Mantoiya kabelo i PUE
113
Ratoiyata i PUE!Umba komi batua-batua i PUE,
toiyamo sanga i PUE!
2 Toiyamo sanga i PUE,
nompamula weꞌi-weꞌi sampe ri kasae-saena!
3 Nggari pebuluna sampe ri kasolona,
sanga i PUE kana ratoiya!
4 PUE nakuasa ri pura-pura ngata ri dunia,
kuasa-Na neliu nggalanga nggari langi.
5 Isema nasimbayu ewa i PUE Alatala to nisombata?
Iꞌa noparenta nggari petoꞌo-Na to nalanga,
6 tapi Iꞌa nasadia notunggou
nompetiro langi bo dunia.
7 Iꞌa nangonggotaka tau nakasiasi nggari katuwu ira to napakasi,
bo nompakagana katuwu ntau to napepana.
8 Iꞌa nompowia ira nibila mpasanggani-nggani ante pangga bete,
nosanggani-ngani ante pangga bete ri tatongo todea-Na.
9 Iꞌa nompowia besi-besi togampa noana,
sampe besi etu najadi indo to nadamba mpuꞌu ri tatongo ana-anana.
Ratoiyata i PUE!