Mazmur 112

Kasana ntau to nanoa

Ratoiyata i PUE!

Nasana mpuꞌu tau to nekou ri jaꞌi PUE,

to nompokono nantuki pura-pura parenta-Na.

2 Ana-anana kana makuasa ri ngata eꞌi,

muli-muli ntau to nanoa kana rawai ka rasi.

3 Mbara-mbara bo kakalumana kana maria riara njapo ira,

bo katuwu ira masana sampe ri kasae-saena.

4 Nau riara karumauna kana maria reme ri jaꞌi ntau to nanoa,

etumo tau to natowe, naꞌasi mata bo nanoa.

5 Nasana mpuꞌu tau to najoi rarana nompopoinda doina,

bo nantui bagona ante nanoa.

6 Iꞌa kana moasele riara mpokarajaana,

bo kana ratora sampe ri kasae-saena.

7 Iꞌa daꞌa naeka nangepe kareba najaꞌa,

sabana iꞌa batena nomparasaya i PUE.

8 Naroo rarana bo daꞌa naeka,

sampe rakitana balina radagi Alatala.

9 Nibagi-bagina mbara-mbarana ka tau nakasiasi,

bo katuwuna masana sampe ri kasae-saena,

iꞌa mantambai makuasa bo rabila ntau.

10 Nanggita etu tau-tau najaꞌa najuꞌa rara,

ira nosinggiki baga sabana narau. Kaopuna ira namate.

Ino rara ntau najaꞌa kana malipo sampe ri kasae-saena.