
sabana i PUE nabelo ri ri jaꞌiku.”
8 O PUE, Komi nanggabasaka aku nggari kamatea,
bo nompakawoe raraku tempo nasusa,
pade daꞌa nipakamba-Mu aku nadungga.
9 Aku danamala natuwu ri dunia eꞌi,
ante pekalendu i PUE.
10 Aku batena nomparasaya, naupa aku nompekiri,
“Nandasa mpuꞌu niepeku!”
11 Tempo naingu raraku aku notesa,
“Pura-pura manusia daꞌa mamala raparasaya.”
12 Nuapamo kuwai ka i PUE
mombabalasi kabelo-Na ri jaꞌiku?
13 Aku kana manggeni pesomba ue anggur ka i PUE sabana Iꞌa nompakasalama aku,
bo mosukuru sabana petulungi-Na.
14 Aku kana mompakadupa janjiku ka Iꞌa,
ri ngayo pura-pura todea-Na.
15 PUE nompariarantaꞌi
kamate ntau to nipotowe-Na.
16 O PUE, aku eꞌi batua-Mu!
Aku eꞌi batua-Mu, nasimbayu ewa indoku!
Komi nompakasalama aku nggari kamatea!a
17 Aku kana mombawai pesomba posukuru ri jaꞌi-Mu,
bo mekakai ka sanga-Mu.
18 Aku kana mompakadupa janjiku ka i PUE,
ri ngayo pura-pura todea-Na,
19 to nasiromu ri lalowo Sapo Mpepue,
ri tatongo Kota Yerusalem!
Ratoiyata i Pue!