Tesa nombatoiya kabelo Alatala
111
Ratoiyata i PUE! aAku madota mosukuru ka i PUE ante mpuꞌu-mpuꞌu rara,
nosanggani-nggani ante tau-tau nanoa,
ri tatongo kasiromu ntodea-Na.
2 Nabaraka mpuꞌu powia-powia i PUE,
masipato ratondoaka tau-tau to nompokono powia-powia etu.
3 Nabaraka bo nagaya powia-Na,
bo kanoa-Na naroo sampe ri kasae-saena.
4 Powia-powia-Na to nipogumaa najadi popatora;
PUE etu mpuꞌu-mpuꞌu naꞌasi mata bo natowe.
5 Iꞌa nombawai rasi ka tau-tau to nekou ri jaꞌi-Na,
nitora-Na janji-Na sampe ri kasae-saena.
6 Nipakanoto-Na kuasa-Na to nabete ka todea-Na
ante nombawai ka ira tana tau-tau nggari ngata-ngata ntanina.
7 Powia-Na nakono bo nanoa;
pura-pura atura-Na namala raparasaya,
8 naroo sampe ri kasae-saena,
nipajala ante nanoa bo nakono.
9 Iꞌa nanggabasaka todea-Na,
bo nanggawia pojanji ante ira sampe ri kasae-saena.
Iꞌamo i PUE to nagasa bo nabaraka!
10 Nekou ri jaꞌi PUE etumo puꞌu nu noto,
pura-pura tau to nekou ri jaꞌi-Na naria kataꞌuna.
Ratoiyamo Iꞌa sampe ri kasae-saena!